Јапонскиот берзански пазар е подготвен да го продолжи растот во наредните недели и месеци, додека валутата и обврзниците на земјата се изложени на ризик од понатамошни падови, по силниот резултат на Либерално-демократската партија на премиерката Санае Такаичи на неделните избори за Долниот дом.
Излезните анкети сугерираат дека Либерално-демократската партија може да обезбеди мнозинство, при што јавниот радиодифузер НХК (NHK) прогнозира дека владејачката коалиција би можела да освои и до две третини од пратеничките места, исход за кој многу инвеститори веќе се имаа позиционирано во изминатите недели.
„Генерално, изборните резултати се добредојдена вест за индексот Nikkei, имајќи предвид дека станува збор за јасен исход и појасен политички пат за стимулативните политики на Такаичи“, вели Тим Вотерер, главен пазарен аналитичар во „КЦМ Трејд“ (KCM Trade).
„Сепак, јенот би можел да се најде под дополнителен притисок, бидејќи фискалните стимулативни планови на Либерално-демократската партија практично добија ‘зелено светло’“.
Референтниот индекс Topix, кој во петокот затвори на рекордно високо ниво, годинава порасна за повеќе од 8,0 отсто, додека глобалниот показател за акции на развиените пазари забележа раст од само околу 2,0 отсто. Ова се должи на очекувањата дека повисоката јавна потрошувачка, за која се залага Такаичи, ќе го поттикне економскиот раст.
Јенот минатата недела ослабе за 1,6 отсто и се спушти на 157,22 за долар, приближувајќи се до нивото од околу 160 за долар, ниво кое и претходно ги поттикнувало јапонските власти да интервенираат на пазарот за да ја одбранат валутата.
.webp){kind=icon}
