Може ли златото да ја пробие границата од 2.000 долари?

Златото ја заврши годината блиску до нивото на цените со кое започна 2022 година, односно околу 1.800 долари за унца од 31,1 грам. Во меѓувреме, цената на благородниот метал се приближи до рекордно високо ниво, а потоа достигна најниско ниво во последните две години. Кон крајот на годината цената повторно порасна, а според аналитичарите растот ќе продолжи и годинава.

Во 2023 година, цената на златото повторно би можела да ја пробие границата од 2.000 долари за унца, како што беше во март 2022 година, по руската инвазија на Украина, кога цената го достигна годинешниот максимум од 2.050 долари. Највисокото ниво на сите времиња беше достигнато во 2020 година, на 2.063 долари за унца.

„Го гледаме златото како најголем добитник додека светот се лизга кон рецесија и ги принудува централните банки да го променат курсот“, напиша во извештај вишиот макроекономски стратег на „Блумберг интелеџенс“, Мајк Мекглон.

Цените би требало повторно да паднат во 2024 и 2025 година, прогнозираат аналитичарите во анкетата на „Блумберг“, предвидувајќи просечна цена од 1.830 долари за унца злато во 2023 година.

Во 2022 година, американската централна банка (ФЕД) ја спроведе најагресивната политика на монетарно затегнување во последните 40 години, со цел да ја смири инфлацијата, која во повеќето развиени земји е околу десет отсто, што е пет пати повеќе од нивото посакувано од централните банки. До последниот квартал, зголемувањето на каматните стапки на ФЕД го зајакна доларот во однос на другите валути и во однос на стоките, кои главно се деноминирани во долари, вклучувајќи го и златото.

На крајот на годината, Европската централна банка (ЕЦБ) и Банката на Англија (BoE) станаа поагресивни во затегнувањето, што го ослабна доларот и цената на златото закрепна од најниското ниво од 1.622 долари за унца во септември. На последниот состанок, ФЕД ја ублажи монетарната политика со зголемување на каматните стапки за 50 базични поени, наместо за 75, што укажува на постепено олеснување на циклусот во 2023 година.

Цените беа поддржани и од солидната побарувачка за злато во втората половина од годината, особено од централните банки, кои купија рекордни 400 метрички тони метал во третиот квартал, според податоците на „Блумберг“. Најголем дел од дополнителните набавки беше направен од банките во земјите во развој, кои сакаа да ја намалат изложеноста на средства деноминирани во долари и да избегнат послаби приноси на клучните резервни валути.

„Иако очекуваме овој тренд малку да забави на глобално ниво во 2023 година, силите што моментално ги засегаат централните банки ќе продолжат да бидат присутни следната година и понатаму. Така, годишните купувања може да останат над просекот“, напишаа во извештајот аналитичарите на „Блумберг интелеџенс“.

Во 2022 година прометот би можел да достигне 750 тони, што е значително над минатогодишниот просек од 513 тони.

Според истражувањето на Светскиот совет за злато, благородниот метал беше класа на средства со најдобри резултати во периодот на стагфлација, додека акциите западнаа во најмногу проблеми. Според „Блумберг интелеџенс“, стагфлацијата е разумно сценарио за првата половина на 2023 година.

Додека американскиот референтен индекс S&P 500 загуби околу 18 отсто во 2022 година, златото заврши блиску до почетната точка.

Златото исто така има добри резултати во рецесиите предизвикани од надворешни шокови. Историски гледано, благородниот метал „победи“ на пазарот за време на нафтената криза во 1970-тите и за време на ковид-19. Сличен надворешен шок се војната во Украина и поврзаната енергетска криза, која некое време ќе го кочи економскиот раст, а во истовремено ја одржува инфлацијата на високо ниво.