Шпекулативна еуфорија: Непозната компанија со рекордно тргување на Волстрит

Акциите на слабо познатата технолошка компанија „Хелткер тријангл“ (Healthcare Triangle Inc.) станаа најтргуваното име на американските берзи во четвртокот, во уште еден показател за тоа како ентузијазмот на инвеститорите продолжува да создава драстични и често необјасниви осцилации на берзите.

Цената на акцијата на оваа компанија за здравствени информациски технологии се зголеми повеќе од двојно, достигнувајќи нешто над 5 центи, додека беа разменети над 3 милијарди акции. Тоа претставува околу 15 отсто од вкупниот обем на тргување на сите американски берзи во текот на денот, според податоци на „Блумберг“.

„Хелткер тријангл“ отвори со скок од 138 отсто, а денот го заврши со раст од 115 отсто – без никаква јасна вест или најава што би го објаснила драматичниот пораст. Компанијата не даде изјава по барањето за коментар.

Вкупната вредност на тргуваните акции во текот на денот изнесувала околу 150 милиони долари, што е речиси седум пати повеќе од нејзината моментална пазарна вредност.

Овој случај е само уште еден од низата примери за новиот бран на т.н. мем-акции, каде што шпекулативниот интерес – често поттикнат преку социјалните мрежи – носи огромни, но нестабилни порасти кај акциите на помали и непознати компании. Во слични услови се најдоа и компании како „Колс“ (Kohl’s Corp.), „Го про“ (GoPro Inc.) и „Криспи крим“ (Krispy Kreme Inc.), чии акции неодамна исто така забележаа ненадејни и значителни осцилации.

Акциите на ОТ (Opendoor Technologies), кои во понеделникот имаа огромен скок, исто така се издвојуваат со енормен обем на тргување.

Иако бројот на компании што се вовлекуваат во овој шпекулативен тренд расте, експертите предупредуваат дека овие порасти се краткотрајни и нестабилни. Се поставува и прашањето дали овие компании ќе успеат да ја искористат моменталната вредност на акциите за да обезбедат нов капитал – како што направија АМЦ (AMC Entertainment) и „Гејмстоп“ (GameStop) во време на оригиналната мем-еуфорија во 2021 година.