Преглед на пазарите: Берзанска забава, рекордни достигнувања и златна треска

Минатата недела податоците за инфлацијата ги објавија САД, Обединетото Кралство и некои членки на Европската унија и еврозоната. Изданијата беа проследени со радост на берзите на двете страни на Атлантикот, бидејќи аналитичарите очекуваа попесимистички макроекономски бројки. 

Во САД, декемвриската инфлација беше пониска од очекуваното и изнесуваше 2,9 отсто, откако неколкумесечните порасти на потрошувачките цени ја убедија американската централна банка да објави пауза во намалувањето на каматните стапки. 

„Ова е добра вест за Банката на федерални резерви, но со оглед на силата на пазарот на трудот, тешко е да се очекува намалувањето на каматните стапки да се врати во игра“, напиша сениор уредникот на „Блумберг“, Крис Енстеј.

Индексите на Њујоршката берза станаа зелени по најавите. Инвеститорите ги поздравија податоците на американското Министерство за труд за декемвриската инфлација во САД и извештаите за профитот на големите банки.

Dow Jones Industrial Average зајакна 1,65 отсто, S&P 500 порасна за 1,83 отсто, а Nasdaq Composite за 2,45 отсто, што го означи најдобриот ден за сите три главни американски индекси од 6 ноември минатата година, според Си-Ен-Би-Си (CNBC).

На неделна основа најмногу доби индустрискиот индекс Dow Jones (1,2 отсто), следен од S&P (0,3 отсто), а технолошкиот индекс Nasdaq неделата ја заврши во црвено (-0,7 отсто).

Bloomberg Adria

Беше црвено во земјата на изгрејсонцето, каде што јапонскиот репер индекс Nikkei падна за 2,6 отсто. Работите беа подобри на стариот континент, каде што STOXX 600 (плус 0,8 отсто) и германскиот Dax (плус 1,7 отсто) завршија во зелено.

Олеснување се почувствува и на островот, каде Канцеларијата за национална статистика во средата соопшти дека инфлацијата во Обединетото Кралство во декември паднала на 2,5 отсто, што е пониско од очекуваното. Најавата ги смири пазарите на обврзници по вриењето на почетокот на јануари. Британскиот FTSE индекс порасна како одговор на податоците.

Nina Westervelt/Bloomberg

Добро е да се биде банка: рекордни перформанси за американските банки во 2024 година

Минатата недела беше голема за големите банки во САД. Петте најголеми американски банки се очекува да ја завршат 2024 година со комбинирано зголемување од 15 отсто во приходите од тргување на околу 24,5 милијарди долари, што е највисок четврти квартал во најмалку пет години, според „Блумберг“.

Одличните деловни резултати на банките беа поттикнати од силната побарувачка од инвеститорите кои се обложуваа на влијанието на ноемвриските избори во Соединетите држави и на идната администрација на Доналд Трамп, која официјално ќе ја преземе функцијата во понеделник.

Ајде да погледнеме некои резултати:

• Најголемата светска банка по пазарна капитализација, „ЏП Морган Чејс“го забележа својот најголем профит досега во последниот квартал од 2024 година, потпомогнат од нестабилноста поврзана со ноемвриските избори во САД, пишува „Блумберг“.
• „Голдман Сакс“ ги надмина проценките на аналитичарите во четвртиот квартал од 2024 година, бидејќи трговците со акциите на компанијата ја објавија својата најдобра година досега, објави „Блумберг“. Профитот на компанијата се зголеми повеќе од двојно на 4,1 милијарди долари во последниот квартал.
• „Банката на Њујорк Мелон“ ги надмина очекувањата на аналитичарите во четвртиот квартал од 2024 година бидејќи повисоките каматни стапки ги зголемија маржите. Банката објави вкупен приход од 4,85 милијарди долари, што е за 11 отсто повеќе од пред една година и ги надмина прогнозите за приходи од 4,68 милијарди долари.
• „Велс Фарго“ резервира 647 милиони долари отпремнини во последниот квартал од 2024 година, бидејќи главниот извршен директор Чарли Шарф продолжува да го намалува бројот на вработени како дел од пошироките напори за намалување на трошоците и трансформација на банката, според „Блумберг“.

 

Повеќе за работењето на американските банки можете да прочитате овде.

