Потрошувачката ќе го турка нагоре македонскиот БДП

Растот на БДП од 1,2 проценти во првиот квартал на 2024 година беше главно поттикнат од потрошувачката. Потрошувачката на домаќинствата продолжи да расте (+2 проценти на годишно ниво), но со малку пониска стапка во споредба со последните три квартали од 2023 година, кога порасна за околу три проценти. Ако се има предвид дека инфлацијата во Северна Македонија значително се смири, како и дека платите продолжуваат да растат, очекуваме дека потрошувачката ќе продолжи да биде главната ставка што ќе го одредува движењето на БДП.

Инвестициите, кои ги вклучуваат залихите, се зголемија за 23,6 проценти на годишно ниво, што укажува на закрепнување од претходната година (-22,3 проценти во првиот квартал на 2023 година), а може делумно да биде последица на промените во залихите, но секако и на инвестициите (според високофреквентни податоци, градежната активност во областа на инфраструктурата на годишно ниво е за околу 30 проценти повисока во првиот квартал од 2024 година, во реални услови). Слаба точка останува странската побарувачка, бидејќи извозот падна за 7,8 проценти, но враќањето на увозот во позитивната зона од 0,2 проценти на годишно ниво (по падот во 2023 година), укажува дека постои потенцијал за закрепнување на извозната страна. Особено ако се има предвид дека во 2023 година странските директни инвестиции беа значителни (617 милиони евра), во првиот квартал на 2024 година тие дури се зголемија (290 милиони евра, +86 проценти на годишно ниво) и дека се очекуваат нивните позитивни ефекти врз извозот.

Очекуваме подобри резултати во наредните периоди. Потрошувачката ќе продолжи да биде главна компонента на БДП, поттикната во голема мера од зголемувањето на платите (11,5 проценти во реални услови во март 2024 година) што ќе овозможи понатамошен раст на потрошувачката. Како што одминува годината, очекуваме да закрепне и извозната страна, под влијание на подобрата странска побарувачка и да придонесе за побрз раст на БДП оваа година во однос на претходната.

 

Во моментов нема коментари за веста. Биди прв да коментира...

Остави коментар