Трамп со опуштен став за доларот поттикнува очекувања за подолгорочен пад

Американскиот претседател Доналд Трамп со својот опуштен тон во врска со распродажбата на доларот поттикнува шпекулации дека американската валута е на почетокот на подолгорочно опаѓање.

Доларот го забележа најдлабокиот еднодневен пад од минатогодишното воведување царини, откако Трамп во вторникот изјави дека не смета дека валутата ослабнала прекумерно. Индексот на „Блумберг“ за доларот се намали дури за 1,2 отсто, бидејќи неговите коментари ја намалија привлечноста на доларот и на американските државни обврзници, поттикнувајќи го она што стана познато како „трговија на девалвација“.

За Стивен Џен, основач на „Еуризон СЛЏ“ (Eurizon SLJ Capital), ставот на администрацијата на Трамп за доларот означува почеток на нова фаза на падови, додека тие се насочуваат кон девизен курс што ќе ги поддржи американските извозници.

„Ова многу лесно може да биде почеток на следната фаза на пад на доларот, а многумина можеби не се подготвени за тоа“, напиша Џен, поранешен стратег за валути во „Морган Стенли“ (Morgan Stanley), кој ја разви теоријата за „насмевката на доларот“.

„Постоеше генерација на валутни аналитичари навикнати да работат со силен долар и силна американска економија, а неспособни да се справат со сценариото на слабеење на доларот и силна американска економија.“

Bloomberg

Неодамнешниот пад на доларот е одличен за американските компании, им изјави Трамп на новинарите во Ајова. Иако тоа се совпаѓа со претходните коментари на американските официјални лица, неговите изјави ги придвижија валутните пазари доцна во вторникот, делумно затоа што изгледаше дека го потврдуваат наглиот пад на доларот во последните сесии.

Индексот на „Блумберг“ за доларот се спушти на најниско ниво во речиси четири години во тргувањето во Њујорк, пред делумно да ги намали загубите во Азија. Падот на доларот придонесе и еврото и фунтата да достигнат најсилни нивоа од 2021 година, додека швајцарскиот франк се искачи на највисоко ниво од 2015 година. Во Азија, јужнокорејскиот вон и малезискиот рингит предводеа со растот во однос на американската валута.

„Кога човек што со јавни изјави застанува во одбрана на валутата звучи рамнодушно, впечатокот дека доларот има сигурна потпора слабее“, рече Ентони Дојл, главен инвестициски стратег во „Пинакл“ (Pinnacle Investment Management) во Сиднеј.

„Пазарите повторно го отвораат прашањето дали САД бараат од инвеститорите да прифатат понизок стандард на стабилност и затоа бараат повисока цена за преземање на американскиот ризик.“

Прифаќањето на послабиот долар од страна на Трамп може да се гледа како дополнителен фактор што ги одвраќа странските сопственици на американски средства, по заканите со царини кон клучни сојузници, нападите врз независноста на Федералните резерви и непредвидливото креирање политики. Неговата очигледна рамнодушност кон падот на доларот некои ја толкуваат како уште еден сигнал за продажба на валутата и забрзување на „тивкото повлекување“ од средства како американските државни обврзници.

Што велат стратезите на „Блумберг“...

„Односот меѓу ризикот и добивката за американската валута и понатаму е силно наклонет кон дополнително слабеење.“

- Гарфилд Рејнолдс, тим-лидер на МЛИВ Азија (MLIV Asia). 

Најмалку еден пазарен показател укажува на растечка загриженост за подолгорочен пад на американската валута.

Показателот на таканаречените „ризик-реверзали“ (пазарен индикатор што ја мери побарувачката за заштита од слабеење на доларот) во однос на главните конкуренти во вторникот се спушти на најниско ниво од јуни, покажа индексот на „ЏП Морган“ (JPMorgan Chase & Co.). Тоа сигнализира зголемена побарувачка кај инвеститорите за заштита од послаб долар на пазарите на опции.

Сепак, не сите ги гледаат коментарите на Трамп како почеток на подолгорочна распродажба на доларот.

„Коментарите на претседателот Трамп се знак дека американската администрација не е против неодамнешниот пад на доларот, особено затоа што САД сакаат валутите како кинескиот јуан и јапонскиот јен да зајакнат“, рече Родриго Катрил, валутен стратег во Националната банка на Австралија (National Australia Bank Ltd.) во Сиднеј.

„Не мислам дека претседателот сака да поттикне генерациска промена кај доларот, но нејасниот став за валутата додава уште еден слој неизвесност“, рече тој.

Долготрајното слабеење на доларот носи и низа опасности за американската економија, посочува Роберт Каплан, заменик-претседател во „Голдман Сакс“ (Goldman Sachs Group Inc.).

„Точно е, послабиот долар го поттикнува извозот. Но САД имаат долг од 39 билиони долари, кој се движи кон над 40 билиони, а кога имате толку голем долг, мислам дека стабилноста на валутата веројатно е поважна од извозот“, рече тој во интервју за „Блумберг ТВ“.

„Всушност мислам дека САД ќе сакаат стабилен долар и поголема стабилност. Тие сакаат да можат да продаваат долгорочни државни обврзници: стабилниот долар помага“, додаде тој.