Шлаканица за конкуренцијата - „зикер 7X“ е засега најкомплетниот електричен автомобил

Штом домашните купувачи почнаа да се навикнуваат дека кинеските брендови ја чистат конкуренцијата во пониските и средните сегменти на пазарот, на домашниот пазар пристигна нов предизвикувач кој влегува во борба за премиум сегментот. Неговото име е „зикер 7Х“ (Zeekr 7X) и во битката доаѓа вооружен до заби.

Bloomberg Adria

Личната карта на семејниот теренец на „Зикер“ накратко гласи вака: речиси 650 коњски сили, батерија од 100 kWh која се полни неверојатно брзо, должина од 4,8 метри и досег според ВЛТП (WLTP) од 543 километри.

Импресивно на хартија, но од Кинезите сме навикнати на надувани бројки. Нè интересираше како сето тоа функционира на пат и дали 7X е подготвен за остра конкуренција како „Тесла“ и германските брендови кои имаат длабоки корени кај локалните купувачи.

Нашиот впечаток по 1000 изминати километри со автомобилот е дека е и тоа како подготвен, уште повеќе, во многу работи ги остава конкурентите во прашина.

Bloomberg Adria

Веќе при првиот контакт ќе ви биде јасно дека станува збор за автомобил кој и тоа како ја оправдува цената од 64 илјади евра. Отворањето на вратите е првиот здив на луксуз бидејќи се отвораат на копче, а сензорите внимаваат да не удрите во околните возила или други пречки. Кога како возач ќе седнете внатре, доволно е да ја притиснете сопирачката и вратите се затвораат. Останатите патници имаат копче однатре, а со сите врати, багажникот, хаубата и капакот за полначот можете едноставно да управувате преку инфозабавниот систем.

Bloomberg Adria

На почетокот мислевме дека автоматските врати се непотребно претерување, но всушност многу брзо се навикнавме на нив и сега, по враќањето во реалноста, ни недостигаат. Истото е и со масажерите на седишта  - на почетокот ги гледавме само како уште една ставка на списокот со идни скапи дефекти, но потоа, по заморната прошетка низ трговски центар, ни го освежија изморениот грб. Уште еден мал луксуз на кој многу лесно се навикнува човек.

Самите седишта се исклучително удобни, обложени со „напа“ кожа, загреани, вентилирани и прилагодливи на сите можни начини. Солидно го држат телото во свиоци, но да бидеме реални, „зикер 7Х“ не е автомобил кој ќе го фрлате во кривини како „миата“ (Miata), туку е премиум крузер тежок 2,5 тони кој е наменет за исклучително удобно пловење по патот.

Bloomberg Adria

А чувството на пловење, односно лебдење, го дава воздушната суспензија која одлично ги впива дупките и нерамнините, па само ретки лежечки полицајци ќе успеат да го исфрлат од ритам, така што ќе ги почувствувате во кабината.

Покрај тоа што е исклучително комфорен, 7X е многу добро звучно изолиран, што значително придонесува за чувството на луксуз во кабината. Автомобилот е тивок и при големи брзини на автопат, само на ретки делници со асфалт со покрупна гранулација се слуша умерена бучава од гумите во кабината.

Но ако сè што аудитивно не ви одговара можете да го потопите во звукот на одличниот „зикер саунд“ (Zeekr Sound) аудиосистем со дури 21 звучник, развиен во соработка со „Јамаха“ (Yamaha). Ако сте љубител, на располагање имате еквилајзери и толку многу можности за прилагодување на звукот што можете со часови да се изгубите во местењето. Нам ни беше интересна можноста што музиката, како и упатствата од навигацијата или телефонскиот повик, можете да ги пуштите само преку звучникот кој се наоѓа во потпирачот за глава на возачкото седиште, така што не им пречите на останатите патници. Особено практична работа ако имате мали деца кои спијат во автомобилот, а вие сепак сакате да слушате што сакате.

