Растот на продажбата на автомобили во Европа забавува под притисок на инфлацијата

Продажбата на автомобили во Европа во мај порасна четврти месец по ред, бидејќи потрошувачите купуваа подостапни електрични и хибридни модели, иако растечката инфлација почнува да остава последици врз побарувачката.

Регистрациите на нови возила се зголемија за 3,6 отсто, на 1,15 милион единици минатиот месец, соопшти во вторникот Европската асоцијација на производители на автомобили. Продажбата порасна на големите пазари, вклучувајќи ги Франција и Обединетото Кралство, при што испораките на електрични и хибридни автомобили го надоместија падот кај возилата со мотори на фосилни горива.

Продажбата на нови автомобили во Европа порасна за 3,6 отсто во мај

Извор: European Automobile Manufacturers' Association

Побарувачката за електрични возила добива поттик од високите цени на горивата, бидејќи конфликтот на Блискиот Исток ограничува дел од глобалното снабдување со нафта. Додека плаќаат повеќе на бензинските станици, потрошувачите стануваат сè позагрижени и поради војната со Иран и нејзините долгорочни последици врз цените.

Европската централна банка овој месец првпат од 2023 година ги зголеми каматните стапки, откако инфлацијата забрза на 3,2 отсто, над целта од два отсто.

Минатата недела БMВ (BMW AG) беше меѓу првите компании што јасно посочија дека војната на Блискиот Исток негативно влијае врз расположението на потрошувачите низ светот. Според аналитичарите на „Окскап Аналитикс“ (Oxcap Analytics), тоа намалување на побарувачката би можело да изврши притисок врз производителите на автомобили за масовниот пазар, како „Рено“ (Renault SA) и „Стелантис“ (Stellantis NV).

Сепак, растот на продажбата носи одредено олеснување за европските производители на автомобили, кои се соочуваат со низа предизвици, меѓу кои се забавувањето во Кина и американските царини.

Електричните возила стануваат сè попопуларни благодарение на подостапните модели од производители како „Фолксваген“ (Volkswagen AG) и „Стелантис“, како и од кинеските брендови предводени од БЈД (BYD Co.).

Во Германија, најголемиот европски пазар, каде што е воведена нова субвенција, продажбата на електрични возила скокна за 39 отсто, надоместувајќи го падот на побарувачката за возила со мотори на фосилни горива.

На ниво на регионот, регистрациите на целосно електрични возила и приклучни хибриди пораснаа и достигнаа 34 отсто од вкупниот број. Продажбата на бензински и дизелски возила падна за по 19 отсто, што дополнително потврдува дека на пазарот се случува структурна промена.

Резултати од продажбата на автомобили во Европа

Како поминаа најголемите производители во мај

Извор: European Automobile Manufacturers' Association

Кинеските брендови продолжуваат да навлегуваат на европскиот пазар, и преку продажба на сопствени автомобили и преку партнерства со европски конкуренти за искористување на вишокот производствени капацитети на континентот.

Во Обединетото Кралство кинеските брендови учествуваа со 16,3 отсто од регистрациите во мај, при што теренското возило „џаеку 7“ на „Чери“ (Chery Automobile Co.) беше четвртиот најпродаван модел, според Џилијан Дејвис, аналитичар во „Блумберг интелиџенс“ (Bloomberg Intelligence).

И на другите пазари кинеските производители добиваат на значење. Продажбата на „Чери“ се зголеми повеќе од трипати, продажбата на БЈД повеќе од двојно, а раст забележа и „САИК мотор“ (SAIC Motor Corp.), сопственик на некогашниот британски бренд МГ (MG).

Иако бројките сè уште се релативно мали, оваа побарувачка помогна во растот на вкупниот број регистрации во мај.

Во Германија регистрациите на БЈД се зголемија трипати, со што компанијата достигна пазарен удел од 2,6 отсто. Нејзиниот модел „ато 2“ (Atto 2) беше најпродаван приклучен хибрид во земјата минатиот месец, според германската КБА.