Преглед на пазарите: американските фјучерси надолу, доларот нагоре

Фјучерсите на американските берзански индекси се повлекоа по растот на S&P 500 доцна во понеделникот, додека инвеститорите чекаа вести за можни трговски разговори меѓу претседателот Доналд Трамп и кинескиот лидер Шји  Џјинпинг.

Договорите за S&P 500 и Nasdaq 100 паднаа за 0,3 отсто, додека оние за европските акции останаа речиси непроменети. Доларот зајакна во однос на сите валути од групата Г-10, при што индексот на Bloomberg за американската валута порасна за 0,2 отсто, откако во претходната сесија се приближи до најниското ниво од 2023 година. Азиските акции се движеа без големи промени, со берзата во Хонгконг која предничеше поради надежите за стимулативни мерки. Американските државни обврзници останаа стабилни, откако на аукција јапонските владини обврзници забележаа силна побарувачка.

И покрај високата нестабилност, пазарите се опоравија од априлските најниски нивоа, при што индексот на глобални акции се приближи до рекордно високо ниво. Инвеститорите внимателно го следат развојот на трговскиот спор меѓу Кина и САД, со фокус на тоа дали Трамп и Шји ќе одржат разговор со цел да ги намалат тензиите. Двете земји се обвинуваат меѓусебно за прекршување на трговскиот договор постигнат во мај.

„Пазарот покажува висока краткорочна нестабилност, затоа што ситуацијата може да стане драматична ако не се дојде до решение,“ изјави Џорџ Марис, главен инвестициски директор и глобален шеф за акции во „Принсипал Асет Менаџмент“ (Principal Asset Management), за „Блумберг ТВ“. „Ова е најголемото прашање со кое пазарот се соочува во 2025 година. Затоа е и логично што вниманието е насочено токму тука.“

Трамп е желен да постигне нови трговски договори, но разговорите со Кина и Европа стагнираат поради прекини во комуникацијата и нови закани со царини.

Претседателот одамна тврди дека директни разговори со Шји се единствениот начин да се решат разликите меѓу САД и Кина. Сепак, кинескиот лидер се воздржува од телефонски разговор со својот американски колега – претпочита советниците да ги водат клучните преговори. Последниот познат разговор меѓу Трамп и Шји се случил во јануари, пред инаугурацијата на американскиот претседател.

Главниот економски советник на Трамп, Кевин Хасет, во неделата сигнализираше дека Белата куќа очекува телефонски повик оваа недела со кинескиот лидер. Кина сè уште не потврдила какви било разговори меѓу двајцата претседатели, иако САД притискаат за дијалог.
Офшор јуанот се зацврсти и се приближи до вредноста на домашниот јуан, додека САД вршат притисок за разговори меѓу Трамп и Шји. Во меѓувреме, кинескиот производствен сектор доживеа најголем пад од септември 2022 година.

„Очигледно е дека има многу нестабилност и инвеститорите бараат повеќе јасност,“ изјави Масимилијано Бонду́ри, основач и главен извршен директор на „СГМЦ Капитал“ (SGMC Capital) во Сингапур, за „Блумберг ТВ“ (Bloomberg TV). „Нормално е пазарите да се движат во различни насоки.“

Во меѓувреме, Трамп во понеделникот активно телефонираше и објавуваше на социјалните мрежи, обидувајќи се да ги убеди републиканските сенатори кои се двоумат да го поддржат неговиот предлог-закон за даноци „тежок“ повеќе билиони долари, иако се соочи со спротивставени барања од сенатори од сопствената партија.
Законот, кој минатиот месец едвај помина во Претставничкиот дом, се соочува со противење и од умерени и од ултраконзервативни сенатори, при што Трамп не може да си дозволи да загуби повеќе од три гласа во Сенатот.

Од друга страна, Русија и Украина ја завршија втората рунда преговори во Истанбул, кои не ги приближија двете страни кон крај на војната, но поставија основа за нова размена на заробеници.

На пазарот на суровини, цената на нафтата порасна втор ден по ред, бидејќи ослабениот долар ја зголеми привлечноста на суровините деноминирани во американската валута, а геополитичките тензии ја намалија веројатноста за зголемување на понудата од Русија и Иран. Златото се намали за 0,5 отсто откако загриженоста за трговијата ги насочи инвеститорите кон посигурни прибежишта во понеделникот.

Некои од главните случувања на пазарите:

Акции

-Фјучерсите на S&P 500 паднаа за 0,4 отсто во 6:51 часот по лондонско време
-Фјучерсите на Nasdaq 100 паднаа за 0,3 отсто
-Индексот MSCI Asia Pacific порасна за 0,1 отсто
-Јапонскиот Topix падна за 0,1 отсто
-Австралискиот S&P/ASX 200 порасна за 0,7 отсто
-Хонгконшкиот Hang Seng порасна за 1,3 отсто
-Шангајскиот композитен индекс порасна за 0,3 отсто
-Фјучерсите на Euro Stoxx 50 останаа речиси непроменети

Валути

-Индексот на доларот на Bloomberg порасна за 0,2 отсто
-Еврото ослабе за 0,2 отсто, на 1,1417 долари
-Јапонскиот јен ослабе за 0,2 отсто, на 142,97 јени за долар
-Офшор јуанот зајакна за 0,2 отсто, на 7,1977 јуани за долар
-Британската фунта ослабе за 0,2 отсто, на 1,3519 долари

Криптовалути

-Биткоин порасна за 0,4 отсто, на 105.382,61 долари
-Етереум порасна за 2,7 отсто, на 2.608,32 долари

Обврзници

-Приносот на 10-годишните американски обврзници се намали за 2 базични поени, на 4,42 отсто
-Приносот на 10-годишните јапонски обврзници се намали за 2,5 базични поени, на 1,480 отсто
-Приносот на 10-годишните австралиски обврзници остана речиси непроменет, на 4,27 отсто

Суровини

-Спот цената на златото падна за 0,5 отсто, на 3.365,81 долари за унца
-Цената на нафтата WTI (West Texas Intermediate) порасна за 0,5 отсто, на 62,81 долари за барел

 

Оваа сторија е креирана со помош на Bloomberg Automation.

-Со помош на Џоан Вонг и Хои Јует Ву 

Во моментов нема коментари за веста. Биди прв да коментира...

Остави коментар