.webp){kind=icon}
Парно за граѓаните ќе има непречено до крајот на грејната сезона, уверува министерот за економија, Крешник Бектеши. Според него, нема да има никаков проблем ниту со снабдувањето со струја на домаќинствата и останатите потрошувачи кои се на регулираниот пазар.
Бектеши заедно со дитректорот на ЕСМ АД, Васко Ковачевски денеска, на стартот на грејната сезона, беше во посета на Топлана Исток.
„Откако АД ЕСМ ги направи и ги заврши сите подготовки скопјани имаат парно греење. Тоа ќе биде до крајот на грејната сезона. Граѓаните во континуитет ќе бидат снабдувани со топлинска енергија. Затоа не треба да се создава паника, бидејќи сите институции се подготвени навремено да го испорачуваат тоа што им е обврска“, рече Бектеши.
Во врска со снабдувањето со електрична енергија министерот за економија истакна дека потрошувачите цела зимска сезона ќе бидат снабдувани во континуитет со електрична енегија од домашни капацитети.
„Ние не зависиме од другите држави. Ние сами се подготувавме за се да покриваме домашно за да немаме зголемување и на цените и дополнително на тоа да не зависиме од тоа што би се случило во регионот, во Европа или, пак, глобално. Затоа сите капацитети се ставаат веќе во функција. Електрична енергија имаме во континуитет за сите наши граѓани и тоа ќе биде до крајот на грејната сезона“, рече Бектеши.
Директорот на АД ЕСМ Васко Ковачевски истакна дека граѓаните треба да бидат безбедни и оти ќе бидат обезбедени со топлинска енергија.
„Имаме обезбедено енергенс до крајот на месецов, а следствено на тоа како понатаму ќе функционира приватната гасна централа ТЕ-ТО ќе знаеме дали ќе повлекуваме топлинска енергија од ТЕ-ТО или и понатаму целосно ќе произведуваме топлинска енергија во нашите топлани коишто ги имаме под закуп од АД „Адора“ во топланите Исток и Запад. Утринава во 5:50 часот беа пуштени топланите при температура од 9 степени, истите работеа до 9:15 минути кога се постигна надворешна температура од 12 степени и притоа во овој период беа испорачани 997 мегават часови топлинска енергија“, рече Ковачевски.
Со оглед дека првично од АД Макпетрол беше набавен гас само за првите две недели од почетокот на грејната сезона, Ковачевски појасни, дека гас ќе се набавува дополнително, и тоа по пониски цени бидејќи, како што рече, тие се во опаѓање. Доколку има некакви промени, и има екстремно високи цени на гасот или пак ако го нема на пазарот, се прават подготовки топланите исток и запад да работат на дизел гориво, за што АД ЕСМ ги прави потребните набавки на опрема и пред се на пумпи за таа намена.
Според Ковачевски, има разговори и за шестмесечна набавка и испорака на природен гас по цена пониска од сегашната од компании надвор од државата.
Во врска со снабдувањето со електричната енергија, Ковачевски истакна дека самото намалување на температурите повлекува поголема потрошувачка, но, како што вели, АД ЕСМ максимално е подготвено за стартот на грејната сезона и во овој дел.
„Денеска во функција се ставени и блокот 1 и блокот 2 во РЕК Битола, денеска почнува со работа и блокот 1 којшто во претходните 23 дена беше во ремонт. Иако, да потсетам за јавноста, еден ваков ремонт трае околу 45 дена, со зголемен ангажман на нашите вработени посебно на вработените во РЕК Битола и ангажманот исклучиво на домашни компании успеавме за толку краток период да го подготвиме блок 1 и денеска се става во систем и ќе биде во функција во текот на цела грејна сезона. Во функција исто така е и термоелектраната во Осломеј којашто ќе работи уште еден краток период, потоа ќе се направи еден краток застој за да може да се направат кратки сервисни интервенции и од почетокот на ноември да биде во функција до крајот на грејната сезона“, вели Ковачевски.
Тој информира и дека ТЕЦ Неготино во моментов работи со двата котли, со максимален капацитет од околу 180 мегавати и има дневна испорака од околу илјада тони мазут кој овозможува непрекинато работење на оваа термоелектрана.
„Што се однесува пак до хидропотенцијалот него во овој период најмалку го користиме. Во моментот е на ниво од околу 30-ина проценти, а тоа е просек за овој период на годината. Во изминатите неколку месеци ја штедевме водата, го намаливме производството на електрична енергија од хидропотенцијалот за дури 30 проценти. Следствено на тоа, пак, го зголемивме производството на електрична енергија од термокапацитетите во Битола и во Осломеј за дури 25 проценти. Целосно сме ангажирани, целосно сме мотивирани во време на енергетска криза да успееме максимално колку што е можно повеќе да произведеме домашна енергија и тоа го правиме со сите наши расположливи капацитети“, рече директорот на АД ЕСМ.
