Оди ли сѐ во прилог на доларот: Што ќе го движи курсот евро/долар?

Изгледите Доналд Трамп да ги омекне своите планови за воведување царини на Европската Унија го зајакнаа еврото за околу 1,2 отсто годинава. Дополнително, повисоката инфлација во декември, која изнесуваше 2,4 отсто на годишна основа, укажува на потребата од претпазливост во однос на натамошните потези на ЕЦБ во 2025 година. Доколку инфлацијата не се придвижи кон посакуваното ниво од 2 отсто, ЕЦБ би можела да го прекине дополнителното намалување на каматните стапки (што во моментов не е наше основно сценарио), што би го поддржало зајакнувањето на еврото во однос на американскиот долар. Главен двигател на вкупната инфлација остануваат цените на услугите, кои пораснаа за 4 отсто на годишна основа, поттикнати од каскадното прелевање на растот на платите низ еврозоната, особено во земјите со недостиг од работна сила.

Од фундаментална гледна точка, слабиот раст на западните земји од еврозоната и очекуваниот понизок раст на економијата од оној на САД одат во прилог на слабеење на еврото. Консензусно очекувањe e дека американската економија ќе порасне за околу 2,1 отсто во 2025 година, додека еврозоната би требало да порасне само за 1 отсто. Значи, малку е веројатна опцијата дека ЕЦБ ќе престане да ги намалува каматните стапки. Она што може да оди во прилог на еврото се селективните царини, односно Трамп да одлучува за одредени секторски тарифи, како воената индустрија или технологијата, што сепак ќе го намали притисокот врз еврото.

Сѐ на сѐ, остануваме на нашиот став за годинава (повеќе детали во нашите изгледи за 2025 година на Outlook EUR/USD 2025 Bloomberg Adria). За првиот квартал од 2025 година сè уште очекуваме притисок врз еврото кон паритет (1-1,05), со оглед дека  политиката на новиот претседател веројатно ќе добие појасна форма по 20.1.2025. За остатокот од годината предвидуваме стабилизирање на тензиите поврзани со царините и консолидација на редовите низ ЕУ.

Гледајќи напред, американската политика несомнено ќе игра доминантна улога во обликувањето на глобалните пазари следната година. Доколку САД избегнат наметнување царини за сите производи на ЕУ - или ги наметнат на пониски од очекуваните нивоа - еврото би можело да се врати назад кон нивото 1,08. Сепак, геополитиката е сè уште непредвидлива, особено кога во голема мера е водена од одлуките на еден поединец. Исто така, политичките несогласувања во Франција, Германија и Австрија вршат дополнителен притисок за слабеење на еврото, со оглед на тоа што станува збор за големи економии на Европската Унија. Како резултат на тоа, очекуваме поголема нестабилност во односот ЕУР/УСД, особено на дневна основа, во зависност од насоката на американската фискална и царинска политика, но и од развојот на ситуацијата поврзана со Украина.