Вештачката интелигенција може целосно да ги уништи софтверските акции

Продажбата на акции од софтверски компании пред да го направи тоа толпата се исплатеше за Ник Еванс, менаџер на фондот во „Полар капитал“ (Polar Capital). Неговото предупредување до потенцијалните ловци на поволни понуди: повеќето акции сè уште се токсични и малку компании ќе преживеат.

„Мислиме дека апликацискиот софтвер се соочува со егзистенцијална закана од вештачката интелигенција (ВИ)“, рече Еванс, чиј глобален технолошки фонд од 12 милијарди долари победи 99 отсто од конкурентите во текот на една година и 97 отсто во последните пет години.

Стравовите дека напредните ВИ-алатки како што е Клод Коворк (Claude Cowork) од „Антропик“ (Anthropic PBC) ќе го нарушат пазарот на софтверски компании годинава доведоа до пад на нивните акции. ЕТФ што ја следи американската софтверска индустрија е паднат за 22 отсто, што е драстична разлика во споредба со акциите на полупроводниците што пораснаа благодарение на зголемената побарувачка за компјутерски ресурси поради ВИ.

Апликацискиот софтвер, кој им помага на корисниците да извршуваат задачи како што се пишување документи и управување со плати, изгледа дека е најпогоден, според Еванс. Покрај малата позиција и некои опции за купување во „Мајкрософт“ (Microsoft Corp.), менаџерот на фондот ги продал сите други во секторот, вклучувајќи ги САП (SAP SE), СН (ServiceNow Inc.), „Адоби“ (Adobe Inc.) и „Хабспот“ (HubSpot Inc). „Немаме намера да се вратиме на овие компании“, изјави тој во интервју.

Според него, алатките за кодирање со ВИ се подобрени до тој степен што веќе можат да реплицираат и модифицираат многу од постојниот софтвер. Тоа значи дека веќе утврдените компании сега се соочуваат со многу поголема конкуренција од своите клиенти, кои се во брза трка внатрешно да развијат нови алатки со цел да ги намалат трошоците, како и ВИ-стартапите.

Компаниите како САП што произведуваат сложени софтверски пакети ќе бидат поотпорни, според Еванс. Но, со тоа што алатките за ВИ стануваат „драматично посилни“, постои значителна неизвесност во однос на нивните долгорочни процени, додава тој.

 

Седум од најдобрите десет позиции на фондот на крајот на јануари беа во полупроводнички компании, вклучувајќи ја главната позиција „Енвидија“ (Nvidia Corp.), која заземаше речиси 10 отсто од портфолиото. Покрај производителите на чипови, Еванс е оптимист за компании што произведуваат мрежни уреди, оптички влакна и оние што обезбедуваат енергетска инфраструктура за центри за податоци.

Притисок врз паричните текови

Пазарниот пад предизвикан од заканата од ВИ-нарушување може да предизвика нова главоболка за софтверските компании. Работниците често добиваат акции како дел од својата компензација и менаџерите можеби ќе треба да го надоместат изгубениот капитал од акциите со исплата на повеќе кеш, изјави Еванс. Секој обид да се купат ВИ-стартапи за да се зголеми растот може да го зголеми финансискиот притисок, вели тој.

„Не веруваме дека сегашните цени ја одразуваат неизвесноста за терминалната вредност или притисокот врз слободниот паричен тек“, изјави тој.

Дебатата за големината на заканата продолжува на Волстрит. Стратезите на „ЏП Морган“ (JPMorgan Chase & Co.) минатата недела посочија дека акциите на софтверските компании може да закрепнат по последното „екстремно ценовно дејство“. Тие фаворизираат акции како „Мајкрософт“ (Microsoft) и СН (ServiceNow).

Постојат области на софтверот за кои Еванс смета дека се помалку подложни на нарушување. Во јануари менаџерот на фондот ги зголеми своите удели во компании за инфраструктурен софтвер што обезбедуваат основа за системи што поддржуваат потрошувачки и бизнис-апликации. Неговите инвестиции во овој сектор ги вклучуваат „Клаудфлер“ (Cloudflare Inc.) и „Сноуфлејк“ (Snowflake Inc).

Еванс исто така има неутрален став за софтверот за сајбер-безбедност бидејќи не гледа непосредна закана од ВИ. Сепак, помалку од 7 отсто од неговиот фонд се инвестирани во инфраструктурен софтвер и акции за сајбер-безбедност.

Надвор од овие два сектора, Еванс очекува дека само неколку компании ќе преживеат во претстојната болна реорганизација. Тој предвидува дека повеќето ќе завршат како весниците од 2000-тите години, кога печатените медиуми беа уништени од интернетот.

Инвеститорите треба „значително да го потценат апликацискиот софтвер и мора да реагираат брзо, затоа што како што моделите стануваат подобри, нарушувањето се забрзува“, изјави тој.