Новите давачки го менуваат балансот на силите во индустријата за електрични автомобили

Кинеските производители на автомобили имаат најмал удел на европскиот пазар на електрични возила во последните осум месеци, откако новите царини ги зголемија увозните трошоци дури за 35 отсто, пишува „Блумберг“.

Во текот на ноември компаниите како што се БЈД (BYD) и брендот МГ на „Саик мотор“ (SAIC Motor Corp) учествуваа со 7,4 отсто од регистрациите на електрични возила во Европската Унија, што е помалку од 8,2 отсто од октомври, според податоците на истражувачката компанија „Датафорс“ (Dataforce). Ова е најниско учество од март годинава.

Bloomberg

Тарифите го намалуваат уделот на кинеските автомобили

Европската Унија воведе нови царини на крајот на октомври, откако истрагата покажа дека државните субвенции им даваат неправедна предност на кинеските производители на електрични возила. Повеќемесечните преговори не успеаја да го решат трговскиот спор, што го натера Брисел да додаде нови давачки на постојната царина од 10 проценти.

Сите електрични автомобили произведени во Кина, вклучувајќи ги и оние од западните брендови, како БМВ и „Тесла“, се погодени од овие тарифи. Висината на давачките варира во зависност од нивото на државната поддршка што ја добил производителот и соработката со истрагата на ЕУ.

Најлошо помина „Саик“, државната компанија производител на МГ, а вкупните царини сега достигнаа 45 отсто. МГ, кој со години беше најпродаван кинески автомобилски бренд во Европа, бележи значителен пад. Имено, регистрациите во ноември паднале за 58 отсто во однос на истиот период лани, покажуваат податоците на „Јато динамикс“.

Додека МГ го губи уделот на пазарот, БЈД продолжува да расте, со повеќе од двојно поголем број регистрации во Европа во текот на ноември, достигнувајќи 4.796 возила.

Bloomberg

„БЈД го презеде пазарот, додека МГ прави значителни загуби“, изјави за „Блумберг“ Џулијан Лицингер, аналитичар во „Датафорс“. Тој додаде дека растот на БЈД има здрава структура, при што речиси 80 проценти од регистрациите доаѓаат од приватни клиенти.

Кинеските производители се соочуваат со предизвици

Кинеските производители на автомобили што сакаат да се прошират на клучните глобални пазари се соочија со отпор во Европа откако беа практично исклучени од американскиот пазар. Пониските трошоци за батерии им дадоа на кинеските компании ценовна предност, но таа предност поттикна протекционистички мерки бидејќи официјалните лица во САД и во ЕУ се обидуваат да ги заштитат домашните производители. Индустријата, која вработува стотици илјади работници во Германија, Франција и во Италија, се соочува со предизвици во транзицијата кон електрични автомобили.

Иако царините на ЕУ ја забавија пенетрацијата на кинеските производители на европскиот пазар, нивното влијание беше помало од очекуваното, истакна Лицингер.

Во Германија и во Франција регистрациите на електрични возила од кинеските производители се преполовени во ноември во споредба со минатата година. Спротивно на тоа, во Велика Британија, која не е членка на ЕУ и не воведе царини, кинеските производители забележаа раст од 17 отсто на годишно ниво.

Некогаш неизбежната транзиција кон електрични возила забави во текот на 2024 година во многу делови од светот, принудувајќи ги производителите на автомобили да ги преиспитаат стратегиите, вклучувајќи ги и приспособувањата на моделот, изборот на локација на фабриката и промените во корпоративните структури.

Кинеските производители на автомобили преземаат чекори за локализирање на производството во Европа, но на таквите проекти ќе им треба време да се реализираат.

Автомобилските компании низ светот бараат начини да ги споделат трошоците за да се справат со високите инвестиции во технолошките иновации. На пример, минатата недела беше објавено дека „Нисан“ размислува за партнерство со „Хонда“ за зајакнување на нивната конкурентност во сегментот на електрични возила.