.webp){kind=icon}
Европскиот природен гас се движи кон пад четврти ден едноподруго, бидејќи речиси рекордниот увоз на течен природен гас и резервите, кои се поголеми од нормалното, дополнително ја намалуваат загриженоста за испораките.
Референтните термински договори паднаа дури за девет проценти, спуштајќи се под нивото од 100 евра за првпат во повеќе од еден месец. Температурите во поголемиот дел од континентот остануваат ниски, а резервите на природен гас помагаат за намалување на цената.
„Ладниот бран и благата и ветровита прогноза за наредните две недели, како и рутински ниското индустриско производство во текот на Божиќ, претставуваат мечкини двигатели“, вели Том Марзек-Менсер, раководител за аналитики со гас во ИЦИС (ICIS) во Лондон.
Движење на цената на гасот во Европа / Bloomberg
Холандските месечни договори за гас, кои претставуваат европско мерило, достигнаа 96,16 евра за мегават-час, најниско ниво од 27 октомври. Инаку, гасот утрово се тргува за 7,3 проценти пониско, на 97,96 евра. Еквивалентот во Велика Британија падна за 6,9 проценти.
Европските складишта за гас се пополнети околу 83 проценти, што е над петгодишната сезонска норма. Тоа го покажуваат податоците на „Гас инфрастракчр“ (Gas Infrastructure Europe). Се очекува дека резервите од Русија испратени преку Украина, исто така, ќе бидат стабилни, при што „Газпром“ ги користи алтернативните врски за испорака на горива откако еден од неговите локални гасоводи неделава е оштетен од пожар.
Ограничување на цената на гасот во ЕУ
Некои аналитичари на индустријата се загрижени дека ограничувањето на цените, кое Европската Унија го планира за следната година, може да ги обесхрабри доставувачите ако гасот поскапи на другите места, особено во Азија.
„Засега тоа нема влијание на испораките на течен природен гас во Европа, но внимателно ќе се следи состојбата со надолниот тренд на европските цени на гасот“, наведува аналитичката платформа „Енерџискен“ (EnergyScan).
Од ЕУ велат дека новата алатка за цените нема да се активира ако тие се слично високи со другите пазари.
„Механизмот е доволно флексибилен за да обезбеди европскиот пазар да остане привлечен за трговците“, рече чешкиот министер за индустрија Џозеф Сикела во денешниот разговор за Блумберг ТВ.
„Со оглед на вградените предупредувања, новата политика на ЕУ за ограничувањата на цената веројатно нема воопшто да биде активирана следната година. Се чини дека единствена работа околу која земјите се согласни е дека максималното ценовно ниво е навистина потребно за да се покаже единство“, сметаат аналитичарите од „Капитал економикс“ (Capital Economics).
