Кина сака да стави контрола врз ризичното тргување со акции за стабилен раст

Финансиските регулатори во Кина разгледуваат низа мерки за смирување на берзата, бидејќи се загрижени од забрзаниот раст од 1,2 трилион долари од почетокот на август, велат добро упатени извори.

Според нив, меѓу мерките предложени до највисоките креатори на политиките во последните недели е и укинувањето на дел од ограничувањата за кратка продажба. Властите исто така размислуваат за опции за намалување на шпекулативното тргување, поради страв дека нагло свртување на трендот би донело големи загуби за малите инвеститори.

Со епското искачување и пад од 2015 година, официјалните лица сега се обидуваат да постигнат постабилен раст што би ги зајакнал економијата и довербата кај потрошувачите. Размислувањата се совпаднаа и со настојувањето на Кина да ја покаже својата воена моќ на парадата на 3 септември по повод 80-годишнината од крајот на Втората светска војна. Владата често настојува да обезбеди стабилност на финансиските пазари во пресрет на големи национални настани.

Претседателот на Комисијата за хартии од вредност на Кина (ЦСРЦ), Ву Чинг, на симпозиумот што го свика во Пекинг кон крајот на минатиот месец посочи дека е решен да обезбеди стабилност на берзата, ветувајќи консолидација на „позитивниот замав“ на пазарот, како и промовирање „долгорочни, вредносни и рационални инвестиции“.

Сè уште не е јасно дали некоја од мерките ќе биде одобрена или применета, велат изворите. ЦСРЦ не одговори веднаш на барањето за коментар.

Bloomberg

Кинеската берза се засили од април наваму, при што главните индекси пораснаа за повеќе од 20 отсто. Shanghai Composite достигна највисоко ниво во последната деценија, а CSI 300 скокна за над 20 отсто од најниското ниво годинава.

Двата индекса паднаа за околу 2 отсто до пладневната пауза во четвртокот – најголем дневен пад од почетокот на април. Офшор јуанот благо ослабе, откако минатата недела зајакна на највисоко ниво од ноември, делумно поттикнат од очекувањата дека растот на кинеските акции ќе ја поддржи валутата преку привлекување поголем странски капитал.

Иако домашните индекси годинава заостануваат зад другите глобални показатели, се појавуваат знаци на прегревање на кинескиот пазар вреден 12,5 трилиони долари, што делумно потсетува на 2015 година. Тоа болно искуство, заедно со економските предизвици и заканите од нови американски царини, им дава на властите уште поголема причина да пристапат внимателно во обидот да обезбедат одржлив раст без да ги исплашат инвеститорите.

Последните извештаи укажуваат на „сè поголема непријатност од драматичните скокови во активностите на малите инвеститори, особено во маргиналното тргување и отворањето нови сметки“, изјави Хомин Ли, макростратег во „Ломбард Одиер“ (Lombard Odier). „Не би било изненадување ако властите интервенираат со делумно дозволување институционалните инвеститори повторно да продаваат на краток рок на домашниот пазар и со нов бран акции против онлајн платформите што им овозможуваат тргување на малите инвеститори“, додаде тој во Сингапур.

Регулаторите веќе ги вклучиле националните финансиски институции во постигнувањето на таа цел. На банките им било наложено да ги истражат незаконските случаи на користење кредитни средства за купување акции, откако мониторингот на регулаторите открил дека некои од инвеститорите влегле на пазарот со пари позајмени од онлајн кредитни платформи, посочуваат изворите.

Брокерските куќи добиле наредба да се воздржат од агресивно рекламирање на своите услуги за отворање сметки во кое било време од денот, велат изворите. Навлегувајќи масовно на пазарот, малите инвеститори отвориле 166 отсто повеќе нови сметки во август во споредба со истиот месец лани, покажуваат податоците од берзата.

