.webp){kind=icon}
Индексите на Волстрит постигнаа убедлив раст во тргувањето во средата, а технолошкиот индекс Nasdaq скокна на највисоко ниво во последните три месеци, сето тоа поттикнато од добрите вести од макроекономскиот сектор и добрите резултати на компаниите, како и намалувањето на тензијата предизвикана од овонеделната ситуација околу Тајван.
Nasdaq го заврши денот за 2,59 отсто посилен, Dow Jones порасна за 1,29 отсто, а S&P 500 за 1,56 отсто.
Растот на нарачките во индустријата укажува дека американската економија и покрај активностите на ФЕД во борбата против инфлацијата и падот на бруто домашниот производ во првите два квартала, не е во толку лоша состојба.
Дури 75 отсто од американските компании во последниот квартал имале подобри резултати од прогнозите.
Од јуни, глобалните цени на акциите пораснаа за околу 10 отсто, што го ублажи падот забележан од почетокот на годината на околу 15 отсто.
„Нестабилноста е сè уште тука, ни претстојат уште многу податоци и уште има прашања кои треба да се одговорат“, рече Ен Милети од Allspring Global Investments.
Азиските акции исто така пораснаа во четвртокот, при што Alibaba Group го предводи растот кај кинеските технолошки компании.
Добрите резултати од бизнис секторот во средата ги издигнаа и индексите на европските берзи.
