Глобалната побарувачка на нафта ќе достигне врв оваа деценија

Глобалната побарувачка за нафта ќе го достигне својот врв оваа деценија, предвиде за прв пат Меѓународната агенција за енергија, во услови на зголемена популарност на електричните автомобили и заладувањето на кинеската економија.

Рекордната побарувачка, која агенцијата исто така ја предвидува за јагленот и за природниот гас, не значи дека е неизбежен брз пад на потрошувачката на фосилни горива. Тоа веројатно ќе биде еден вид „висорамнина која ќе трае многу години“. Побарувачката останува превисока за да се ограничи глобалното затоплување на 1,5 Целзиусови степени, соопшти ИЕА. 

Светот ќе троши дури 102 милиони барели нафта на ден до крајот на 2020-тите, при што волуменот ќе падне на 97 милиони барели дневно до средината на векот, според основниот случај наречен Сценарио за наведени политики, што го презентира ИЕА денес во годишните очекувања за енергетиката во светот.

„Транзицијата кон чиста енергија се случува ширум светот и таа е незапирлива“, рече извршниот директор на ИЕА, Фатих Бирол. „Тврдењата дека нафтата и гасот претставуваат безбеден или сигурен избор за светската енергетска и климатска иднина изгледаат послаби од кога било“.

Побарувачката на нафта во петрохемиските, воздухопловните и бродските индустрии ќе продолжи да се зголемува до 2050 година, но тоа нема да биде доволно за да се компензира помалата побарувачка од патниот транспорт во услови на „неверојатен пораст на продажбата на електрични возила“, соопшти ИЕА.

Кина, која со години го поттикнува растот на глобалната потрошувачка на сурова нафта, ќе забележи слабеење на апетитот во следните неколку години, со опаѓање на вкупната потрошувачка на долг рок, се вели во извештајот.

Глобалната потрошувачка на нафта ќе го следи истиот пат како и побарувачката за други јаглеводороди. „Ние сме на пат да го видиме врвот на употреба на сите фосилни горива пред 2030 година“, соопшти ИЕА. Ова е првпат сите сценарија изготвени од париската агенција за глобални енергетски пазари да укажуваат на краткорочен пад на потрошувачката на јаглеводороди.

Основниот случај на ИЕА ги одразува енергетските политики што моментално ги спроведуваат владите ширум светот и континуираните последици од минатогодишната енергетска криза. Второто сценарио на ИЕА, кое претпоставува дека сите влади целосно и навреме ги исполнуваат своите ветувања за енергијата и климата, предвидува глобалната побарувачка на нафта да достигне врв од 93 милиони барели дневно во 2030 година, со пад до 55 милиони барели дневно во 2050 година.

Сценариото за нето нула емисии во кое глобалното затоплување е ограничено на 1,5 Целзиусови степени предвидува пад на глобалната побарувачка до 77 милиони барели дневно во 2030 година и нешто под 25 милиони барели дневно во 2050 година.

Процесот на декарбонизација на глобалната економија „ќе биде долг, а производителите на фосилни горива ќе останат влијателни“ во годините што доаѓаат, според извештајот.

Во основниот случај, Русија и Организацијата на земји извознички на нафта ќе го задржат заедничкиот удел на пазарот на нафта од 45 до 48 проценти до крајот на оваа деценија. До средината на векот, тоа ќе се искачи над 50 проценти благодарение на поголемото производство во Саудиска Арабија, која де-факто е лидер на ОПЕК.

Русија, од друга страна, ќе загуби околу 3,5 милиони барели дневно, или приближно една третина, од своето производство на нафта до 2050 година, „бидејќи се бори да го одржи производството од постоечките полиња или да развие нови поголеми“, спорецд ИЕА.

ИЕА, исто така, претпоставува дека во годините што доаѓаат Иран и Венецуела ќе можат да го зголемат своето производство благодарение на постепеното олеснување на меѓународните санкции.

Сепак, со текот на времето, пазарната моќ на главните производители на нафта ќе опаѓа, предупреди агенцијата.

Во моментов нема коментари за веста. Биди прв да коментира...

Остави коментар