text size
Рубљата ја проби психолошката бариера од 100 рубли за долар за првпат од март минатата година, а не помогна ниту потегот на руската централна банка, која се обиде да го запре падот со суспендирање на купувањето девизи на домашниот пазар до крајот на 2023 година.
Руската валута досега годинава ослабе за околу 25 отсто во однос на доларот, ставајќи ја меѓу трите валути со најлоши резултати на пазарите во развој, заедно со турската лира и аргентинскиот пезос. Нејзината вредност е речиси преполовена во споредба со највисоката точка во јуни минатата година, додека на инвазијата на претседателот Владимир Путин врз Украина не ѝ се гледа крајот, а санкциите, вклучувајќи ги и ограничените цени на нафтата, ги намалуваат приходите од извозот.
Централната банка во средата објави дека ќе престане да купува девизи на домашниот пазар како дел од буџетскиот механизам воведен за заштита на економијата од промените на цените на суровините. Одлуката беше насочена кон „намалување на нестабилноста на финансиските пазари“.
Што велат од „Блумберг економикс“...
„За да се стабилизира рубљата, проценуваме дека каматната стапка мора да се зголеми на 10 отсто, а трошењето на федералниот буџет мора да се држи во рамките на фискалната граница. Рубљата може да има корист од повисоките цени на суровата нафта, но домашната монетарна политика ќе остане посигурно сидро за валутата, Руската централна банка ќе треба да ја зголеми референтната стапка за 50 до 100 базични поени на состанокот на 15 септември за да ги поттикне домашните заштеди и да го намали увозот“.
- Александар Исаков, руски економист
Приходите на руските извозници на нафта и гас паднаа на 6,9 милијарди долари во јули од 16,8 милијарди долари во истиот период минатата година, покажуваат најновите податоци на централната банка. Олеснувањето на ограничувањата за трансфери на пари во странство исто така доведе до забрзан одлив на капитал на странски сметки.
Гувернерката на централната банка Елвира Набиулина постојано укажуваше на влошувањето на условите за надворешна трговија како главна причина за слабоста на рубљата и одби да интервенира за поддршка на девизниот курс.
„Не гледаме никакви ризици за финансиската стабилност“ од падот на рубљата, изјави за новинарите во петокот заменик-гувернерот на руската централна банка Алексеј Заботкин. Централната банка продолжува да се придржува до политиката на флуктуирачки девизен курс, што „ѝ овозможува на економијата ефективно да се приспособи на променливите надворешни услови“, рече тој.
.webp){kind=icon}
