text size
Службите за итни случаи во неделата се обидуваа да стават под контрола голем шумски пожар во источниот дел на Белгија, откако огнот уништи околу 2.700 хектари природен резерват и принуди околу 600 жители да се евакуираат во област во близина на германската граница.
Локалните медиуми објавија дека пожарот во резерватот „От Фањ“ (Hautes Fagnes) е најголемиот во историјата на Белгија, иако властите во неделата соопштија дека ниту еден дом не бил оштетен.
Пожарот, кој брзо се шири, се приближува кон германската граница, а во фокусот е градот Моншау, голем туристички центар во регионот Ајфел. Локалните власти рано во неделата наутро ги повикаа жителите во делови од градот да се евакуираат за да се спречат здравствените ризици од чадот, иако подоцна соопштија дека засега нема причина да се верува дека пожарот ќе се прошири на германска територија.
Пожарот следува по неколку недели топло и суво време низ Европа, кое веќе предизвика големи пожари во Франција, Шпанија, Велика Британија и други земји.
Во пожарот во департманот Ланд во југозападна Франција, во четвртокот изгореа околу 1.700 хектари, изјави во неделата наутро пред новинарите Жил Клаврел, локален државен претставник.
Иако не се прогнозира дожд, температурите се спуштаат под 30 Целзиусови степени, што создава поповолни услови за пожарникарите, рече тој.
„Ситуацијата се развива прилично поволно“, рече тој. „Сè уште имаме многу работа пред нас, но работите очигледно изгледаат подобро отколку вчера.“
Во Белгија, министерот за одбрана Тео Франкен на Икс објави дека пред парламентот ќе претстави воен план за дејствување при пожари. Европската Унија испрати два хеликоптера и еден авион за да помогнат во гаснењето на пожарите, соопшти еврокомесарката Хаџа Лахбиб на Икс, откако Белгија го активираше механизмот за цивилна заштита на ЕУ.
Во меѓувреме, блискиот шумски пожар во Германија, поради кој во петокот мораа да бидат евакуирани повеќе од 2.000 луѓе, се чини дека е ставен под контрола. Според официјалното соопштение, жителите во западната сојузна покраина Северна Рајна-Вестфалија можеле да се вратат во своите домови.
.webp){kind=icon}
