Уште не се знае датумот за средбата меѓу Трамп и Путин - накратко од светот

Американскиот претседател Доналд Трамп најави дека најверојатно ќе воведе царини од околу 25 отсто за увоз на автомобили, полупроводници и фармацевтски производи. Русија и САД најавија можност за поширока соработка, а датумот на средбата Трамп-Путин уште не е познат. Фјучерсите на европските берзи се тргуваат главно во зелено, а цените на нафтата ги задржаа добивките остварени во претходните денови.

ПОЛИТИКА

Трамп: Царини од 25 проценти за увоз на автомобили

Американскиот претседател Доналд Трамп изјави дека најверојатно ќе воведе царини од околу 25 отсто за увоз на автомобили, полупроводници и фармацевтски производи и дека повеќе детали за овие царини ќе објави на 2 април. Кога станува збор за царините за автомобили, Трамп не прецизира дали мерките ќе бидат насочени кон одредени земји или ќе се однесуваат на сите возила увезени во САД. Потсетуваме дека американскиот претседател неодамна најави царини од 25 отсто за увоз на челик и на алуминиум, кои треба да стапат во сила веќе следниот месец.

 

Уште нема датум за средбата на Трамп и Путин

По состанокот во Саудиска Арабија, каде што високи американски и руски претставници го завршија првиот круг преговори за ставање крај на војната во Украина, Русија и САД најавија можност за поширока соработка. Состанокот во Ријад траеше четири часа и заврши со договор двете страни да формираат тимови на високо ниво што ќе работат на ставање крај на конфликтот. Американскиот државен секретар Марко Рубио по средбата изјави дека двете страни ќе ги продолжат разговорите за Украина, но дека сѐ уште не е одреден датумот за средба меѓу американскиот и рускиот претседател.

БЕРЗИ

Европа

Фјучерсите на европските акции се тргуваат главно во зелено. Европските берзи го затворија вчерашното тргување на рекордно ниво, а акциите на банките и на компаниите од одбранбениот сектор предничат во добивката. Имено, инвеститорите очекуваат европските влади наскоро да ги зголемат воените трошоци откако САД извршија притисок врз нив да ги зголемат вложувањата за одбрана.

САД

И фјучерсите на американските акции се тргуваат со добивка во пресрет на објавувањето на извештајот од јануарскиот состанок на претставниците на американските Федерални резерви (Фед).Токму за монетарната политика говореше и претседателката на Фед во Сад Франциско, која вели дека монетарната политика мора да остане рестриктивна додека не се оствари напредок во планот за сузбивање на инфлацијата.

Азија

Кога станува збор за акциите во азиско-пацифичкиот регион, тие претежно се повлекуваат бидејќи растечките трговски тензии ја зголемуваат внимателноста кај инвеститорите. Па така, акциите во Хонгконг и во Јапонија паднаа откако американскиот претседател Доналд Трамп се закани дека ќе воведе дополнителни царини од околу 25 проценти.

НАФТА

На пазарот на суровини цените на нафтата ги задржаа добивките остварени во претходните денови бидејќи Организацијата на земјите извознички на нафта и нивните сојузнички (ОПЕК +) размислува да го одложи планираното зголемување на производството на нафта. Нафтата брент моментално се тргува по цена од близу 76 долари за барел, додека цената на ВТИ (WTI - West Texas Intermediate) е на ниво од околу 72 долара.

Bloomberg