Нафтата се спушти под 100 долари, берзите здивнаа

Американските берзи забележаа умерено закрепнување по најголемиот месечен пад, откако намалувањето на цената на нафтата и стабилизирањето на приносите на обврзниците донесоа извесно олеснување кај инвеститорите. Фјучерсите на индексот S&P 500 пораснаа за 0,2 проценти, но главниот берзански показател и понатаму е на пат да ја забележи првата последователна неделна загуба од почетокот на војната на Блискиот Исток.

Цената на нафтата брент се повлече на околу 98 долари за барел, откако претходно го надмина нивото од 100 долари, додека приносите на американските државни обврзници се намалија од највисоките нивоа оваа година. Доларот ослабе за 0,1 процент, а златото забележа умерен раст.

Сепак, расположението на пазарите останува претпазливо поради комбинацијата од геополитички ризици и нови сомнежи околу огромните инвестиции во вештачката интелигенција (ВИ). Ескалацијата на конфликтот на Блискиот Исток повторно ги зголеми стравувањата за глобалниот економски раст, додека инвеститорите сè почесто се прашуваат дали милијардите долари вложени во ВИ-инфраструктура ќе донесат доволен поврат.

„Следната недела ќе биде навистина голема и може да биде пресудна за тоа каде ќе се движат пазарите понатаму“, изјави Мајкл Хјусон, главен пазарен аналитичар во „Ајфорекс“ (iForex). Според него, расте нервозата околу капиталните трошоци, особено кај компаниите поврзани со вештачката интелигенција и прашањето колкав ќе биде повратот на тие вложувања.

Посебно внимание ќе биде насочено кон претстојните квартални резултати на големите технолошки компании што се меѓу најголемите инвеститори во ВИ, како и кон одлуките на централните банки. Токму овие фактори би можеле да одредат дали неодамнешниот пад на акциите ќе биде само краткорочна корекција или почеток на поголема промена во расположението на инвеститорите.

На Волстрит, акциите на „Интел“ забележаа раст по оптимистичката прогноза за приходите, но повеќето производители на чипови се движеа надолу во претпазарното тргување. „Алфабет“ и „Тесла“, кои во четвртокот претрпеа силни загуби, забележаа благо закрепнување.

И европските берзи се стабилизираа. Индексот Stoxx 600 порасна за 0,4 проценти, предводен од растот на софтверските компании откако германскиот технолошки гигант САП (SAP) објави подобри резултати во сегментот на услуги во облак, во споредба со она што претходно се очекуваше. Европските обврзници исто така забележаа умерено закрепнување по неколкудневните загуби.

Дополнителен поттик за пазарите дадоа податоците за подобрувањето на активноста во приватниот сектор во еврозоната и Велика Британија во јули. Сепак, аналитичарите предупредуваат дека новото заострување на тензиите на Блискиот Исток може повторно да го наруши оптимизмот.

„Доколку не беше повторното разгорување на конфликтот на Блискиот Исток, сликата ќе изгледаше охрабрувачки“, напиша економистот на ИНГ (ING) Берт Колин. Според него, враќањето на неизвесноста може повторно да ги засили благите стагфлациски притисоци врз економијата на еврозоната во текот на летото.

Некои од аналитичарите сметаат дека берзите во моментов се премногу оптимистички поставени и дека не ги земаат доволно предвид растечките ризици. Себастијан Радлер, шеф за европска стратегија за акции во Банката на Америка (Bank of America), предупреди дека инвеститорите веќе пресметуваат сценарио во кое „сè оди совршено“, што значи дека не се доволно компензирани за ризиците што се зголемуваат.

Во своето основно сценарио Радлер очекува пад на акциите од околу 7-8 проценти. Како главни ризици тој ги посочи војната на Блискиот Исток и огромниот инвестициски циклус поврзан со вештачката интелигенција, кој според него има „многу пукнатини“.

„Пазарот е премногу самоуверен“, изјави Карен Жорж, менаџерка на акциски фонд во „Екофи“ (Ecofi) во Париз. Таа смета дека поради слабата видливост инвеститорите најверојатно ќе чекаат енергетските трошоци да почнат посилно да влијаат врз профитните маржи на најизложените компании пред да преземат конкретни чекори.