„Астон мартин вален“: нов суперавтомобил вреден 1,75 милион евра

„Астон Мартин Лагонда глобал холдингс“ (Aston Martin Lagonda Global Holdings Plc) претстави нов суперавтомобил наменет за богати колекционери, како дел од планираната операција производителот на автомобили да претстави сè поголем број ултралуксузни модели и на таков начин да ги намали финансиските загуби.

Британскиот производител го претстави „вален“, својот најмоќен спортски автомобил со преден мотор, на Неделата на автомобили во Монтереј, Калифорнија, во петокот. Новиот модел е напојуван од 5,2-литарски В12 (12-цилиндричен) мотор со два турбополначи и може да забрза од 0 до 60 mph за само три секунди. Неговата максимална брзина се проценува на 213 mph (344 км/ч).

Ќе бидат произведени само 150 примероци од „вален“, а цената ќе биде околу 1,5 милион фунти (околу 1,75 милион евра), според портпаролот на компанијата.​

Aston Martin Valen | Aston Martin Lagonda Global Holdings Plc

Продажбата на повеќе од своите луксузни модели, како што е „вален“, би му помогнала на „Астон Мартин“ да ги зголеми приходите додека се бори со загуби и растечки долгови под водство на извршниот директор Лоренс Строл.

Минатиот месец компанијата обезбеди финансирање од 550 милиони фунти (околу 644 милиони евра) предводено од ХПС (HPS Investment Partners), во сопственост на „Блекрок“ (BlackRock Inc.). Договорот налути некои постојни сопственици на обврзници, кои се заканија со судски постапки.

Тие всушност се незадоволни од недостигот од детали за договорот и велат дека се тргнати настрана. Фондовите предводени од ХПС ветија дека ќе обезбедат дополнителни 100 милиони фунти (околу 117 милиони евра) во кредити.

Средствата би биле достапни ако „Астон Мартин“ префрли 50,1 отсто од акциите во компанијата што ги држи нејзините права на интелектуална сопственост што не се од автомобилската индустрија на „Аутентик брендс“ (Authentic Brands Group), сопственикот на „Рибок“ (Reebok), во која ХПС е еден од инвеститорите.​

„Вален“ достигнува 100 километри на час за три секунди/ Aston Martin Lagonda Global Holdings Plc

Лоренс Строл се мачи да го спроведе својот план за пресврт откако ја спаси компанијата во 2020 година. Доцнењата во развојот на производите и проблемите со квалитетот се влошија од забавувањето на кинескиот пазар и американските царини.

Сето ова доведе до чести предупредувања за деловните резултати и нови зголемувања на капиталот додека компанијата се бори конечно да оствари профит.​

Детали од ентериерот на моделот „вален“ | Aston Martin Lagonda Global Holdings Plc

Во вториот квартал продажбата на ултралуксузните модели на „Астон Мартин“, кои компанијата ги нарекува „специјални“, се зголеми на 122 возила, во споредба со само четири во истиот период претходната година. Растот беше поттикнат од модели како „валхала“, која чини околу 860.000 евра. Тоа придонесе за зголемување на приходите за 62 проценти, на 358 милиони фунти (околу 419 милиони евра) во тој период. Сепак, компанијата забележа загуба пред оданочување од 89 милиони фунти (околу 104 милиони евра).

„Валхала“, првиот хибриден суперавтомобил на „Астон Мартин“, влезе во производство четири години подоцна од првично планираното. Нето-долгот на компанијата на крајот на јуни изнесуваше 1,54 милијарда фунти (околу 1,80 милијарда евра).