Анкета на „ЏП Морган“ открива што ќе ги зголеми тензиите на пазарите оваа година

Споровите меѓу светските сили ќе предизвикаат дополнителни осцилации на пазарот во текот на годинава, покажува истражување на „ЏП Морган“ (JPMorgan Chase & Co), при што развојот на вештачката интелигенција (ВИ) исто така е во фокусот на трговците.

Уделот на испитаниците што сметаат дека геополитичките тензии ќе имаат најголемо влијание на финансиските пазари годинава се зголемил повеќе од двојно во споредба со 2025 година, на 41 отсто, покажува годишната анкета на банката од Волстрит за електронска трговија. Технолошките иновации, како напредокот во ВИ, го заземаат второто место, со 19 отсто. Политиката на каматните стапки е трета со 13 отсто.

„Една работа што се истакнува е фокусот на новите и постојните геополитички тензии, што имплицира дека пазарот можеби нема да види брзо решение на актуелната ситуација“, вели Чи Нзелу, кој ја води новата група на „ЏП Морган“ за квантитативна трговија и истражување. „Тоа е поврзано со загриженоста за продолжената волатилност. Клиентите најчесто се загрижени за очекуваните трошоци за ликвидација на позиции“.

Јануарската анкета вклучува 955 институционални и професионални трговци од целиот свет и дава увид во нивните ставови на почетокот на 2026 година, која веќе бележи ескалација на геополитичките тензии и пад на акциите поттикнат од заканата дека ВИ може да наруши цели индустрии.

Апсењето на венецуелскиот лидер Николас Мадуро од страна на САД и потезите на Доналд Трамп кон американска контрола над Гренланд беа неочекувани настани за инвеститорите. Тоа се надоврзува на други познати геополитички жаришта, како што се воените конфликти во Украина, напнатото примирје помеѓу Израел и Хамас и долготрајните трговски тензии меѓу САД и Кина.

Инвеститорите низ различни класи на имот ја приспособуваат својата стратегија. На пример, фондовите за пазари во развој инвестираат во земји од Латинска Америка поврзани со Трамп, додека тој се обидува да го прошири американското влијание во регионот. Доларот, пак, падна откако САД претходниот месец се заканија со царини кон европските земји во рамките на напорите да ја преземат контролата над Гренланд.

Ниту една класа на имот годинава не доживеа толкава волатилност како што се благородните метали. Скокот на рекордни нивоа поттикнат од шпекулативната побарувачка нагло запре кон крајот на јануари, кога среброто забележа најголем пад во историјата, а златото падна најмногу од 2013 година.

Нзелу им ги припишува движењата на засилените геополитички тензии, потенцијалните царини и поширокото прашање за „улогата на благородните метали како чувари на вредноста во споредба со криптосредствата или фиат валутите“. Тој вели дека „ЏП Морган“ забележал рекорден обем на трговија со благородни метали од страна на клиентите во текот на последната волатилност.

На генеративната ВИ се гледа како на технологија со најголем ефект на трговијата во следните три години, додека компаниите се обидуваат да го применат најновиот ВИ-софтвер за да стекнат предност на пазарот. Минатата недела претставувањето на моделот на „Антропик“ што е способен за финансиско истражување предизвика пад на акциите на различни компании од секторот на услуги.

Прогресот на големите јазични модели значи дека материјалите што ги пишуваат луѓето – како што се инвестициските анализи и коментари за пазарот – сè повеќе можат автоматски да се користат како податоци во системите за трговија, вели Еди Вен, глобален шеф за дигитални пазари во „ЏП Морган“.

„Генеративната ВИ ни помага да го премостиме јазот помеѓу неструктурираните содржини и структурираните податоци“, посочува Вен. „Оваа еволуција ја гледаме и кај продажната страна, како и кај нашите клиенти.“

Сите испитаници во анкетата рекле дека очекуваат зголемување на нивната активност во електронската трговија. Тоа го следи долгогодишниот тренд во сите класи на имот, дури и за хартиите од вредност што се помалку ликвидни.

Токенизираниот имот, пак, се смета за најголема можност на дигиталните пазари. Него го одбрале 48 отсто од испитаниците од продажната страна и 33 отсто од куповната страна, пред класичните криптовалути, стабилните криптовалути и депозитни токени.

Додека големите банки и други учесници на пазарот експериментираат со блокчејн-технологијата повеќе од една декада, обемот на трансакции што вклучуваат токенизиран имот сè уште е мал во споредба со традиционалните еквиваленти. Идејата е да се направат трансакциите и водењето на евиденцијата побрзи и поевтини.

„Дигиталниот имот продолжува да предизвикува значителен интерес на пазарот“, вели Вен. „Во последните разговори со клиентите, повеќето изразија намера да го истражат користењето за трговија, чување или финансирање, иако ангажманот на ова поле засега останува селективен и најчесто истражувачки.“