Која е заднината на падот на криптопазарот? Биткоинот се држи најдобро

Шокот од царините за увоз на стоки во САД ги потопи и цените на пазарот што никогаш не спие и е отворен 24/7 - пазарот на криптовалутите. Пазарната капитализација на целиот криптоимот падна за 7,5 проценти. Биткоинот најдобро го преживеа падот.

Цената на биткоинот вчераутро се намали речиси за десет проценти, на 75 илјади долари, а потоа закрепна малку. Во моментот на пишувањето на статијата изнесуваше 76.400 долари. Цените на другите поголеми криптовалути загубија двојно повеќе, мерено во проценти.

Цените на етерот, XRP и соланата од неделата до понеделникот паднаа за повеќе од 18 проценти. И нивните вредности закрепнаа по утринските намалувања. Цената на етерот во моментот на пишувањето изнесуваше речиси 1.500 долари (дневен пад од 15,3 проценти), на XRP 1,76 долари (минус 14,4 проценти) и на соланата 101,4 долари (минус 11,9 проценти).

Намалена пазарна капитализација, поголема нестабилност 

Макроекономските потреси на централнобанкарската фиат економија ги ставаат во преден план интересот и разбирањето за тоа што е биткоин, коментира Марко Павловиќ, управител на портфолија на платформата за тргување „Икономи“ (Iconomi).

Кога работите ќе се смират, кога Волстрит ќе ја прифати новата реалност на Трамповите мерки и кога меѓу државите ќе бидат склучени нови трговски договори, пазарите повторно ќе преминат во биковски тренд со рекордни цени, предвидува Павловиќ. Павловиќ е убеден дека вредноста на биткоинот, изразена во фиат валути, повторно ќе достигне рекордни вредности.

Пазарот на криптосредства е толку мал во споредба со светскиот пазар на капитал што реагира со поголема нестабилност, коментира Павловиќ.

Целиот пазар на криптовалути во понеделничниот пад се намали на вредност од 2.400 милијарди долари, што е приближно исто ниво како што беше при изборот на Доналд Трамп за претседател на САД. На врвот на растот по изборот на Трамп, кон средината на декември, целата пазарна капитализација на сите криптосредства изнесуваше 3.700 милијарди долари, покажуваат податоците на веб-страницата „Коин маркеткап“ (CoinMarketCap).

Криптовалутите му се придружија на падот на берзите 

Намалувањето на цените на криптовалутите е типичен пример за масовно повлекување на инвеститорите кон побезбедни инвестиции, вели аналитичарот на „Илирика“ Домен Крегар и додава: „Криптовалутите сè уште се сметаат за поризична форма на инвестиција, па во овој момент не се забележува поголем интерес на страната на купувањето“.

Сепак, пазарот на криптовалути генерално изненадувачки добро реагираше на најавите за воведување нови царини минатата недела, вели Крегар. „Биткоинот, на пример, во четвртокот и петокот дури доби некоја вредност. Во неделата попладне, пак, криптовалутите ’се фатија’ со сопственичките хартии од вредност и забележаа значителен пад“.

Забелешката дека биткоинот изгубил помалку од алткоините е сосема на место, вели Крегар. „Вообичаено, алткоините (тоа се помали криптовалути, заб. на прев.) во периоди на раст бележат поголеми приноси од биткоинот, додека во време на падови побрзо ја губат вредноста“.

Сценарио кога криптовалутите ќе станат прибежиште за капитал? 

Колку долго ќе продолжат да паѓаат цените, според Крегар, е политичко прашање. „Ако САД ги задржат царините на нивото што го предлага Трамп, тоа ќе значи почеток на сосема поинаква економска реалност. Долготрајните нарушувања во меѓународната трговија би можеле да доведат до подлабока и потрајна корекција на пазарите на хартии од вредност“.

Во такви услови би било интересно прашање како инвеститорите би ги вреднувале криптовалутите, размислува Крегар. „Од една страна, криптовалутите не се директно поврзани со геополитичките случувања и би можеле да им обезбедат на инвеститорите прибежиште во случај на стагнација на берзанските пазари. Таквото можно сценарио сè уште е далеку, но со моменталните случувања не изгледа невозможно“.

Индексот од екстремна алчност до зона на екстремен страв 

Пазарите на опции покажуваат дека притисокот за продажба може да продолжи, изјави за „Блумберг“ Шон Мекналти од брокерската компанија „Фалкон екс“ (FalconX). Тој додаде дека клучното ниво на поддршка за биткоинот е 75.000 долари, а за етерот 1.500 долари.

Индексот на страв и алчност, кој ги мери чувствата на инвеститорите, сега е во зоната „екстремен страв“, на скала од еден до сто е на вредноста 17. На крајот на ноември минатата година вредноста на индексот беше рекордни 88, што ја означува зоната „екстремна алчност“, покажуваат податоците на „Коин маркеткап“.

Со падот на цените се воспоставува уште поизразена доминација на биткоинот на целиот пазар на криптoсредства. Сега пазарната капитализација на биткоинот изнесува 62,8 проценти од целиот пазар. Етерот е на второ место и има само 7,4 проценти од целата пазарна капитализација на криптопазарот.

Во моментов нема коментари за веста. Биди прв да коментира...

Остави коментар