Дизелот повторно поскапува

Од ноќеска на полноќ дизелот ќе се продава за 72 денари за литар. Регулаторната комисија за енергетика по вчерашното вонредно поскапување од 2,5 денари за литар, денеска повторно одлучуваше за цената на нафтените деривати и донесе одлука за поскапување од два денари. Цената на бензините останува иста.

РКЕ соопшти дека со оваа одлука се врши зголемување на малопродажните цени на нафтените деривати во просек за 0,57 отсто во однос на малопродажните цени на нафтените деривати што беа утврдени вчера.

Тензиите на Блискиот исток се причина за забрзаниот раст на цените на нафтените деривати.

„Референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 5,314 отсто или за 37,950 $/тон, кај дизелот зголемувањето е во просек за 4,601 отсто или за 32,500 $/тон, кај екстра лесното масло зголемувањето е во просек за 4,326 отсто или за 30,150 $/тон и кај мазутот зголемување во просек за околу 2,135 отсто или за 9,900 $/тон, поради што во структурата на цените на нафтените деривати е извршено соодветно приспособување. Курсот на денарот во однос на доларот во изминатиот период, во просек изнесува 53,2998 ден/$ и е за околу 0,1781 отсто понизок од курсот на доларот (53,3949 ден/$) по кој беа формирани цените со претходната пресметка“, се наведува во соопштението на РКЕ.