Резултатите на „Енвидија“ се судираат со пазар што одеднаш стравува од трошоците за ВИ

Берзата на Волстрит ќе добие појасна слика каде одат милијардите долари што се трошат за вештачка интелигенција, кога „Енвидија“ (Nvidia Corp.) ќе ги објави кварталните резултати по затворањето на берзата в среда. Како ќе реагира разнишаниот берзански пазар е друго прашање.

„Ова е извештај од типот како што се движи ‘Енвидија’, така оди и пазарот“, рече главниот инвестициски директор на „Кингсвју велт менаџмент“ (Kingsview Wealth Management), Скот Мартин, компанија што поседува акции во „Енвидија“ и во неколку други големи технолошки компании.

Аналитичарите очекуваат гигантот за чипови да прикаже раст од повеќе од 50 отсто и кај нето-приходот и кај приходите во фискалниот трет квартал. Причината е доста едноставна. „Мајкрософт“ (Microsoft Corp.), „Амазон“ (Amazon.com Inc.), „Алфабет“ (Alphabet Inc.) и „Мета платформс“ (Meta Platforms Inc.) – кои заедно сочинуваат повеќе од 40 отсто од продажбите на „Енвидија“ се проектирани во наредните 12 месеци да го зголемат заедничкото трошење за ВИ за 34 отсто, на 440 милијарди долари, покажуваат податоците на „Блумберг“. 

Ризикот е што овие проекции може да станат непостојани доколку големите потрошувачи за ВИ, особено приватната „Опен еј-ај“ (OpenAI), бидат принудени да ги намалат своите обврски.

„Овие играчи во просторот на ВИ направија сè за постојано да ја креваат летвичката на очекувањата, а сега мора не само да ги испорачаат бројките туку и постојано да го хранат растечкиот апетит на пазарот“, рече главниот аналитичар на „Џоунс-трејдинг“ (Jonestrading), Мајкл О’Рурк.

„Тоа е опасна игра за јавните компании.“

Сè додека се држат до своите цели, „Енвидија“ би требало да има корист. А кога „Енвидија“ остварува добри резултати, обично го чувствува и пазарот, бидејќи таа е најтешко индексираната компанија во индексот S&P 500 и е во центарот на ВИ-трговијата што ги туркаше берзанските индекси до рекорди во изминатата година. Но бидејќи инвеститорите стануваат сè понервозни околу трошењето за ВИ, а акциите на „Енвидија“ паднаа за повеќе од 12 отсто откако го достигнаа врвот пред четири недели, начинот на кој ќе се интерпретираат резултатите ќе биде клучен.

Пад на акциите на „Енвидија“ по достигнувањето рекордно ниво

Bloomberg

„Сигурно има луѓе што сметаат дека, ако резултатите на ‘Енвидија’ се силни и проектираат поголема продажба и активност, тогаш сè ќе биде во ред“, рече Мартин.

Силен квартал и охрабрувачки изгледи од „Енвидија“ би можеле да им дадат краток одмор на инвеститорите, кои стануваат сè повознемирени околу вреднувањето на акциите поврзани со ВИ, кругот на финансирање што се врти околу ВИ-договорите и огромните суми што се трошат на ВИ-инфраструктура без јасни резултати. Овие стравувања ги разнишаа технолошките акции и пазарот во целина, со што го турнаа индексот S&P 500 во неговиот најлош четиридневен период од април.

И покрај неодамнешната распродажба, акциите на „Енвидија“ годинава се зголемени за 35 отсто, повеќе од двојно во споредба со речиси 17-отстотниот принос на индексот Nasdaq 100. А падот ја направи пазарната процена на компанијата релативно попривлечна. „Енвидија“ моментално се тргува по околу 29 пати од нејзината проектирана заработка, што е многу пониско од нејзиниот 10-годишен просек од 35. Тоа ниво е само малку повисоко од просечниот мултипликатор на индексот Nasdaq 100, кој е околу 26.

„‘Енвидија’ со мултипликатор 30 не изгледа воопшто неразумно, имајќи го предвид забрзаното темпо на раст“, рече Мартин.

Во делот на самата заработка, инвеститорите ќе бараат силни резултати од серијата „Блеквел“ (Blackwell) на „Енвидија“, која се очекува да ја придвижи следната фаза од растот на компанијата. Проширувањето на маржите ќе биде исто така клучно, особено во сегментот за дата-центри, кој учествуваше со речиси 90 отсто во приходите во вториот квартал. Но, како што често се случува со ВИ-акциите, крајниот заклучок на Волстрит најверојатно ќе зависи од проекциите.

„Очекуваме да објават прилично солиден извештај“, рече Џејк Селц, портфолио-менаџер во „Олспринг глобал инвестментс“ (Allspring Global Investments), која има значителна позиција во „Енвидија“. Селц внимателно ќе ја следи насоката на компанијата за следниот квартал, која, барем за приходите, веројатно ќе биде над очекувањата на Волстрит, иако, како што рече, „тешко е да се знае дали ќе  излезат со повнимателна, поконзервативна проекција.“

Аналитичарите очекуваат експлозивниот раст на продажбите на „Енвидија“ да започне да забавува во наредните години. Од компанијата се очекува во фискалната 2026 година, која завршува во јануари, да прикаже речиси 60-отстотен раст на приходите, потоа 41 отсто во фискалната 2027 година и 22 отсто во фискалната 2028 година.

Растот на продажбата на „Енвидија“ се очекува да забави

Bloomberg

Дури и ако „Енвидија“ прикаже солидни резултати, како што очекува добар дел од Волстрит, тоа можеби нема да се претвори во раст на цената на акцијата, со оглед на ослабеното расположение кај инвеститорите.

„Мислам дека во моментов пазарот навистина се бори со прашањето колку е навистина голем вкупниот достапен пазар за целата оваа ВИ-инфраструктура“, рече Мелиса Ото, раководителка на истражувања за технологија, медиуми и телекомуникации во „Визибл алфа“ (Visible Alpha).

Хеџ-фондот на Питер Тил целосно ја продаде својата позиција во „Енвидија“ во третиот квартал, а „Софтбанк“ (SoftBank Group Corp.) исто така излезе од својата позиција за да финансира други ВИ-инвестиции. „Сајон асет менаџмент“ (Scion Asset Management), фондот што го води Мајкл Бари, познат по облогот против пазарот на недвижности за време на финансиската криза во 2008 година, неодамна објави дека купил опции што добиваат на вредност ако цената на „Енвидија“ предупредува на меур поврзан со ВИ.

Пошироко гледано, анализа на 13Ф-поднесоци од 909 хеџ-фонда покажа речиси еднаков сооднос меѓу оние што ја зголемуваат и оние што ја намалуваат својата позиција во „Енвидија“ во трите месеци до 30 септември. Колку од оваа продажба е резултат на земање профит, а колку е одраз на негативен став кон „Енвидија“ и состојбата на ВИ-секторот, допрва ќе се види.

„‘Енвидија’ е извонредна акција“, рече Ото. „Можеби е логично да се земе дел од профитот и да се размисли каде ќе дојде следната етапа на раст.“