Акциите паѓаат како што ФЕД алармира за повисоки каматни стапки

Американските индекси ги намалија загубите додека претставниците на Федералните резерви (ФЕД) дебатираа за темпото на затегнување на монетарната политика, потребно за враќање на инфлацијата до нивната цел од два отсто.

Трговците целосно го прифатија зголемувањето на каматните стапки за четвртина поен на следните два состанока на ФЕД, откако креаторите на политиката во четвртокот рекоа дека поголеми зголемувања не се за отфрлање.

Движење на индексот S&P 500 / Bloomberg Mercury

 

Индексот S&P 500 падна за 0,5 проценти, упатувајќи се кон втор по ред неделен пад. Технолошкиот индекс Nasdaq 100 загуби еден отсто од вредноста, а Dow Jones Industrial Average порасна за 0,2 процента. Референтните приноси на обврзниците се намалија, со што се поништи претходниот раст.

Претседателот на ФЕД Ричмонд, Томас Баркин, денеска изјави дека се залага за зголемување на каматните стапки за четвртина поен во февруари, за да ѝ се даде на централната банка флексибилност во нејзината борба да ја намали инфлацијата. Гувернерката на ФЕД, Мишел Бауман, рече дека стапките треба да продолжат да одат нагоре, бидејќи инфлацијата останува премногу висока. Во текот на вчерашниот ден, пак, двајца од најјастребовски расположените функционери на ФЕД, Лорета Местер и Џејмс Булард, се изјаснија за зголемување на каматите од 50 базични поени.

„Ако инвеститорите навистина конечно почнат да му веруваат на ФЕД во врска со нивното тврдење дека стапките ќе останат подолго високи, може да очекуваме значителен пад во неделите што претстојат. Со скапиот пазар на акции, промената во размислувањето на инвеститорите за прашањата на каматните стапки и ликвидноста е опасна комбинација“, напиша Мет Мејли, главен пазарен стратег во „Милер табак“ (Miller Tabak + Co).

Инвеститорите ги зголемуваат облозите за тоа колку ФЕД ќе ги зголеми стапките во овој циклус на заострувања. Тие сега гледаат како стапката на федералните фондови се искачува на речиси 5,3 проценти во јули, според тргувањето на американските пазари на пари.

Обемот на тргување денеска остана нешто под индексните 30-дневни просеци.

Стратезите на Бенк оф Америка - БоА (Bank of America Corp) напишаа дека одложеното доаѓање на рецесијата ќе влијае на американските акции во втората половина од годината, истакнувајќи дека отпорната економија досега значи дека каматните стапки ќе останат повисоки подолго време. Тимот на БоА, предводен од Мајкл Хартнет, е меѓу оние што предвидуваат сценарио познато како „неприземјување“ во првата половина, каде што економскиот раст ќе остане стабилен, а централните банки веројатно ќе останат со високи камати подолго време. „Веројатно ќе следува тврдо слетување“ во вториот дел од 2023 година, напишаа тие.

Биткоинот се повлече по тридневните добивки откако американската Комисија за хартии од вредност ги обвини „Ду квон“ (Do Kwon) и „Тераформ“ (Terraform Labs Pte) за измама поради бришењето на дигиталните валути што ги создале.

Кај суровините, нафтата се упати кон својата најдолга низа дневни загуби во годината, бидејќи зголемените резерви во САД и изгледите за натамошно затегнување од страна на Федералните резерви го засенија зголемувањето од повеќе знаци дека кинеската побарувачка за енергија се подобрува.

Во моментов нема коментари за веста. Биди прв да коментира...

Остави коментар