Што всушност промовираше „Бајненс“ во Македонија?

Тргување со виртуелни средства и симулирање реални пазарни услови, вклучувајќи и движење на цените во живо и податоци за активни налози за купување и продавање, се меѓу можностите што се нудат на демо-трговскиот сервис што „Бајненс“, најголемата криптоберза во светот по обемот на тргување и бројот на корисници, неодамна го лансираше за корисниците на Балканот, вклучувајќи ја и Македонија. Откако ја објавија можноста, сакавме да истражиме што всушност значи тоа за македонските криптоинвеститори и дали има некои „замки“. Познавачите со кои се консултиравме објаснуваат дека на овој демо-сервис корисниците можат да тргуваат на спот пазарите (Spot markets) и фјучерсите (Futures), и тоа преку интерфејс што целосно ја рефлектира платформата Бајненс за реално тргување.

Според нив, концептот е сосема во ред и главната цел е да создаде безбедна и неризична средина во која корисниците, без разлика на нивото на искуство, можат да учат, да експериментираат и да вежбаат. За почетниците, според соговорниците, ова е можност да стекнат самодоверба, додека поискусните трговци можат да тестираат нови стратегии без да се загрозат финансиски. Сепак, криптотргувањето во земјава останува надвор од законот затоа што нема регулатива со која е регулирано, а надлежните институции постојано ги нагласуваат можните ризици.

А предизвици секако има. Во светот на криптовалутите, каде што пазарите постојано се менуваат и цените можат да доживеат големи осцилации во секој момент, новите трговци и ентузијасти често се соочуваат со многу такви. Безбедно влегување на пазарот, без изложување на финансиски ризик, изгледа како невозможно да се постигне, особено за оние што се нови во светот на криптовалутите.

Но што е демо-криптоплатформа?

Демо-платформите за криптовалути претставуваат виртуелни симулации на вистинските трговски пазари, кои им овозможуваат на корисниците да се вклучат во тргување со криптовалути без да ризикуваат вистински средства. Овие платформи користат виртуелни средства, што значи дека корисниците можат да вежбаат трговски стратегии, да учат за пазарната динамика и да тестираат различни тактики без да се соочат со последици од потенцијални финансиски загуби.

Давор Илиев, извршен директор на „Мотика ИО“ (Motika.IO), објаснува дека демо-платформите се одличен начин за почетниците да се запознаат со криптопазарот.

„За македонските корисници, каде што постојат огромна недоверба и ограничено знаење, ова е одличен начин да се запознаат со апликацијата, динамиката на цените и работата со нарачки, без страв од загуби. На тој начин лесно се намалува почетната бариера и се гради доверба.“

Давор Илиев Приватна архива

Психолошки фактор

„Современите демо-платформи, како оваа на ‘Бајненс’, користат реални пазарни податоци во реално време, така што волатилноста, ликвидноста и графиците се идентични со вистинската платформа“, нагласува Илиев.

Сепак, тој додава дека има една многу важна разлика што корисниците треба да ја имаат предвид и не може да се симулира на демо-платформите.

„Тоа е психолошкиот фактор. Кога нема ризик, луѓето тргуваат поопуштено. Со вистински пари, секоја одлука би била десет пати потешка“, вели нашиот соговорник.

 

Но иако е клучна разлика, тоа е и најголемата предност на демо-платформите - овозможуваат корисниците да научат без да се соочат со последици од погрешни одлуки. На пример, со демо-платформата на „Бајненс“, корисниците можат да поставуваат симулирани налози, да ги анализираат графиците и да ги следат своите виртуелни салда. Сето ова се случува во услови што најмногу личат на реалниот пазар, што им помага на трговците да ги совладаат сите аспекти на тргувањето.

„Демо-платформата е ограничена на најосновната функционалност, што е сосема доволно за почетници. Тука се, се разбира, аналитичките графици, со индикатори и пазарни трендови, и можноста да се постави нарачка. Ова овозможува да се тестираат пазарни стратегии, како на пример популарната ‘грид трејдинг’ (Grid Trading), односно автоматско купување кога цената паѓа и продавање кога расте, преку мрежа од однапред поставени нарачки во одреден ценовен опсег“, објаснува Илиев.

Bloomberg

Во моментов криптопазарот се наоѓа во турбулентен период откако во октомври започна голема распродажба, само неколку дена по достигнувањето рекордни вредности од над 126.000 долари за биткоинот. Оттогаш, пазарната вредност на криптовалутите е намалена за повеќе од билион долари.

Позитивна вест е дека биткоинот неделава достигна највисоко ниво во последните две седмици, што е знак дека пазарот можеби започнува да се стабилизира.

Вредноста на најголемата криптовалута во моментот на пишување на текстот беше над 90.000 американски долари (92.804).

И покрај оптимизмот, некои аналитичари остануваат претпазливи. Според Шон Мекналти, шеф на деривати во „Фалкон екс“ (FalconX), расположението на пазарот сè уште е кревко и не се забележува голем број на купувачи. „Пазарот на криптовалутите сè уште е во фаза на обнова, иако има знаци на позитивна динамика“, рече Мекналти.