Иран ќе ја стопира пловидбата низ Ормуз за да не ги загрози мировните преговори

Иран размислува за краткорочна пауза на испораките преку Ормускиот Tеснец за да избегне тестирање на американската блокада и да не ја загрози новата рунда мировни преговори, велат анонимни извори блиски до власите во Техеран.

Потенцијалната пауза ја одразува желбата да се избегне непосредна ескалација во чувствителен дипломатски момент, додека Вашингтон и Техеран ги договараат логистичките детали за нова директна средба, тврдат изворите.

Амбасадата на Иран во Велика Британија и министерството за надворешни работи во Техеран веднаш не одговорија на барањата за коментар.

САД и Иран разгледуваат понатамошни преговори за продолжување на примирјето, објави „Блумберг“ во понеделникот, додека претседателот Доналд Трамп продолжува со поморската блокада за да го ограничи извозот на нафта од Исламската Република. Целта е да се одржат нови разговори пред примирјето да истече следната недела.

Задржувањето на поморската активност неколку дена се смета за една можна, прагматична мерка за спречување инцидент што би можел да ги поткопа кревките напори за оживување на дискусиите, велат изворите.

Сепак, пресметките на Иран остануваат променливи, велат тие. Исламската револуционерна гарда би можела брзо да го смени курсот, на пример, за да покаже дека американската блокада може да се оспори без последици - потег што би ризикувал да го поткопа дипломатскиот процес.

Трговците со нафта внимателно ги следат сите транзити низ клучниот Ормуски Теснец, при што Техеран го блокира речиси целото бродарство што не е од Иран, а САД сега спроведуваат сопствена блокада. Досега, Иран беше речиси единствената земја што испраќаше нафта преку водниот пат за време на конфликтот.