ПОЛИТИКА
Француската влада во криза
Францускиот премиер Мишел Барние ги предупреди законодавците дека Франција го достигнала својот „момент на вистината“, во ситуација кога крајната десница на Марин Ле Пен е подготвена да ѝ се приклучи на левичарската коалиција за да ја соборат француската влада уште неделава. Партијата Национално обединување и левичарската коалиција во понеделникот поднесоа предлог за гласање недоверба на владата, а партиите што го поддржуваат Барние не се доволни за да се спротивстават на здружената левица и десница. Да потсетиме, иако Барние ги исполни речиси сите барања на Ле Пен за приспособување на францускиот буџет за 2025 година, таа рече дека нејзината партија сепак нема да го поддржи законот.
Израел не се откажува од договорот со Хезболах
На Блискиот Исток, израелските одбранбени сили соопштија дека Израел не се откажува од прекинот на огнот со Хезболах, и покрај тоа што во понеделникот изврши воздушни напади врз Либан како одговор на првиот напад на Хезболах во рамките на примирјето. Израел така ги отфрли сомнежите дека договорот би можел да пропадне. Израелската војска соопшти дека гаѓала милитанти, фрлачи на ракети и инфраструктура што му припаѓа на Хезболах. Ник Вадхамс од „Блумберг“ вели дека ваквите прекршувања на договорите се многу чести кога станува збор за примирја.
БИЗНИС
„Спејс екс“ би можел наскоро да вреди 350 милијарди евра
На корпоративен план, компанијата на Илон Маск, „Спејс екс“ (SpaceX), е во преговори за продажба на инсајдерски акции што би можеле да ја зголемат вредноста на компанијата на околу 350 милијарди долари, наведуваат извори запознаени со ова прашање. Новата вредност би претставувала значителен раст во однос на проценетата вредност од 255 милијарди долари од минатиот месец. Овој договор би го зацврстил статусот на „Спејс екс“ како највреден приватен стартап во светот.
БЕРЗИ
Европа
Фјучерсите на европските акции се тргуваат во зелено, и покрај тоа што Марин Ле Пен вети дека ќе ја собори владата на премиерот Мишел Барние бидејќи не ги исполнил нејзините барања за новиот буџет. Еврото е малку променето по падот од над еден процент поради политичките превирања во Франција, каде што обврзниците повторно се под притисок. Да потсетиме, европските берзи вчерашното тргување го завршија во зелено, а францускиот индекс успеа да ги избрише загубите и да остане на позитивна нула.
САД
Истовремено, фјучерсите на американските индекси се тргуваат претежно во зелено. Да потсетиме, S&P 500 во понеделникот го забележа своето 54-то рекордно затворање годинава. Трговците ја разгледуваат потенцијалната одлука на Федералните резерви (Фед) во декември откако членот на советот на гувернери на Фед, Кристофер Валер, изјави дека е наклонет кон намалување на каматните стапки.
Азија
Кога станува збор за акциите во азиско-пацифичкиот регион, тие претежно се тргуваат во зелено, а технолошките компании го предводат растот. Позитивното расположение е поттикнато од помалите американски ограничувања за кинескиот пристап до компоненти за чипови и вештачка интелигенција отколку што се стравуваше. Регионалниот индекс расте, како и индексите во Јапонија и Хонгконг, додека акциите во континентална Кина бележат пад откако јуанот падна на едногодишен минимум во однос на доларот поради загриженоста за слабата економија и зголемените тензии со САД.
НАФТА
Цената на нафтата е малку променета бидејќи трговците размислуваат кои би можеле да бидат следните чекори на ОПЕК+ пред клучниот состанок в четврток. Брентот се тргуваше близу 72 долара за барел, а ВТИ (West Texas Intermediate) околу 68 долари. Трговците сè уште очекуваат дека групата производители дополнително ќе го одложат обновувањето на производството поради загриженоста за презаситеноста на пазарот следната година.
Нафтата ја започна неделата со раст поради знаците на постепено економско закрепнување во Кина, најголемиот увозник, пред да падне малку цената во вторникот како што зајакна доларот. На цената влијаат тековните геополитички случувања на Блискиот Исток и во Русија, како и слабата побарувачка во Кина.
Bloomberg Mercury
.webp){kind=icon}
