Го возевме „лексус ЛБХ“, мал теренец со голем луксуз

Мора да признаеме дека на тестот на „лексус ЛБХ“ (Lexus LBX) дојдовме со мала доза на скепса. Од матичниот бренд сме навикнати на големи лимузини и теренци, па некако мислевме дека најмалиот член на семејството можеби нема да биде на толку премиум ниво како неговите поголеми браќа. О, колку се излажавме.

Bloomberg Adria

Штом седнавме во него, останавме импресионирани од дизајнот и квалитетот на изработката. Сè што ќе допрете во кабината на ЛБХ е меко, врвно склопено и пријатно за окото. Моделот што го возевме дојде во пакет со опрема ВЕ (Vibrant Edition), па впечатокот на луксуз беше дополнително засилен со двобојниот ентериер со детали од црвена кожа. Главно, првите неколку минути на паркингот само ги галевме површините и шевовите, восхитувајќи им се.

Bloomberg Adria

Најавата за она што ве очекува внатре започнува уште со отворањето на вратите. Рачката изгледа класично, но се отвора само со притискање  копче од внатрешната страна, нема повлекување и влечење. Вратите при затворањето звучат како да имаат изолациски слој од 10 сантиметри волна во себе, а кога ќе ги затворите, сета бучава што доаѓа однадвор исчезнува..

Bloomberg Adria

Кога ќе го притиснете копчето за стартување на автомобилот, се будат два големи екрана - дигиталниот возачки дисплеј од 12,3 инчи и мултимедијалниот екран со дијагонала од 9,2 инчи. Инфозабавниот систем е сличен на оној во целата понова гама на „Тојота“ - што значи дека е доста едноставен, што ќе ви биде сосема во ред ако не сте љубител на трендот на претерана дигитализација на кабините, кој доминира во последно време. Главно, во него имате сè што ви е потребно, графички не е којзнае колку атрактивен, но ја врши работата. Добрата работа е што во кабината има многу копчиња, па не мора многу да пребарувате низ менијата за да стигнете до основните функции.

Bloomberg Adria

Командите за климата се интересни бидејќи за поставување на температурата имате физички копчиња, додека брзината на вентилаторот се приспособува дигитално, но секогаш е видлива на долниот дел од екранот на мултимедијата. Во практика тоа функционира сосема добро и не го одвлекува вниманието при возењето.

Bloomberg Adria

Копчињата на управувачот се комбинација од капацитивни и физички, што ви овозможува да им ги менувате функциите, па така можете преку нив да управувате со климата, радиото, темпоматот и телефонот, а сите промени јасно ќе ги гледате на големиот и прегледен ХАД (head-up дисплеј), така што нема потреба да го тргате погледот од патот. Ако сте како нас и не сакате многу да читате упатства, ќе ви требаат неколку минути да сфатите како сè функционира, но потоа оди како подмачкано.

Како подмачкан работи и адаптивниот темпомат, кој особено добро спасува ситуација во градските и летните метежи со системот старт-стоп. Поради квалитетот што извира од секој дел на ЛБХ уште од самиот почеток, некако веднаш му верувате и на темпоматот и без двоумење му се препуштате, додека кај другите возила обично постои краток период на недоверба додека не се уверите дека сè функционира како што треба - сопирањето, одржувањето дистанца и држењето на лентата.

Bloomberg Adria

Прегледноста е одлична, ниската линија на кабината и тенките А-столбови резултираат со одлична видливост напред, а поради подигнатите странични делови на хаубата во секој момент можете да процените колку сте оддалечени од пречките. Страничната и задната прегледност исто така се многу добри, а тука се и камерата и сензорите за дополнителна сигурност. Добра ситница е што и страничните ретровизори на ЛБХ автоматски се спуштаат надолу кога ќе вклучите рикверц, па можете убаво да ги гледате тркалата додека маневрирате.

Добро е и што во „Лексус“ мислеле на деталите, па делот од средишната конзола на кој го потпирате коленото при возење е обложен со мека кожа, што дава дополнителна удобност при долго патување. Другите производители треба да се угледаат на овој пример.

Bloomberg Adria

Кога веќе зборуваме за средишната конзола, на неа се наоѓаат убаво дизајнирана рачка на автоматскиот менувач, држачи за чаши, безжичен полнач за мобилен телефон, два УСБ-приклучоци, како и копчиња за греење на воланот, односно за вклучување на паркинг-камерите, кои даваат 360 приказ на автомобилот.

