Одлуката на Ворен Бафет да купи акции во „Њујорк Тајмс“ (New York Times Co.) во последниот квартал во кој легендарниот инвеститор ја водеше „Беркшир Хатавеј“ (Berkshire Hathaway Inc.) претставува знак на доверба – а можеби и носталгија – на милијардерот кој целиот живот бил фасциниран од весниците.
„Беркшир“ во трите месеци заклучно со декември купи 5,1 милион акции на издавачката куќа, што на крајот од годината вределе 351,7 милиони долари, покажува регулаторен поднесок објавен во вторникот. Инвестицијата на Бафет во „Њујорк Тајмс“ пред само неколку недели изгледаше проблематично. Акциите на 4 февруари забележаа најголем пад во последните шест години по кварталниот извештај за заработка што предизвика загриженост околу потрошувачката, завршувајќи го денот со пад поголем од шест проценти.
Сепак, во последните денови инвеститорите повторно ја подигнаа цената, па акцијата сега се наоѓа на историски максимум, поттикната од веста за интересот на Бафет. Во време кога американската медиумска сцена минува низ масовно намалување на обемот на работење и трансформација, „Њујорк Тајмс“ претставува ретка успешна приказна. Како еден од водечките весници во земјата, продолжува да гради лојална база на претплатници – додавајќи 450.000 нови онлајн претплатници во последниот квартал, со што вкупниот број надмина 12 милиони.
Под водство на извршната директорка Мередит Копит Ливејн, „Њујорк Тајмс“ работи профитабилно и бележи раст. Нето-добивката минатата година порасна 17 проценти, на 344 милиони долари, со раст на приходите од рекламирање од 12 проценти. Растот на претплатите делумно е поттикнат од диверзификацијата кон онлајн игри и рецепти. Компанијата силно инвестира и во видео-содржини, кои директорката ги гледа како долгорочна можност „Њујорк Тајмс“ да се позиционира како „омилен бренд за гледање вести, покрај читањето и слушањето“.
Успехот на „Њујорк Тајмс“ е во силен контраст со судбината на некогашните ривали. Угледни весници од „ЛА Тајмс“ (Los Angeles Times) до „Вашингтон Пост“ (Washington Post) бележат загуби и отпуштија стотици новинари и административен персонал за да ги намалат трошоците. Новите технологии како вештачката интелигенција, промените во начинот на консумирање вести – од Тикток видеа до поткасти и индивидуални билтени – како и континуираните напади од администрацијата на Доналд Трамп, ја трансформираа индустријата.
Претседателот Доналд Трамп во септември поднесе тужба за клевета против „Њујорк Тајмс“ во висина од 15 милијарди долари, додека весникот покрена сопствени постапки против „Опен еј-ај“ (OpenAI Inc.), „Мајкрософт“ (Microsoft Corp.) и „Перплексити“ (Perplexity AI Inc.), тврдејќи дека тие технолошки компании користеле заштитени текстови во своите алатки со вештачка интелигенција.
На Бафет, кој има 95 години, светот на весниците и медиумите не му е непознат, а во текот на кариерата ги искусил подемите и падовите на индустријата. Како тинејџер разнесувал „Вашингтон Пост“, а „Беркшир Хатавеј“ во еден период поседувал портфолио од повеќе од дваесет весници, вклучувајќи го „Бафало Њуз“ (Buffalo News) и весникот од неговиот роден град, ОВХ (Omaha World-Herald). Бафет во јануари се повлече од функцијата извршен директор на „Беркшир Хатавеј“, но и понатаму е претседател на управниот одбор на компанијата, чие портфолио вклучува осигурување, комунални услуги, железници и акции во вредност од 283 милијарди долари на 30 септември.
Ворен Бафет
Bloomberg
Една од неговите најпознати и најдолготрајни инвестиции беше вложувањето во „Вашингтон Пост“, кое траеше повеќе од 40 години. Односот заврши во 2014 година, кога „Беркшир Хатавеј“ го продаде својот удел од 28 проценти, тогаш вреден 1,1 милијарда долари, во ГХ (Graham Holdings Co.), поранешниот сопственик на весникот. Бафет, кој стана акционер во „Пост“ во 1973 година, беше близок со легендарната издавачка Кетрин Грахам, а нивното пријателство беше добро познато во инвестициските кругови.
Иако „Беркшир Хатавеј“ во 2020 година ги продаде своите операции со весници на ЛЕ (Lee Enterprises) за 140 милиони долари, и понатаму поседува една локална телевизиска станица – ВПЛГ (WPLG) во Мајами, купена во 2014 година од „Грахам Холдингс“. Излегувањето на Бафет од „Вашингтон Пост“ следеше кратко по продажбата на весникот во 2013 година на извршниот директор на „Амазон“ (Amazon), Џеф Безос.
Џеф Безос
Bloomberg
Безос првично го прошири опфатот на „Пост“ и обезбеди неопходни инвестиции. Но во последните години весникот го намали работењето поради пад на приходите од рекламирање и претплати. Претходно овој месец отпушти околу третина од вработените, го затвори спортскиот оддел, рубриката за книги и поткастот „Пост Рипортс“, додека дигиталната и печатената редакција ќе бидат обединети во еден тим. Затворени се и некои странски дописништва. Вил Луис, извршниот директор на весникот, поднесе оставка неколку дена по бранoт отпуштања, што предизвика негативни реакции насочени кон Безос.
„Њујорк Тајмс“, под контрола на семејството Сулцбергер, исто така некогаш беше во ризик. За време на финансиската криза во 2009 година работењето стагнираше, а компанијата се соочуваше со проблеми со рефинансирање на долгот. Наместо продажба, како што направија сопствениците на „Волстрит журнал“ (Wall Street Journal), „Тајмс“ прифати клучна финансиска помош од 250 милиони долари од мексиканскиот милијардер Карлос Слим, кој подоцна стана најголем поединечен акционер со околу 17 проценти удел. Слим во 2017 година продаде приближно половина од својот удел, остварувајќи значителна добивка благодарение на високите камати на заемот, кој беше отплатен во 2011 година, значително пред рокот.
Тој кредит му овозможи на весникот време за реструктурирање и ги постави темелите за денешната дигитална сила. Современиот „Тајмс“ има редизајнирана мобилна апликација и богато видео и аудио портфолио на содржини, со посебни или комбинирани претплати за готвење, спорт и игри.
Според Даглас Артур од ХРП (Huber Research Partners), ваквиот силен и уникатен деловен модел му овозможил раст дури и додека конкурентите се соочувале со проблеми.
„Вештачката интелигенција нема утре да го замени 'Њујорк Тајмс'“, изјави тој.
.webp){kind=icon}
