САД даваат зелено светло за продажба на руска нафта

САД издадоа втора дозвола купувачите да преземат руски пратки со нафта што веќе се на море, проширувајќи го привременото изземање од минатата недела што важеше само за Индија, во обид да се намали притисокот врз цените додека војната на Блискиот Исток продолжува.

Министерот за финансии Скот Бесент во објава на социјалните мрежи изјави дека потегот е „тесно насочена краткорочна мерка“, која „се однесува само на нафта што веќе е во транспорт и нема значително да ѝ донесе финансиска корист на руската влада“.

Американската влада презеде повеќе чекори за да ги ублажи нагло растечките цени на суровата нафта и горивата откако нападите врз Иран започнаа пред речиси две недели, меѓу кои и планираното ослободување на 172 милиони барели од своите стратешки резерви на нафта. Разгледувани се и други идеи, од интервенции на фјучерс-пазарите до можно привремено укинување на повеќе од еден век стар закон според кој американски бродови мора да се користат за транспорт на стока меѓу американските пристаништа.

Сепак, ефектот засега не е драматичен, при што нафтата брент во петокот се тргуваше околу 100 долари за барел.

 

 

Аналитичарите велат дека најновиот потег за зголемување на понудата би бил добредојден, но не претставува трајно решение.

„Секако дека секоја дополнителна понуда помага, но ова е помала помош отколку што изгледа“, изјави Роберт Рени, раководител на истражувањата за суровини во „Вестпак“ (Westpac Banking Corp.). Тој проценува дека од 125 до 150 милиони барели руска сурова нафта што се наоѓаат на море, околу една третина се во близината на Кина и најверојатно ќе завршат во складишта, додека 30-40 милиони барели се во Индија и најверојатно ќе бидат потрошени таму. Остатокот се наоѓа во Средоземно Море и во Атлантикот.

„Практично зборуваме за замена на можеби четири или пет дена изгубен извоз од Персискиот Залив. Да, тоа помага, но не е чудотворно решение“, додаде тој.

Најновата мерка, која го проширува привременото изземање што минатата недела ѝ беше одобрено на Индија, се однесува на нафта натоварена пред 12 март и ќе важи еден месец, што го ограничува бројот на бродови што можат навреме да стигнат до големите купувачи.

Според податоците за следење на бродови на „Блумберг“, околу 30 брода во азиските води превезуваат руска сурова нафта и нафтени деривати што потенцијално се достапни за купување. Бродовите се водат како „за нарачки“, што значи дека сè уште немаат јасна дестинација или се насочуваат кон Сингапур или Малезија, води во кои танкерите често се задржуваат додека се продава товарот.

Бесент претходно сугерираше дека САД би можеле да олеснат дел од санкциите за руската нафта за да се намали притисокот врз цените.

„Ако цените на нафтата повторно нагло пораснат, можеби затоа што Иран ќе ги засили нападите врз танкерите во Ормускиот Теснец, притисокот за укинување на санкциите кон Русија дополнително ќе се зголеми“, напиша во објава на социјалните мрежи Робин Брукс, виш соработник во институтот „Брукингс“ (Brookings Institution).

Бесент претходно во четвртокот изјави дека секоја корист за Русија од потезите на САД би била „несреќна“ и краткорочна. „Се надеваме дека тоа ќе биде многу краток период во кој тие ќе имаат корист“, рече тој во поткастот „Мастер инвестор“ со Вилфред Фрост.