Одлична суспензија

Премиум впечатокот што го остава кабината на ЛБХ дополнително расте кога ќе тргнете во возење. Го зголемува беспрекорно приспособеното подвозје, кое со леснотија ги амортизира дупките, нерамнините и лежечките полицајци. На почетокот имавме впечаток дека станува збор за воздушна суспензија бидејќи се чувствувавме како во големи луксузни автомобили. За една недела возење можеби само еднаш или двапати налетавме на дупка што малку го исфрли ЛБХ од рамнотежа и посилно се почувствува во кабината, а остатокот од времето имавме впечаток како да се возиме по облаци.

Bloomberg Adria

Сепак, удобноста не ги компромитира динамичните перформанси на автомобилот. ЛБХ е стабилен и сигурен во свиоци, но не е спортист, пред сè поради погонскиот склоп. Станува збор за добро познатиот хибриден систем на „Тојота“, кој комбинира 1,5-литарски трицилиндричен бензинец со 91 КС и електромотор со 94 КС, за вкупна моќност од 136 КС.

Bloomberg Adria

Спарен е со e-CVT (shift-by-wire) менувач, од нула до 100 км/ч забрзува за 9,2 секунди, а максималната брзина е ограничена на 180 км/ч. ЛБХ тргнува на струја, а трицилиндричниот мотор мазно се вклучува кога малку посилно ќе притиснете на педалот за гас. При градско и умерено возење е речиси нечуен, на повисоки брзини неговиот звук се слуша во добро изолираната кабина, но е пријатен. Дури при возење до крајните граници знае да стане погласен и малку да го наруши мирот на патниците.

Недостигот од луди забрзувања и голема моќност хибридниот мотор го надоместува со мазна работа и скромна потрошувачка. Ако внимавате, ЛБХ може да троши помалку од четири литри на 100 километри, а и при посилно притискање на педалот за гас тешко дека ќе надминете 7,5 литри. Ако се земе предвид дека овие погонски склопови на „Тојота“ ги следи репутација на речиси неуништливи машини, сите мали забелешки паѓаат во вода.

Bloomberg Adria

Има и некои недостатоци

Значи, врвна внатрешност, врвна удобност, одличен и штедлив мотор - човек би рекол дека ЛБХ е без никакви недостатоци. Но, не е баш така. Она што најмногу пречи е недостигот од простор на задните седишта. Зад возач висок над 185 сантиметри ќе има многу малку простор за колената на патниците што седат назад.

Bloomberg Adria

Уште една забелешка, барем во овој летен период, е полуанилинската кожа со која се обложени седиштата. Ако автомобилот го оставите на сонце, таа знае добро да се загрее, а при возење по жешко време во некои моменти толку многу се потевме што проверувавме дали случајно е вклучена функцијата за греење. За жал, нема опција за вентилација на седиштата.

Од поситните недостатоци ќе ја споменеме рачката за трепкачите, која би можела да има малку подобра амортизација и чувство при користење. Не дејствува евтино, но ѝ недостига уште малку префинетост за да биде на нивото на остатокот од беспрекорната кабина на ЛБХ. Исто така, би сакале горниот дел од воланот да биде малку подебел. Страничните делови се добро погодени, но горниот дел дејствува малку претенко во раката. Но добро, тука веќе ситничариме.

Мораме да се осврнеме и на багажникот, кој според спецификациите има нешто повеќе од 330 литри. Во практика изгледа многу подобро и попространо, од око би му дале повеќе од 400 литри, а има и доста практична форма. Иако би можел да биде поголем, тука не можеме премногу да приговараме.

Bloomberg Adria

Да сумираме - „лексус ЛБХ“ нè импресионираше со нивото на луксуз што го нуди. Не паметиме дека некогаш сме седнале во автомобил од оваа класа што имал толку добар квалитет на ентериерот и возните својства. Сето она што вообичаено го сакаме кај „Лексус“ и по што овој бренд е познат, го пронајдовме и кај ЛБХ, кој всушност е идеален автомобил за оние што сакаат премиум чувство, а не им е потребно големо возило, туку компактен автомобил што одлично се снаоѓа и во град и на отворен пат. Затоа воопшто не нè чуди што токму ЛБХ е најпродаваниот модел на марката.

Bloomberg Adria

Секако, сето тоа има своја цена, која не е мала, особено со ограничениот пакет на опрема ВЕ (Vibrant Edition), кој сепак го подига визуелниот впечаток на повисоко ниво со деталите на екстериерот и ентериерот. Нашиот тест-модел чини 46.000 евра, но ако не ве интересираат премиум додатоците, ЛБХ во основната варијанта започнува од 31.500 евра. Таа сума за вака добро склопен и добро осмислен автомобил дејствува многу прифатливо.