Bloomberg Adria

На високо ниво е и ентериерот на автомобилот, и визуелно и на допир. Сите материјали се квалитетни, меки, сите полици се обложени со гума и/или текстил, амбиенталното осветлување е одлично решено, на задните прозорци, со веќе добро затемнети стакла, имате и завеси на извлекување, тука е и огромниот панорамски покрив, а малкуте копчиња што ги имате во кабината даваат убав тактилен повратен сигнал. Кинезите обрнале внимание на секоја ситница и ништо не е „избрзано“.

Bloomberg Adria

Што се однесува до просторот, го има како во дневна соба. Напред можете идеално да се наместите благодарение на големата флексибилност на воланот по длабочина и висина, а за седиштата веќе споменавме дека одат во сите правци (вклучително и лумбалната потпора). Кога еднаш ќе се наместите, можете да зачувате неколку позиции, па нема да има проблем ако автомобилот го возат повеќе лица.

Bloomberg Adria

Назад има простор како во ретко кој автомобил од оваа класа. Ни на луѓе високи два метра нема да им недостига простор за колена, глава или стапала. Потпирачите на седиштата можат да се спуштат до таа мера што можете убаво да се навалите наназад и да уживате во возењето. На располагање ви е потпирач за раце со држачи за пијалаци, плитка фиока за складирање и два УСБ приклучока. Завесите веќе ги споменавме, во предните седишта има џебови за одлагање, во Б столбовите имате прилагодливи отвори за вентилација, а под самите седишта се две поголеми фиоки кои ќе ви бидат корисни за складирање ситници, особено ако имате деца. Да сумираме, назад ќе се возите навистина директорски.

Bloomberg Adria

Багажникот има солидна зафатнина од 540 литри, има практично решено дно кое можете да го преклопувате за работите да не ви летаат по него, а под него има дополнителен простор за складирање каде можете да ги чувате каблите. Автомобилот има и т.н. франк (frunk/преден багажник) под хаубата од околу 40 литри, доволно за неколку шопинг кеси или кабли ако сакате целосно да го ослободите багажниот простор.

Bloomberg Adria

Приказната за ентериерот ќе ја завршиме со краток преглед на трите најважни екрани преку кои практично ќе управувате со сè и ќе ги добивате сите потребни информации за автомобилот и возењето. Пред возачот е најмалиот екран од 13 инчи кој можете во голема мера да го персонализирате, но веројатно тоа нема да ви биде толку важно бидејќи пред вас имате и врвен ХАД (Head-Up Display) кој всушност прикажува сè што ви треба додека сте зад воланот.

Bloomberg Adria

За сè останато тука е 16-инчниот екран на инфозабавниот систем во кој можете да поминете часови и часови конфигурирајќи ја висината на воздушната суспензија, јачината на регенеративното сопирање (автомобилот има и возење со една педала), бројни помошни системи, звукот, светлата. Едноставно ќе мора самите да му се посветите бидејќи текстот би бил долг како Новиот завет ако навлегуваме во сите детали.

Она што е важно е дека здодевните предупредувања за пречекорување на брзината и за одвлекување на вниманието на возачот можете да ги исклучите со спуштање на „ролетната“ од горниот дел на екранот и со еден клик.

Како формула на облаци

На почетокот на текстот истакнавме дека автомобилот има над 640 коњски сили, а во пракса тоа се претвора во забрзување од 0 до 100 km/h за помалку од четири секунди. Но „зикер 7Х“ дури и во спортски режим тоа не го прави дивјачки, туку рафинирано. Секако, лудата сила сите патници ќе ја почувствуваат во внатрешните органи и вратот бидејќи е неверојатна, но нема torque steering, нема пролизгување на гумите, сè оди како подмачкано.

