Јапонскиот индекс е на тридецениски максимум поради добриот раст на БДП

Јапонските акции ја продолжија својата победничка серија, бидејќи подобриот од очекувањата економски раст поттикна оптимизам за изгледите на пазарот. Индексот Topix напредува четврти ден, откако вчера се затвори на највисоко ниво од 1990 година. Тамошната влада денеска соопшти дека бруто-домашниот производ (БДП) се проширил со најбрзо темпо во три квартали, бидејќи дополнителното олеснување на регулативите за пандемијата ја зголемило потрошувачката.

 

 

Инаку, индексот S&P 500 утрово падна за 0,6 проценти, а технолошкиот Nasdaq 100 порасна за 0,1 отсто. Азиските берзански индекси главно се во минус од 0,2 до 0,5 проценти, освен јапонскиот, кој денеска се зголеми за 0,3 отсто.

Мноштвото податоци од Кина, кои се послаби од очекуваното, почнувајќи од индустриското производство, па до продажбата на мало и цените на куќите, ја зголемија загриженоста за силата на закрепнувањето во втората по големина светска економија и поттикнаа повици за дополнителни политички стимулации за зајакнување на растот.

„Во моментов кога разговараме со инвеститори, расположението е всушност доста слабо. Се надеваме дека кинеските централни банки или всушност властите би можеле да се променат од расположение на чекање и гледање кон малку проактивно дејствување“, рече Марсела Чоу, стратег на глобалниот пазар во „ЏП Морган асет“ (JPMorgan Asset Management), во разговор за телевизијата „Блумберг“.

Претседателот на САД, Џо Бајден, и претседателот на Претставничкиот дом, Кевин Мекарти, се полни со надежи кога станува збор за прашањето дали може да се постигне договор за максималната граница на долгот во рок од неколку дена за да му се стави крај на ќор-сокакот пред потенцијалната опасност за неисполнување на обврските на земјата.

На другите пазари, вредноста на еврото е сосема малку променета во однос на американскиот долар и валутите се тргуваат по курс од 1,0864 долар за евро. Цената на златото се покачи за 0,1 отсто, на 1.991,35 долари за унца.

Раст има и кога станува збор за криптовалутите. Имено, биткоинот порасна за 0,5 проценти, на 27.079,26 долари, а етерот за 0,2 отсто, на 1.824,81 долар.

Во моментов нема коментари за веста. Биди прв да коментира...

Остави коментар