Египет ќе го продолжи извозот на течен природен гас (ЛНГ), по повеќемесечна пауза, бидејќи се зголемија испораките на гас од Израел.
Бродот „Адам ЛНГ“ пристигна во египетската постројка во Идку, според податоците за следење бродови на „Блумберг“. Тоа значи дека северноафриканската земја се враќа на прекуокеанските пратки, изјави извор на „Блумберг“ запознаен со состојбата со извозот на ЛНГ од Египет. Континуираните испораки од Египет најверојатно ќе ја зголемат понудата за Европа, што ќе влијае на пад на цената на гасот на Стариот Континент.
Египет претходно соопшти дека извозот ќе се врати во нормала во октомври, по летниот прекин поради зголемената локална потрошувачка. Сепак, минатиот месец беа испратени само мали количества од резервоарите за складирање во Идку, а плановите за зголемување на извозот беа суспендирани откако главниот снабдувач Израел затвори клучно гасно поле по нападите на Хамас на 7 октомври.
Bloomberg
Израелските текови сега се вратија на предвоените нивоа, а намалената побарувачка во Египет поради малку пониските температури го ослободи гасот за извоз, вели изворот на „Блумберг“ запознаен со планот.
Минатата година египетскиот ЛНГ главно одеше во Европа. Европските земји ја започнаа зимата со полни складишта за гас, што помогна да се задржат цените под контрола. Сепак, Европа ќе продолжи да се потпира на ЛНГ за да ги помине најстудените месеци откако Русија го намали снабдувањето по војната во Украина. Египет прави пресметки за тоа колку од овој гас би можел да извезе зимава, велат изворите.
Носачот „Адам ЛНГ“ сè уште не сигнализира каде ќе оди од терминалот во Идку, според податоците за следење на бродот. Бродот бил на пат да се товари во Тринидад и Тобаго пред да се сврти во петокот и наместо тоа да се закотви во Идку во вторникот, покажаа податоците.
Извозот на ЛНГ од Египет, најнаселената арапска земја со амбиции да стане регионален гасен центар, би можел да биде за 40 отсто помал оваа зима отколку што беше прогнозирано еден месец порано, според „Блумберг НЕФ“ (BloombergNEF). Пред војната, Израел се согласи да извезе повеќе гас во Египет од наоѓалиштето Тамар на Медитеранот.
.webp){kind=icon}
