Берзански преглед: Нафтата со најголем пад во шест години, индексите растат

Нафтата падна најмногу во речиси шест години, а акциите нагло пораснаа откако САД и Иран се согласија на двонеделно примирје, давајќи им на пазарите одмор од турбуленциите предизвикани од конфликтот на Блискиот Исток.

Американската нафта падна за 19 отсто откако претседателот Доналд Трамп се согласи да го суспендира бомбардирањето на Иран, потег кој ќе помогне да се обнови протокот на нафта низ Ормускиот Теснец. Иран соопшти дека безбеден премин низ водниот пат ќе биде можен во тој период. Брент нафтата се намали за 13 отсто, на 94,50 долари за барел.

Bloomberg Mercury

MSCI индексот за акции во Азија-Пацифик скокна за 5 отсто на највисоко ниво во пет недели, бидејќи трговците веруваат дека пониските цени на нафтата ќе помогнат да се задржи инфлацијата и да се одржи економскиот раст. Фјучерсите на индексите на Волстрит пораснаа за повеќе од 2,5 отсто, а европските договори скокнаа за 5,3 отсто. Американските државни обврзници зајакнаа, бидејќи намалените ценовни притисоци ги охрабрија трговците повторно да се обложуваат на намалување на каматните стапки од Федералните резерви. Индексот на доларот, кој се појави како засолниште за време на конфликтот, падна за 0,8 отсто, додека златото порасна.

Предлогот за примирје - објавен само неколку часа пред рокот на Трамп за ескалација на бомбардирањето врз Иран - ја оживува инвеститорската доверба по турбуленциите кои ги намалија акциите и ги турнаа неколку индексите во корективна територија од почетокот на војната на Блискиот Исток пред шест недели. За олеснувањето  да се задржи, трговците ќе бараат потврда дека примирјето ќе трае и дека протокот на енергија низ Ормускиот Теснец ќе се нормализира, велат аналитичарите.

„За сега, ова е олеснување за пазарите - работите се смирија,“ рече Хиројуки Уено, главен стратег во „Сумитомо асет менаџмент“ во Токио. „Но, не е загарантирано дека сè ќе оди мазно, и инвеститорите не треба да се тркаат.“

Трамп го објави договорот неколку часа откако Пакистан, посредник во преговорите, го замоли американскиот лидер да се откаже од рокот за масовно уништување на Иран. Договорот купува време за двете страни да постигнат подолгорочен договор за завршување на војната, која уби илјадници луѓе и предизвика глобална енергетска криза.

Одлуката на Трамп претставува драматично повлекување од борбената објава на социјалните мрежи порано во вторникот, во која предупреди: „Цела цивилизација ќе умре вечерва, никогаш повеќе да не се врати“ ако Иран не попушти.

„Ова е добар резултат со оглед на алтернативите, бидејќи покажува подготвеност да се постигне нешто,“ рече Метју Хаупт, менаџер на фонд во„Вилсон менамџмент“ во Сиднеј. „Исто така покажува ветувачки знаци дека го избегнавме најлошото сценарио.“

 

„Перспективата зависи од тоа дали примирјето ќе се одржи, а во моментов имам мала доверба дека ќе трае,“ рече Нил Њуман, шеф на стратегија во „Астрис адвејсори“. „Затоа го гледам ова како многу кревко олеснување. Би препорачал да се искористи нестабилноиста за излез од неуспешни акции и стратешко градење позиции.“

Клучен тест за инвеститорите ќе биде дали протокот на нафта и гас низ Ормускиот Теснец ќе остане непрекинат. Безбеден премин низ водниот пат ќе биде можен преку координација со вооружените сили на Иран и со „соодветно разгледување на техничките ограничувања,“ изјави иранскиот министер за надворешни работи Абас Арагчи во објава на X.

Сопствениците на бродови се обидуваат да ги разберат деталите за примирјето, надевајќи се дека ќе искористат потенцијален прозорец за извлекување на повеќе од 800 пловни објекти заглавени во Персискиот Залив.

 

 

Во меѓувреме, златото скокна за 2 отсто на околу 4.800 долари за унца. Среброто се зголеми за 4,5 отсто на над 76 долари за унца.

Трошокот за осигурување на азиските инвестиции со висок кредитен рејтинг против банкрот падна за најмалку шест базични поени, велат трговците, додека кинескиот јуан достигна највисоко ниво во три години.

Веројатноста за намалување на каматните стапки од Фед до крајот на годината изнесува околу 60 отсти, во споредба со речиси никаква шанса на почетокот од оваа недела. Пред нападите на САД и Израел врз Иран кон крајот на февруари, тие веќе беа пресметале повеќе од две намалувања.

Bloomberg Mercury