Израел започна напад врз Иран, пријавени експлозии во Техеран

Израел утринава соопшти дека започнал „превентивни“ воздушни напади врз цели во Иран, што ги засили стравувањата од поширок конфликт во регионот богат со нафта.

Три силни експлозии се слушнале во централниот дел на Техеран, објави новинската агенција Фарс, додавајќи дека неколку проектили веројатно ја погодиле престолнината. Иранската државна телевизија пренесе дека густ чад се издигнувал над делови од градот. „Асошиетед прес“ објави дека еден од ударите бил во близина на канцеларијата на врховниот лидер на Иран, Али Хамнеи.

Израелскиот министер за одбрана Израел Кац прогласи вонредна состојба при објавувањето на нападот и изјави дека земјата очекува во блиска иднина да биде цел на напади со дронови и проектили. Сирени се огласиле низ целата земја, соопштија Израелските одбранбени сили.

Граѓаните биле повикани да останат во близина на засолништа, а воздушниот простор бил затворен за цивилен сообраќај. Вооружените сили издале и насоки со кои се забрануваат несуштински активности, вклучително и настава и јавни собири.