Берзите во светот утрово бројат добивки

Мерачот на азиските акции се упати кон својата втора последователна неделна добивка, поттикната од оптимизмот за потенцијални економски стимулации во Кина и влегувањето на индексот S&P 500 во биковски пазар.

Имено, индексот S&P 500 утрово порасна за 0,3 проценти, а технолошкиот Nasdaq 100 за дури 1,3 отсто. Фјучерсите во рамки на европскиот индекс се зголемија за 0,2 отсто. Тргувањето во Азија главно се одвива во позитивната зона на добивки, со што тамошните индекси бележат раст некаде и до дури 1,4 проценти.

Акциите во континентална Кина и Хонгконг се тргуваа во тесен опсег бидејќи падот на кинеските производствени цени и благата инфлација на потрошувачките цени ги зајакнаа шпекулациите дека владата ќе мора да стори повеќе за да ја поддржи економијата. Јапонските акции забележаа дводневен пад, додека тие во Австралија забележаа напредок за прв пат во последните четири дена. Јужнокорејските акции, пак, се упатија кон највисокото затворање од јуни минатата година.

„Треба да се види многу повисока стапка на раст во Кина во однос на САД за оправдано да се вратите во Кина со оглед на геополитичките ризици и недостатокот на политички стимулации“, рече Томас Тау, раководител за инвестициски стратегии на „Блекрок“ (BlackRock) за Азија и Пацификот, во интервју за телевизијата „Блумберг“.

Барањата за невработени во САД скокнаа на највисоко ниво од октомври 2021 година, што сугерира дека пазарот на трудот почнува да се лади, а тоа помогна да се поттикнат технолошките акции. Тие се соочија со спротивставени ветрови од шпекулациите дека Федералните резерви (ФЕД) ќе ги задржат каматните стапки повисоки подолго време.

Среде лудилото на акциите поврзани со вештачката интелигенција, меѓу најголемите добитници се „Енвидија“ (Nvidia Corp.) и „Адвансд микро дивајсис“ (Advanced Micro Devices Inc).

Изгледи за ФЕД

Инвеститорите ја преоценуваат траекторијата на политиката на ФЕД откако централните банки во Австралија и Канада оваа недела неочекувано ги зголемија каматните стапки. Трговците во средата целосно пресметаа уште едно покачување на каматите од страна на ФЕД до јули. Сепак, Кришна Гуха од „Евркор“ (Evercore ISI) рече дека пазарните движења врз основа на тие активности на централната банка треба да избледат.

„ФЕД се тие што ги одредуваат цените овде, другите се оние што ги прифаќаат тие цени и ние не треба да ги мешаме овие две работи. А, тие ги зголемуваат стапките делумно затоа што мислат дека ФЕД ќе се зголеми уште еднаш и ако не успеат да се совпаднат со ова, ризикуваат депрецијација на девизниот курс“, рече Гуха.

Останати пазари

Еврото сосема малку се промени во однос на американскиот долар, па овие валути се тргуваат по курс од 1,0779 долари за евро.

Турската лира ослабе откако претседателот на земјата Реџеп Таип Ердоган ја именуваше Хафизе Гаје Еркан, поранешнa извршнa директорка на „Голдман сакс“ (Goldman Sachs Group Inc) и „Фрст рипаблик банк“ (First Republic Bank) за нов гувернер на централната банка. Постојат индикации дека новиот економски тим ја напушта скапата стратегија за интервенции како дел од очекуваниот пресврт кон поконвенционални политики.

Индексот на стоки на „Блумберг“ се упати кон својот прв неделен напредок од април, бидејќи добивките кај златото и железната руда помогнаа да се компензира вториот седмичен пад на нафтата.

На криптопазарот сликата е малку поразлична од позитивата што владее на пазарот на капитал. Најголемиот токен, биткоинот, падна за 0,6 проценти, на 26.497,75 долари, додека етерот загуби дури 0,8 отсто од својата вредност, паѓајќи на 1.838,25 долари.

Во моментов нема коментари за веста. Биди прв да коментира...

Остави коментар