„Фич“: Раст на автоиндустријата од два отсто во 2025 и пригушени цени на глобално ниво

Рејтинг агенцијата „Фич“ (Fitch Ratings) за следната година го оценува како неутрален автомобилскиот сектор во светски рамки. Се очекува раст на овој пазар од два отсто на глобално ниво со пригушени цени поради големата конкуренција.

„Неутралните изгледи за глобалниот автомобилски сектор ги одразуваат нашите очекувања за стабилна производствена средина, при што глобалната продажба на лесни возила се предвидува да се зголеми за околу два отсто. Овој раст ќе биде нерамномерно распределен низ регионите, бидејќи европските и кинеските пазари се соочуваат со макроекономски предизвици. Очекуваме цените да останат пригушени поради ескалацијата на конкуренцијата“, пишува во образложението на „Фич“.

Агенцијата „Фич“ очекува каматните стапки да продолжат да се намалуваат во 2025 година во сите поголеми географски области, иако со побавно темпо во САД.

„Очекуваме дека потрошувачите ќе се вратат на пазарот со поповолни стапки на задолжување, особено откако ќе се решат изборните несигурности во САД и Германија“, пишува рејтинг агенцијата, посочувајќи дека преструктуирањето на европското производство ќе изврши дополнителен притисок врз паричните текови.

Depositphotos

 

„Фич“ очекува зајакнатите протекционистички политики да ги искомплицираат тековните напори за реструктуирање и да додадат дополнителен притисок врз профитабилноста на производителите на оригинална опрема. Повеќето глобални производители и добавувачи на оригинална опрема имаат локализирано производство, но ланците на производство и снабдување во Мексико и Канада би можеле да се соочат со дополнителни царини под претседателството на Доналд Трамп. Тоа ќе биде врвот по веќе воведените тарифи за кинеските производители од страна на САД и ЕУ.

Стапката на раст на електричните возила се зголемува на глобално ниво, но во САД и Европа опадна поради загриженоста на потрошувачите во врска со опсегот и намалувањето на пазарните вредности поради брзото прилагодување на технологијата и конкуренцијата.

„Не очекуваме значително зголемување на продажбата на електрични возила во 2025 година бидејќи владините субвенции и регулативите се недоволни за да се решат овие проблеми. Понатамошните регулаторни промени или одложувања веројатно ќе имаат негативно влијание врз прифаќањето на електричните возила во Европа и САД, додека кинескиот пазар продолжува со стабилен раст“, се посочува во анализата на „Фич“.

Автомобилските гиганти се подготвуваат за уште една тешка година

„Блумберг Адрија“ пишуваше за тоа дека декември веќе се покажува како предвесник за масакрот што претстои во автомобилскиот сектор. „Стелантис“ го смени својот главен извршен директор Карлос Таварес, а „Фолксваген“ изброја речиси 100.000 работници кои ги напуштаат фабриките поради плановите за досега невидени кратење, со цел да го направат производителот на автомобили конкурентен. „Форд“ (Ford Motor Co.) планира до крајот на 2027 година да намали околу 14 проценти од својата европска работна сила, првенствено во Германија и Велика Британија, додека германските производители на луксузни автомобили „Мерцедес“ (Mercedes-Benz Group AG) и „Порше“ (Porsche AG) се обидуваат да ги намалат трошоците.

Bloomberg Mercury

 

„Индустријата се соочува со речиси совршена бура. Притисокот на цените, загубите на пазарниот удел во Кина, построгите регулативи за ЦO2, ризикот од тарифи и континуираната слаба побарувачка веројатно дополнително ќе ги намалат приходите во секторот и покрај интензивирањето на напорите за реструктуирање“, велат аналитичарите на групацијата УБС (UBS Group AG), предводени од Патрик Хумел.

Не страдаат само автомобилските гиганти, туку и сите помали добавувачи, вклучително и македонските

Нашиот медиум постојано ја анализира состојбата со автомобилската индустрија, особено зашто се работи за сектор на кој што Македонија има значителна изложеност бидејќи земјава има повеќе фабрики кои испорачуваат автокомпоненти за големите европски производители на возила. Германија е најголемиот македонски трговски партнер, а над 40 отсто од извозот кон најголемата европска економска сила отпаѓа токму на автомобилските делови и компоненти што се произведуваат во домашните технолошки зони и надвор од нив. Менаџерите велат дека нарачките се многу намалени, кај некои дури и до 30 проценти.

Ваквите информации ги поткрепуваат и официјалните бројки на Државниот завод за статистика, според кои извозот од Македонија во Германија во периодот од јануари до октомври е намален за 13,5 проценти во споредба со истиот период лани. Или, во апсолутна бројка тоа изнесува пад на извозот од дури 351,4 милиони евра.
Супституцијата на постојните клиенти со нови е многу тешка во автомобилската индустрија и транзицијата трае од една до три години, велат познавачите на состојбите, според кои прв чекор е неизбежното намалување на трошоците. Потоа се преминува кон барање нови клиенти, други пазари, конкретно во Азија и евентуално партнерство/интеграција со некој од значајните кинески производители, актуелни конкуренти на европските.

 

Во моментов нема коментари за веста. Биди прв да коментира...

Остави коментар