„Миндреј“ ќе котира на берзата во Хонг Конг

Најголемиот кинески производител на медицинска опрема, „Шенжен Миндреј био-медикал електроникс“ (Shenzhen Mindray Bio-Medical Electronics Co.), избрал банки за планираното влегување на берзата во Хонг Конг, велат лица упатени во процесот.

„Хуатаи сикјуритис“ (Huatai Securities Co.) и „ЏП Морган Чејс“ (JPMorgan Chase & Co.) работат на продажбата на акции, додаваат изворите кои побарале анонимност бидејќи информациите се доверливи. Можно е во подоцнежна фаза да се приклучат и други банки.

Според извештајот на „Блумберг њуз“ од јули, „Миндреј“ би можел да собере најмалку 1 милијарда долари со ова излегување на берзата.

Претставници на „Хуатаи“ и „ЏП Морган“ одбиле да коментираат. „Миндреј“ не одговорил на барањето за изјава.

Со пазарна вредност од околу 290 милијарди јуани (41 милијарда долари), „Миндреј“ е меѓу најголемите компании што котираат во Кина и кои бараат второ котирање во Хонг Конг. Градот годинава бележи пораст на вакви зделки, поттикнат од поддршката на кинеските регулатори, како и од подобрената ликвидност и довербата на инвеститорите.

Според проценките на „Блумберг интелиџенс“ (Bloomberg Intelligence), примарните продажби на акции во овој азиски финансиски центар годинава ќе достигнат четиригодишен врв од над 26 милијарди долари.

 

Bloomberg

„Миндреј“, кој произведува опрема како респиратори и дефибрилатори, се котираше во Шенжен во 2018 година, по повлекувањето од Њујоршката берза во рамки на приватизациски договор од 2016. Акциите таму паднале за 26 отсто од врвот достигнат во октомври минатата година. Нето добивката на „Миндреј“ за првата половина од годината изнесува 5,07 милијарди јуани, што е под очекувањата.