Француската политичка неизвесност ги крена европските акции

Европските акции пораснаа додека инвеститорите ги следат следните чекори на Франција во обидот да ги поправи јавните финансии, откако политичкиот ќор-сокак собори втор премиер за помалку од една година.

Индексот Stoxx 600 се зголеми за 0,2 отсто, додека францускиот претседател Емануел Макрон најави дека ќе назначи нов премиер во рок од неколку дена. CAC 40 во Париз оствари подобри резултати од регионалните пазари. Акциите на „Англо Американ“ (Anglo American Plc) скокнаа за повеќе од 8 отсто по договорот за спојување со канадската „Тек рисорсиз“ (Teck Resources Ltd). Француските државни обврзници останаа речиси непроменети. 

Кај американските средства, фјучерсите на S&P 500 пораснаа за 0,2 отсто, откако индексот ја затвори трговијата блиску до историскиот рекорд. Растот на американските државни обврзници запре, при што најголемите загуби ги забележаа обврзниците со пократок рок на достасување. Доларот благо ослабна, насочен кон трет ден на пад.

Француските средства се под притисок поради продолжената неизвесност, додека Макрон бара премиер што ќе успее да протурка буџет низ длабоко поделеното Национално собрание. Неможноста на политичките партии да најдат заеднички јазик ја поткопува довербата на инвеститорите и го зголемува ризичниот премиум на Франција

„Никој не очекуваше колапс на пазарите денеска, јасно е дека најлошото сценарио – предвремени избори – барем засега не се случува“, изјави Винсент Жувинс, главен инвестициски стратег во ИНГ (ING) во Брисел. „Во моментов се движиме некако низ оваа ситуација, но со разликата во приносите во однос на Германија, која е на нивото од должничката криза во 2012 година.“

Во меѓувреме, глобалниот берзански индекс MSCI беше на пат кон уште едно затворање на рекордно ниво. Технолошки компании како „Тајван семикондактор“ (Taiwan Semiconductor Manufacturing Co.) и „Алибаба“ (Alibaba Group Holding Ltd.) помогнаа да се зголемат индексите во Азија.

Акциите во Индонезија паднаа откако беше сменета долгогодишната министерка за финансии. Премиумот на приносите на индонезиските доларски обврзници и цената за нивно осигурување од неплаќање се зголемија.

Цената на нафтата порасна втор ден по ред, додека инвеститорите ги мереа изгледите за намалување на побарувачката откако Саудиска Арабија ги намали цените на повеќето свои видови сурова нафта. Цената на железната руда се зголеми шести ден по ред и се приближи до највисокото ниво во повеќе од шест месеци, поттикната од очекувањата за зголемена побарувачка од Кина.

Корпорациски вести:

„Англо Американ“ (Anglo American Plc) се согласи на спојување со канадската „Тек рисорсиз“ (Teck Resources Ltd.) во една од најголемите рударски зделки во повеќе од една деценија.

„АСМЛ холдинг НВ“ (ASML Holding NV) инвестира 1,3 милијарда евра (1,5 милијарда долари) во француската „Мистрал ВИ“ (Mistral AI) – необичен потег за холандската компанија за опрема за производство на чипови, кој ја зацврстува позицијата на најважниот европски стартап за вештачка интелигенција.

Банката „Монте деи Паски ди Сиена“ (Banca Monte dei Paschi di Siena SpA) обезбеди мнозински удел во „Медиобанка“ (Mediobanca SpA), со што го финализира некогаш незамисливото преземање вредно 16 милијарди евра, кое ќе го преобликува италијанскиот финансиски сектор.

Холандската влада започна ново намалување на својот удел во „АБН Амро банк НВ“ (ABN Amro Bank NV), продолжувајќи постепено да го намалува своето учество во кредиторот што го спасуваше за време на финансиската криза.

Главниот извршен директор на КНДС НВ (KNDS NV), Жан-Пол Алари, изјави дека ја подготвува француско-германската компанија за производство на тенкови за првично јавно понудување, со цел да се зајакне акционерската база и да се обезбедат средства за инвестиции и аквизиции.

Во моментов нема коментари за веста. Биди прв да коментира...

Остави коментар