Среброто потона далеку под 80 долари за унца на крајот од неделата обележана со екстремни ценовни осцилации, носејќи нов бран нестабилност на пазарот што годинава важи за еден од најтурбулентните.
Белиот метал до средата скокна дури 11,3 отсто во текот на неделата, поттикнат од ентузијазмот на инвеститорите за акциите поврзани со вештачката интелигенција и индустриските метали што се користат во енергетските системи, каблите и ладењето на дата-центрите. Шпекулациите околу достапноста на гориво во Перу, најголемиот производител, исто така ги поддржаа цените во понеделникот.
Потоа цената повторно нагло се спушти по новите сигнали дека војната со Иран ја поттикнува инфлацијата, што ги натера инвеститорите да бараат повисоки приноси од државните обврзници. Повисоките трошоци за задолжување негативно влијаат врз среброто, кое вообичаено не носи каматен принос. Среброто во петокот падна дури 9,3 отсто, на 75,78 долари за унца, додека нагло се намалија и инвестициските облози поврзани со бумот на вештачката интелигенција.
За среброто, ваквите остри осцилации потсетуваат на првите недели од годинава кога трговците го нарекоа практично „нетргувано“, откако во еден ден загуби дури 36 отсто од вредноста.
Прашањето за инвеститорите сега е дали среброто, кое и натаму е повеќе од 130 отсто поскапо отколку пред една година, целосно се одвоило од шпекулативната еуфорија што ги оттурна цените надвор од дофатот на многу долгорочни инвеститори, златари и производители.
Среброто потона под 80 долари за унца
Bloomberg
„И понатаму сметаме дека среброто е фундаментално преценето“, напиша оваа недела Џејмс Стил, главен аналитичар за благородни метали во „ХСБЦ“ (HSBC Holdings Plc). Побарувачката за металот во индустријата и кај накитот ќе продолжи да слабее поради високите цени, оцени тој.
Повисоките трошоци веќе ги натераа дел од производителите и златарите да ги редизајнираат производите и да користат поевтини материјали. Особено соларната индустрија, која троши повеќе од една петтина од годишното производство на сребро, веќе почна да го заменува среброто со бакар во дел од производството, бидејќи бакарот е втор најпроводлив метал по среброто.
Во 2023 година, среброто учествувало со само 3,4 отсто во вкупната цена на еден соларен панел, според „Блумберг НЕФ“ (BloombergNEF). Кога цената годинава се приближи над 90 долари за унца, неговото учество порасна на 29 отсто.
Сепак, за помал пазар како среброто, чија годишна рударска понуда според сегашните цени вреди околу 64 милијарди долари, доволен е релативно мал прилив на средства од мали или професионални инвеститори за цените повторно нагло да пораснат. И поединечни инвеститори претходно предизвикувале ценовни шокови со купување голем дел од достапната понуда, како што направи „Беркшир Хатавеј“ (Berkshire Hathaway Inc.) на Ворен Бафет во 1998 година или браќата Хант во 1980-тите.
„Лондонскиот пазар беше зафатен од историски бран на панично купување во октомври, кога стравувањата од царини го спречија излегувањето на металот од преполните складишта во САД. Подоцна милиони унци сребро пристигнаа во Лондон и ја ублажија кризата, но искуството со акутен недостиг и понатаму создава нервоза на пазарот.
„Тензиите на пазарот на сребро поради заканите со царини значително се намалија, но не се целосно исчезнати“, напиша Стил, додавајќи дека среброто и натаму има потенцијал „нагло да скокне поради закани со царини, без разлика дали се реални или се само последица на стравувањата на пазарот.“
Октомвриското панично купување на среброто беше без преседан
Трошоците за задолжување достигнаа рекордно ниво додека ликвидноста пресушуваше
Bloomberg
Поддржувачите на растот на среброто тврдат дека постојат многу добри причини за инвестирање во благородниот метал, вклучително и како заштита од инфлација и слабеење на валутите во развиените економии. Среброто долго време има и култен статус кај малите инвеститори, од кои дел веруваат во популарна теорија на заговор дека цените се намерно потиснувани од големи банки и институции.
Сè поголем дел од шпекулативното тргување на малите инвеститори се префрла на помалку транспарентни платформи, вклучително и договори за разлика и девизни платформи популарни во Азија и на Блискиот Исток, според Ники Шилс, шефица за стратегија за метали во „МКС Памп“ (MKS Pamp SA).
Овие текови тешко се следат директно, но на крајот се прелеваат на фјучерс и меѓубанкарските пазари, додека провајдерите се заштитуваат од ризик. Во комбинација со берзанските фондови поддржани со сребро и краткорочните високоризични опции, кои помогнаа металот да достигне рекордно ниво во јануари, среброто сè повеќе се тргува на платформи популарни кај помладите инвеститори навикнати на криптовалути. За нив, нестабилноста на среброто не е ниту неочекувана ниту непожелна.
„Ова е интересна пресвртна точка и голем дел од тоа е водено од цената“, изјави Шилс во интервју во четвртокот.
„Ако среброто ја пробие границата од 100 долари за унца, ќе привлече уште повеќе мали инвеститори, страв од пропуштање и брз капитал. Тој бран би се вратил со полна сила.“
Силната побарувачка од Кина помогна да се спречи понатамошен пад на цените откако растот почна да слабее на крајот од јануари. Високите домашни цени ги поттикнаа трговците да испраќаат сребро од целиот свет за да заработат од разликите во цените, при што голем дел од металот минувал преку Хонг Конг.
Рекордниот увоз на сребро во Кина помогна да се поддржат цените.
Bloomberg
Во поново време, трговците велат дека физичката побарувачка во најголемиот светски потрошувач на овој метал е слаба. Премиите за сребро во Шангај се движат околу неутрално ниво. Неодамнешниот раст на увозот во март одразува силна побарувачка на почетокот од годината, а не тековно купување, изјави Сонг Џјангжен, истражувач во „Гуангдонг Саутерн Голд Маркет Академи“ (Guangdong Southern Gold Market Academy).
Во пазарот Шуибеи во Шенжен, центарот на кинескиот пазар за малопродажба на благородни метали, расположението е млако.
„Нема вистинска можност за профит во малопродажбата“, рече Сонг.
„Шпекулативниот капитал само постојано кружи од едно во друго вложување.“
.webp){kind=icon}
