Инвеститорите се држат до златото додека се чека крај на растот на каматите

Златото не станува помалку привлечно за оние кои вложуваат, според десетина инвеститори кои му рекоа на „Блумберг“ дека или ќе ги задржат или ќе ги зајакнат своите позиции во следните 12 месеци.

Цената на благородниот метал падна во последните недели бидејќи повеќе работи не одат како што треба. Порастот на реалните приноси на обврзниците, посилниот долар, како и шансите Фед подолго време да ги остави каматните стапки на високо ниво, се само дел од причините за пониската цена. Анкетата спроведена меѓу инвеститорите (од државни инвестициски фондови до хеџ-фондови) покажува дека сè уште постои оптимизам на пазарот во однос на цените во 2024 година.

Ниту еден од испитаниците не рече дека ќе ја намали својата изложеност на злато во следните 12 месеци, а петмина рекоа дека имаат намера да ги зголемат своите влогови. Повеќе од две третини од нив очекуваат раст на цените, а петмина очекуваат и нов рекорд. Истражувањето е спроведено во периодот од 10 до 22 август.

Сè уште постои неизвесност кога Федералните резерви ќе го прекинат циклусот на затегнување на монетарната политика, што би придонело за раст на вредноста на златото, кое по природа не носи камата. Светските централни банки продолжуваат да се борат со тврдоглавата инфлација, а американскиот пазар на труд остана изненадувачки отпорен наспроти агресивното монетарно затегнување.

Иако има некои знаци дека инвеститорите се подготвуваат стапките да останат високи подолго време, пазарот на свопови продолжува да покажува дека инвеститорите не очекуваат понатамошни зголемувања на трошоците за задолжување и дека сметаат дека каматните стапки ќе почнат да паѓаат следната година.

„Сметаме дека има голем број инвеститори кои се подготвени да инвестираат во злато кога ќе видат дека Фед го завршува циклусот“, рече Дарвеј Кунг, портфолио менаџер во ДВС (DWS Group). „Тоа е позитивна работа од наша перспектива“, додаде тој. Очекува златото да достигне рекордни 2.250 долари за унца кога тоа ќе се случи.

Златото во моментов е блиску до 1.900 долари за унца, што е околу осум отсто помалку од овогодинешниот врв. Цената на металот достигна рекордно високо ниво во август 2020 година (околу 2.075 долари), кога бевме во средината на ковид-пандемијата.

Треба да се спомене дека економистите стануваат сè посигурни дека американската економија може да постигне меко приземјување, што не беше случај на почетокот на годинава кога се очекуваше остар пад.

Сигурна инвестиција

Дека се очекува повисока цена на златото покажува и друго истражување. Златото ќе се тргува по просечна цена од 2.021 долар за унца во следните 12 месеци, според медијаната на истражувањето во кое читателите дадоа проекции за цената на благородниот метал (вкупно 602).

Апетитот за злато укажува на загриженост околу геополитичките тензии и макроекономските несигурности - на пример, зголемените тензии меѓу САД и Кина, војната во Украина или кинеската криза со недвижностите. Други позитивни фактори за златото се континуираното купување од страна на глобалните централни банки и релативно силната побарувачка на мало на пазарите во развој.

Исто така, прекинот на корелацијата помеѓу акциите и обврзниците, врз основа на која претходно беше воспоставена познатата инвестициска тактика „60/40“, доведе до тоа златото да се гледа како средство за диверзификација на портфолиото, според Светскиот совет за злато (WGC).

„Луѓето бараат работи што навистина се движат поинаку, а златото е една од тие инвестициски класи“, рече шефот за институционални инвеститорски односи на WGO за Азија (со исклучок на Кина), Џаспар Кроули, на панел во Сиднеј. „Диверзификацијата сега стана главна преокупација“, додаде тој.