.webp){kind=icon}
Потрошувачите од двете страни на Атлантикот се оптоварени од тежината на големите покачувања на цените на основните артикли. Но, и покрај поскапувањата, Медитеранот сè уште е место за отмени одмори.
Многу Британци од минатата недела заминаа на скијање или на посончеви места поради почетокот на полугодишниот училиштен распуст. Тоа е одлична вест за намачената туристичка индустрија, а помалку за локалните продавници и ресторани, кои се натпреваруваат за секое евро. Пандемијата ги „покоси“ авиокомпаниите, хотелите и туристичките агенции, но бидејќи ограничувањата се олеснија, побарувачката за патувања и цените се зголемуваат.
ТУИ (TUI), најголемиот организатор на пакет аранжмани во светот, во вторникот соопшти дека резервациите за летово се за 20 отсто повисоки од пред една година, а последниот месец се зголемени за 50 отсто во споредба со лани и за десет отсто од пред пандемијата. Цените, без повторните резервации за 2022 година, се зголемени за шест отсто во споредба со минатата година. Сепак, резервациите за летната сезона сè уште се за 11 отсто пониски од 2019 година. Има уште време да се надомести недостигот, и покрај тоа што цените се зголемија за 24 отсто.
Bloomberg
Ова ажурирање за секторот патувања дојде откако авиокомпаниите „Изи џет“ (EasyJet) и „Рајанер“ (Ryanair) објавија оптимистички деловни прогнози. Во понеделникот лондонскиот аеродром „Хитроу“ објави дека го имал најпрометниот почеток на годината од 2020-та. Хотелите исто така имаат полза од овој момент, а „Хилтон“ и „Мериот“ неодамна објавија подобри резултати од очекуваните во последниот квартал од минатата година. Резервациите за краткорочно сместување во Европа за датумите меѓу февруари и јули се за 24,4 отсто повисоки отколку во 2022 година и за 32,6 отсто повисоки од 2019 година, покажуваат податоците на „Ер ди-ен-еј“ (AirDNA), која го следи пазарот.
Почетните добри резултати се добра увертира за летната сезона, кога туроператорите и авиокомпаниите го прават најголемиот дел од својот профит. Повисоките цени на билетите и собите исто така значат дека компаниите лесно ќе ги покријат своите зголемени трошоци, вклучувајќи ги трошоците за гориво и работна сила. И покрај притисоците врз семејните буџети, при што и побогатите домаќинства внимаваат на трошоците, се чини дека одморот останува приоритет, дури и во Британија, која особено се бори со зголемената криза на трошоците за живот.
Се разбира, постојат ризици. Првиот секако зависи од трошењата за патување, бидејќи откако туристите ќе ја задоволат својата почетна желба за патување, можеби потоа ќе трошат помалку на тоа. Иако просечната потрошувачка сè уште е во пораст, во „Томас Кук“ (Thomas Cook) веќе гледаат знаци на тој тренд.
Bloomberg
На пример, околу 80 отсто од нивниот бизнис се одвива во хотели со четири и пет ѕвезди. Сепак, годинава најголем дел резервации се за сместување со четири ѕвездички. Евидентиран е и раст на побарувачката за градски одмор од четири до пет ноќевања. Тоа можеби се дополнителни одмори, но можеби се и замена за поскапите седумдневни одмори во луксузните одморалишта. Патниците почнале да бараат и подостапни места, како што е Ланзароте на Канарските Острови, кое обично е поевтино од блиското Тенерифе, а се зголемува и продажбата на пакети за Египет и Мароко.
Слична слика има и кај „Триваго“ (Trivago). Од компанија специјализирана за онлајн резервации за сместување неодамна објавија дека забележале оти туристите претпочитаат подостапни хотели и пократки патувања и дека, генерално кажано, наоѓаат поинтересни опции со поволни цени отколку што беше случајот во 2019 година.
ТУИ укажува дека продолжува минатогодишниот тренд на додавање уште еден ден за одмор. Сепак, купувачите со ограничен буџет ги претпочитаат Медитеранот или Египет пред далечните дестинации, каде што цените најмногу се зголемија.
Друг ризик за патувањата е тоа што голем дел потенцијални туристи сè уште се сеќаваат на жештините што ја зафатија Европа минатата година, па размислуваат двапати пред да се одлучат за летно патување. Зошто да патувате на далечна плажа кога, наместо тоа, можете да возите неколку часа од дома? Ако на тоа се додадат и проблемите околу одложувањата и откажувањата на летовите, таков тип одмор би можел да биде уште понепривлечен.
Патниците сè повеќе резервираат како што се приближува посакуваното време на патување. Но се чини и дека многумина ги одложуваат своите резервации за да се приспособат, на пример, на ненадеен пораст на трошоците за хипотека или на неочекувано губење на работната позиција.
Bloomberg
Но овие грижи и ризици би можеле да бидат краткотрајни. Од двете страни на Атлантикот има индиции дека инфлацијата е на својот врв. Ако продолжи тоа и платите продолжат да растат, а вработувањето остане силно, апетитот за патување треба да продолжи или дури и да се зголеми.
Всушност, од „Дестинејшн аналистс“ (Destination Analysts), кои ги следат трендовите на патувањето во САД, открија дека возбудата на Американците за одмор е на највисоко ниво во последните три години. „Сè помалку Американци се грижат за високата цена на патувањето и инфлацијата“, се вели во анализата.
Ова сугерира дека секој дополнителен приход може да се претвори во одмор. Но за пошироката потрошувачка економија, тоа е и благослов и проклетство. Додека патувањето поттикнува трошење за ново бикини или крем за сончање, исто така ги апсорбира парите што инаку би биле потрошени на автомобил, софа или реновирање на домот.
