ББА-коментар: Фед ќе ја намали референтната камата за 25 базични поени

Неделава Фед ќе почне да ја менува својата монетарна политика и ќе ја намали референтната каматна стапка за 25 базични поени. Иако пазарите се дури малку пооптимистички и бележат поголем рез, сепак сметаме дека е оптимално да се започне со 25 базични поени и потоа да го видиме натамошниот развој на инфлацијата и на пазарот на трудот.

Американската економија успева да издржи различни геополитички спорови, додека пазарот на трудот е сè уште доста силен, со постепен пад на новоотворените работни места, што му дава простор на Фед да почне да ги намалува каматните стапки за да не ја задуши економијата. Исто така, еден од водечките показатели што ги следиме е и бројот на продадени тешки возила, кој е помал за шест проценти во првите осум месеци од годинава во однос на лани, што укажува на забавување на прометот на стоки односно на послаба крајна побарувачка на населението.

Во пресрет на намалувањето, 30-годишната каматна стапка на станбените кредити падна на 6,2 проценти, што е најниско ниво од почетокот на 2023 година и за 1,6 процентни поени пониска од врвот.

Во преостанатиот дел од годината очекуваме слична насока со оглед на тоа што сметаме дека Фед ќе продолжи со политиката на намалување на каматната стапка уште за најмалку 50 базични поени до крајот на годината. Се разбира, одлуките ќе продолжат да се водат врз основа на новите податоци, но во моментов тие укажуваат на насока на монетарно олеснување. Падот на каматната стапка треба да се прелее и на каматните стапки за населението и фирмите, со што ќе се ослободи дел од расположливиот доход, но и ќе се стабилизира пазарот на недвижности, кој е најпогоден од високите каматни стапки.

 

Во моментов нема коментари за веста. Биди прв да коментира...

Остави коментар