Bloomberg Adria

На рамни делници од патот никој нема да може да ви парира, но ниту во свиоците 7X нема од што да се срами, особено ако земеме предвид дека станува збор за возило кое со неколку патници и багаж достигнува тежина од три тони. Таа маса се чувствува, но нема прекумерно навалување ако максимално ја спуштите суспензијата, а гумите цврсто се држат за асфалтот и линијата по која го насочувате. Чувството на сигурност дополнително го зголемуваат одличните сопирачки. Повторно ќе нагласиме, „зикер 7X“ не е спортист, но тоа не значи дека не е способен за поживо возење, напротив.

Bloomberg Adria

Но најдобро и вие и тој ќе се чувствувате во крстарење по локални патишта и автопати. Ниту подолгите делници нема да ве заморуваат, а најважно е што нема да губите многу време ниту на полначи бидејќи Ќилин (Qilin) батеријата од 100 kWh бруто (96 kWh нето) со НМЦ (NMC) хемија може да се полни со брзина до дури 480 kW. Ние на брзи полначи повлековме максимално 250 kW, но и тоа е доволно батеријата од 20 до 80 отсто да се наполни за практично околу 15 минути.

Би рекле дека 7X е првиот електричен автомобил со кој можете да тргнете на подолги релации без многу грижа и губење време поради големиот капацитет на батеријата и брзината на полнење.

Bloomberg Adria

Што се однесува до потрошувачката, таа генерално се движеше околу 20 kWh на сто километри, без никаков обид да бидеме рационални. Напротив, тоа вклучува поживо возење и задолжителни демонстрации на лудото забрзување за секој нов патник, но и за искусните на кои им се допаѓаат големите Г сили.

На автопат, ако ги претекнувате сите пред вас од левата лента, „зикер“ ќе „пие“ над 30 kWh на сто километри, па и така ќе имате околу 300 километри досег. На прв поглед не звучи многу, но со оглед на тежината и перформансите на автомобилот, всушност е многу добро. Во пракса тоа значи дека патување подолго од 500 километри по автопат можете да го завршите со едно пократко полнење.

Bloomberg Adria

Ако најчесто се возите низ град и по локални патишта, ВЛТП досегот (543 km) звучи речиси остварливо и всушност во такви услови ќе заборавите кога сте ја полнеле батеријата. Кога веќе зборуваме за градско возење, треба да се спомене дека 7X и таму многу добро се снаоѓа, иако е прилично долг (4,8 m) и широк над два метра. Во гужвите ќе ве спасува одличниот систем за автономно возење на кој можете со доверба да му се препуштите во тргни-застани сообраќај. За маневрирање по тесни улици и паркинзи тука се одличните 360 камери со врвна резолуција, со многу опции за преглед на ситуацијата во која се наоѓате, како и сензори кои ќе ви го покажат точното растојание од пречките во сантиметар.

Bloomberg Adria

Автомобилот може и сам да се паркира, го испробавме тој систем и уредно работи, но сепак тоа ќе ви оди побрзо „на рака“.

Првиот поглед на цената на „зикер 7X“ од 64 илјади евра кај нас предизвика скепса. Мозокот сè уште автоматски помислува  - многу е тоа за недокажан Кинез. Но по повеќе од илјада километри зад воланот го променивме мислењето. За она што го нуди, цената всушност сè уште е дебело дисконтна. Не го кажуваме ова лесно, но 7X моментално е најкомплетниот електричен автомобил на пазарот, без конкуренција.

Bloomberg Adria

Ако автоматските врати и седиштата со масирање ви се премногу, можете да погледнете кон long range верзијата со заден погон која чини 57 илјади евра, а тука е и базичниот модел со помала батерија (75 kWh, ЛФП/LFP хемија) за 54 илјади евра.

Вечните скептици малку ќе ги утеши и фактот дека „Зикер“ дава основна гаранција на возилото од пет години или 100 илјади километри (која можете да ја удвоите со редовни овластени сервиси), односно осум години гаранција на батериите (или 200.000 изминати километри), додека гаранцијата против корозија се искачува на 12 години.