Кога акциите за вештачка интелигенција паѓаат - три стратегии за заштита на капиталот

Додека инвеститорите низ светот се радуваат на растот на вредноста на акциите поврзани со вештачка интелигенција (ВИ), поискусните аналитичари почнуваат да го вклучуваат алармот. На површина сè изгледа како приказна за технолошки напредок и нова индустриска револуција, но зад сцената веќе се појавуваат првите знаци на претпазливост.

Аналитичарите на „Блумберг Адрија“ предупредуваат дека сегашниот раст на акциите носи препознатливи симптоми на прегреан пазар, мал број технолошки гиганти го туркаат индексот кон рекорди, додека поширокиот сегмент на пазарот заостанува. Со други зборови, пазарот веќе не дише со полни гради.

„Десетте најголеми компании сочинуваат околу 40 отсто од индексот S&P 500, што е историски висока концентрација“, предупредуваат аналитичарите. Овој податок потсетува на периодите пред колапсот на дот-ком (dot-com) компаниите во 2000-тите години, кога индексите исто така зависеа од мала група акции што изгледаа незапирливо.

Досега видовме како вреднувањата на многу ВИ-стартапи не се усогласени со нивните приходи, додека капитал од ризични фондови ги „пумпа“ очекувања без конкретни резултати. Поконкретно кажано, многу компании, особено стартапи и фирми со високи очекувања, можеби нема да го издржат падот, бидејќи маржите и приходите често се преценети.

Овие знаци се вреден потсетник дека балоните пукаат нагло, често без големо предупредување. Целта не е да се паничи, туку да се изгради отпорност.

Во вакво опкружување, прашањето не е дали ќе има корекција, туку кога и како ќе реагираат инвеститорите. Ако се повтори сценариото од 2000 или 2021 година, кога и најстабилните технолошки акции изгубија двоцифрени проценти на вредноста, малите инвеститори ќе мора да се заштитат со паметно управување со ризикот.

Револуцијата е во примена на технологијата

Затоа, ви претставуваме три клучни стратегии што ќе ви помогнат да се заштитите од можното пукање на ВИ-балонот без паника, но со подготвеност.

Диверзификацијата кон други региони е една од стратегиите што може да имаат смисла. Според извештаите на „Блумберг Адрија“, американски капитал сè повеќе влегува на европските пазари, а аналитичарите сметаат дека Европа може да биде „убедлива приказна“ за инвеститорите што бараат алтернатива надвор од САД.

Ситуацијата покажува дека сега е вистинско време за диверзификација надвор од САД, особено во светло на високите вреднувања во САД и неизвесноста. Префрлање на фокусот од високо вреднуваните американски технолошки акции на пазари и сектори со пореални мултипликатори.

Кога станува збор за регионалните можности на пазарите како што се словенечкиот и хрватскиот, тие се навистина евтини.

Втората стратегија е златото, кое служи како класично „сигурно прибежиште“ во времиња на паника, но треба да се надополни со имот што штити од специфични економски ризици.

 

Bloomberg

 

Според аналитичарите на „Блумберг Адрија“, најдобра долгорочна заштита е онаа што функционира најдобро. Без оглед на краткорочните флуктуации и балони, најефикасна одбранбена стратегија за малите инвеститори се временскиот хоризонт и доследноста.

Таа може да се подели на два сегмента. Првиот е долгорочниот хоризонт, бидејќи пазарните балони и кризи се краткотрајни. Со долгорочен инвестициски хоризонт (10+ години), шоковите се ублажуваат, а капиталот со текот на времето ги надоместува загубите.

Вториот сегмент се редовни уплати. Стратегијата Dollar-Cost Averaging (DCA) подразбира редовно инвестирање фиксни износи. Кога цените паѓаат, односно кога се случува пукање на балоните, со ист износ купувате повеќе акции/имот. На тој начин падот на цените станува ваша шанса за профит, а не извор на страв.

Сè има своја цена

Вештачката интелигенција сигурно го менува светот, од бизнис-моделите до секојдневниот живот. Но, како што истакнуваат аналитичарите, вистинската револуција не се случува на берзата, туку во примената на технологијата. Пазарот, сепак, е склон на претерување кога ентузијазмот прераснува во еуфорија и границата помеѓу реалната вредност и очекувањата станува сè послаба.

Затоа, инвеститорите што сакаат да преживеат долгорочно мора да задржат ладна глава. Вештачката интелигенција не е проблем, проблемот е кога плаќаме премногу за иднина што сè уште не се случила.

Стратегиите како диверзификација во региони со попрактични вреднувања, инвестирање во злато како заштита од шокови и дисциплина преку долгорочен хоризонт и DCA-пристап не се само одбранбени механизми туку се и алатки за рационално преживување на секоја еуфорија.

Балоните, било ВИ, дот-ком или крипто, секогаш имаат заедничка точка, а тоа е дека пукаат во моментот кога инвеститорите забораваат дека и најнапредната технологија има своја цена. Тие што навреме го сфаќаат тоа, обично го преживуваат падот.