Накратко од светот: Биткоинот надмина 100.000 долари, падна француската влада

ПОЛИТИКА

Владата на францускиот премиер Мишел Барние падна во средата вечер, откако пратениците од крајната левица и крајната десница се здружија во собранието за да изгласаат недоверба. Ова е прв пад на некоја француска влада од 1962 година. Тоа значи дека Франција, според оцената на „Блумберг“, сега е чекор поблиску до влада на крајната десница, што претседателот Емануел Макрон се обидуваше да го избегне по секоја цена.

Повод беше контроверзниот буџет за 2025 година, кој Барние одлучи да го протурка врз основа на уставното овластување што ѝ овозможува на француската влада да го прескокне гласањето во парламентот - со тоа што тогаш се изложува на можноста да ѝ се изгласа недоверба во истиот парламент. Откако Барние го прескокна парламентот врз основа на споменатиот законски член, левичарската коалиција Непокорена Франција и десничарското Национално обединување најавија гласање за недоверба, што и се случи.

За нивната иницијатива гласаа 331 пратеник. Неопходниот минимум беше 288.

Народно собрание на Франција

По изгласувањето недоверба, Барние ќе биде принуден да поднесе оставка, а Макрон ќе мора да предложи нов мандатар за состав на владата, вторпат од предвремените избори во јули, кои изродија длабоко фрагментиран парламент. На изборите најмногу гласови освои десничарската партија Национално обединување, предводена од Марин Ле Пен, која сепак нема доволно мнозинство за самостојно формирање влада ниту има сојузници со кои би можела да формира владејачка коалиција.

Владата на Барние беше малцинска и опстојуваше со поддршка на Национално обединување, а потоа, под притисок на Европската Унија да го намали големиот дефицит, скрои буџет со низа контроверзни решенија, кои ги разлутија и Националното обединување и Непокорена Франција. Отстапката на Барние во поглед на откажувањето на владата од поскапувањето на струјата не ги задоволи опонентите.

Повеќе за тоа што го чека Макрон слушаме од Жан-Мари Гуено, поранешен француски дипломат.

Падот на кабинетот на Барние, кој беше на чело на владата само три месеци, ги вознемири и инвеститорите. Новиот развој на ситуацијата ги зголеми и трошоците за задолжување на Франција, додека еврото ги намали претходните добивки.

КРИПТО

Биткоинот првпат надмина 100.000 долари

Вредноста на биткоинот првпат надмина 100.000 долари, откако новоизбраниот американски претседател Доналд Трамп го номинира Пол Аткинс за директор на Комисијата за хартии од вредност. Аткинс инаку е познат по залагањето за ублажување на регулаторното оптоварување за да се овозможи раст на новите технологии, вклучувајќи блокчејн и криптовалути.

Биткоинот така зајакна за повеќе од шест проценти, на 103.801 долар. Откако Трамп на 5 ноември победи на изборите, вредноста на целокупниот пазар на криптовалути е зголемена за околу 1,3 билион долари. 

Повеќе за номинацијата на Пол Аткинс слушаме од новинарката на „Блумберг“.

БЕРЗИ

Европа

Фјучерсите на европските акции се тргуваат мешано пред објавувањето на најновите податоци за малопродажбата во еврозоната.

Depositphotos

Во фокусот на инвеститорите е секако и политичката неизвесност во Франција, каде што пратениците со големо мнозинство гласови ја урнаа владата. Референтниот индекс на Париската берза CAC40 на вчерашното затворање беше во пораст за 0,66 проценти.

САД

И фјучерсите на американските индекси се колебаат помеѓу добивки и загуби, откако претседателот на Федералните резерви (Фед), Џером Пауел, порача дека американската економија е во исклучително добра состојба и дека постепено исчезнуваат ризиците на пазарот на трудот.

Политиката на Фед ја коментираше и претседателот на разгранокот во Сент Луис, кој вели дека се ближи моментот за забавување или пауза во намалувањето на каматните стапки.

Азија

И акциите во азиско-пацифичкиот регион се тргуваат мешано, додека трговците ги анализираат ефектите на политичките потреси во Франција и во Јужна Кореја. Индексите во Јапонија и континентална Кина остваруваат добивки, додека јужнокорејските акции и домашната валута - јужнокорејскиот вон, регистрираат пад на вредноста.

Јужна Кореја и натаму закрепнува од шокантното воведување вонредна состојба, која ја прогласи претседателот Јун Сук Јеол, а која беше принуден да ја укине среде масовни осуди. Сето тоа доведе до хаос и неизвесност во политичкиот пејзаж на земјата.

Нафта

Цената на нафтата се стабилизира по падот, а трговците го очекуваат денешниот состанок на ОПЕК+, за кој се очекува дека ќе донесе повторно одложување на мерките за заживување на производството на веќе добро снабдениот пазар.

Bloomberg, ICE

Брентот се тргуваше над 72 долара за барел откако падна за речиси два отсто во средата, а ВТИ (West Texas Intermediate) беше под 69 долари.

Во моментов нема коментари за веста. Биди прв да коментира...

Остави коментар