Како прв знак дека регулаторите би можеле да преземат поактивна улога, „Нингбо ТИП Рабер текнолоџи“ (Ningbo TIP Rubber Technology Co.), чија акција девет сесии по ред го достигнуваше лимитот од 10 отсто, ја суспендира трговијата во четвртокот, наведувајќи дека е потребно да се заштитат интересите на инвеститорите поради „ненормални флуктуации“. Дизајнерот на чипови за вештачка интелигенција „Камбрикон текнолоџис“ (Cambricon Technologies Corp.), кој се смета за една од целите на шпекулативното тргување, минатата недела ги предупреди инвеститорите за ризици при тргувањето со неговите акции.

Социјалните мрежи, пак, добиле насоки да не ги промовираат претерано објавите поврзани со биковскиот пазар, рекордните нивоа на маргинални трансакции и растечкиот трансфер на банкарски депозити во акции, за да се избегне поттикнување на неискусните инвеститори, велат изворите. Тие додаваат и дека секое прекршување и незаконска препорака за акции ќе бидат строго санкционирани.

Bloomberg

Мултифунционалната кинеска апликација Вичет (WeChat) соопшти дека ќе го ограничи сообраќајот или ќе блокира одредени сметки, откако било откриено дека некои од нив незаконски нуделе услуги за препораки за акции или привлекувале корисници со фабрикувани и погрешни информации, според соопштение од крајот на август.

Повеќе од 400 инвестициски фонда во август или објавиле стопирање или вовеле лимит на нови уплати, пренесуваат локалните медиуми.

Обемот на тргување на берзите на 27 август достигна повеќе од 3,1 трилиони јуани (434 милијарди долари) – второ највисоко ниво досега – додека маргиналните трансакции достигнаа рекордни нивоа, надминувајќи ги оние од 2015 година. Големиот раст во голема мера е поттикнат од ликвидност и е во спротивност со економските основи на Кина – од вкоренета дефлација до постојана криза во недвижностите – што предизвикува предупредувања за балон од страна на пазарните аналитичари.

Некои финансиски компании презедоа чекори за намалување на користењето позајмени средства од страна на маргиналните инвеститори, кои во 2015 година ги издигнаа акциите пред да следуваат остро затегнување и пад на пазарот. Во првиот ваков јавен потег, шангајската „Синолинк секјуритис“ (Sinolink Securities Co.) на 27 август ја зголеми маргиналната депозитна стапка за новите договори за финансирање на одредени хартии од вредност – на 100 отсто од претходните 80 отсто. Засега, регулаторите сè уште имаат простор пред да преземат директни интервенции, бидејќи некои од аналитичарите сметаат дека последниот раст не е поттикнат од малите инвеститори, како што беше во 2015 година.

„Ситик секјуритис“ (Citic Securities Co.), една од најголемите брокерски куќи во земјата, соопшти дека т.н. „паметни пари“, односно лица со висока нето-вредност или корпоративни инвеститори, вложуваат преку хеџ-фондови и претставуваат главни двигатели на растот на акциите. Досегашниот раст, според аналитичарите предводени од Чиу Сјанг, изгледа дека е ограничен на одредени стратешки сектори, како што се чиповите, наместо да биде широкораспространет, се наведува во белешка од 25 август.

„Веројатноста сегашниот раст да биде краткотраен поради забрзано искачување или, пак, значително да се прошири е мала“, напишаа тие.

Отворањето нови сметки за A-акции во август сè уште значително заостанува зад претходниот врв во октомври, кога прорастечките политики на Кина донесоа 6,8 милиони нови инвеститори, што беше трет најсилен месец досега.

Сè уште нема знаци за голем прилив на фондови од малите инвеститори, но пазарот можеби се приближува до точка кога дел од заштедите на домаќинствата ќе почне да се влева, напиша аналитичарот на „Вестерн секјуритис“ (Western Securities), Ѕао Лиулонг, во извештајот од 24 август. Според него, пазарот потоа може да влезе во период на консолидација од два до три месеци, пред повторно да го продолжи растот поттикнат од континуираните приливи на заштеди и други инвестиции.

Во моментов нема коментари за веста. Биди прв да коментира...

Остави коментар