Да ги погледнеме регионалните берзи. Сите берзански индекси во регионот Адриа, со исклучок на сараевскиот индекс SASE 10 и белградскиот BELEX15, забележаа раст минатата недела. Најголем раст забележа љубљанскиот SBITOP (4,9 отсто) и македонскиот MBI10 (2,9 отсто).

Bloomberg Adria

Македонија дебело се офајди од глобалната златна треска

Континуираниот раст на вредноста на златото во изминативе неколку години кулминира во текот на минатата година, а според првичните сигнали од првите две недели во 2025 година веројатно цената на скапоцениот метал ќе продолжи да се зголемува и во наредните месеци. Ваквите трендови позитивно влијаат врз македонските девизни резерви, од кои дел е пласиран во монетарно злато. Имено, од почетокот на 2019 година заклучно со минатата година вредноста на златните резерви на Македонија пораснала повеќе од двапати односно од 256 милиони евра на 554 милиони евра. 

Од НБРМ за „Блумберг Адрија“ откриja дека во изминатиов период има благо зголемување на количествата на златни резерви на Македонија, но растот на вредноста сепак најмногу се должи на поскапувањето на металот, а не на зголемувањето на количеството.

„Народната банка на Република Северна Македонија управува со околу 6,9 тони монетарно злато (односно 221.617 унци) и го одржува количеството на злато на релативно стабилно ниво од околу 10 проценти од девизните резерви, при што во изминатиот период количеството на златото се зголеми за 2.288 унци или за околу 70 килограми“, велат од Народната банка.

Bloomberg

„Најк“ во неволја: Дали е сега вистинското време за купување на акциите?

Го разгледавме и производителот на атлетска опрема и обувки „Најк“ (Nike), кој доживеал и подобри времиња. Акциите на компанијата со седиште во Орегон изгубија околу 30 отсто од својата вредност во изминатата година, при што дигиталната и директната продажба се намалија, а нејзините најблиски ривали, „Адидас“ и „Њу Баланс“, го пополнија просторот на полиците што „Најк“ непромислено го напушти.

Од 44 аналитичари на терминалот на „Блумберг“, 23 советуваат купување на акциите на „Најк“, 19 посочуваат на рејтинг-задржување, а само двајца имаат мислење за рејтинг-продажба. Акцијата последен пат се тргуваше по 72,08 долари, додека просечната проценка на аналитичарите за 12 месеци е 86,13 долари по акција. Акциите во моментов имаат потенцијален принос од 19,5 отсто, покажуваат најновите податоци на „Блумберг“.

Зошто расте цената на криптовалутата ХРП?

Ајде да скокнеме на крипто-пазарот, каде што криптовалутата ХРП, поточно нејзиниот издавач, американската компанија „Рипл“ (Ripple), се најде во центарот на правната битка на крипто индустријата со главниот финансиски регулатор во САД, Комисијата за хартии од вредност и берзи (SEC). Минатата недела истече рокот до кога Комисијата требаше да поднесе жалба на пресудата од 2023 година со која судијката од Њујорк, Аналиса Торес пресуди дека продажбата на ХРП токени од „Рипл“ на јавноста не претставува продажба на хартии од вредност.

Во меѓувреме, цената на ХРП расте. Порасна за повеќе од осум отсто за еден ден, а за дури 20 отсто за една недела. Пред една година, цената на ХРП беше околу 0,50 долари, додека сега се тргува со приближно 3 долари, шест пати повеќе.

Трамп планира криптовалутите да ги направи национален приоритет

Новиот американски претседател Трамп планира да издаде извршна наредба со што криптовалутите ќе бидат приоритет во неговите први денови на функцијата, со придонес кон индустријата, изјавија за „Блумберг“ луѓе запознаени со плановите. Извршната наредба ќе ги наведе криптовалутите како национална итност или приоритет - стратешка формулација што ќе ги насочи владините агенции да работат со индустријата - и исто така ќе формира советодавен совет за криптовалути кој ќе се залага за приоритетите на политиката на индустријата, според луѓе запознаени со ова прашање.

Најголемата и најстара криптовалута, биткоинот, се врати над границата од 100.000 долари по токен во средината на неделата, откако цената на дигиталната монета го загуби импулсот по лошата перспектива на Федералните резерви на САД во декември.