Колекцијата на часовници на Михаел Шумахер може да достигне милиони на аукција

Осум часовници од колекцијата на Михаел Шумахер, кои ги истакнуваат пресвртниците во кариерата на седумкратниот шампион во Формула 1, ќе бидат поставени на аукција во „Кристис“ (Christie's) во Женева и би можеле да достигнат милионски цени. Во понудата е уникатниот модел „Ф.П. журн вагабондаж“ (F.P. Journe Vagabondage 1) од 2004 година, кој ја обележува секоја од шампионските титули на Шумахер во Формула 1. Овој часовник возачот го добил од шефот на неговиот тим „Скудерија Ферари“, Жан Тод.

Часовникот е „веројатно најважниот 'вагабондаж Ф.П. журн' што е направен“, рече во едно интервју Реми Гилемин, шеф за часовници во „Кристис“ за Европа и САД.

Часовникот е со куќиште од платина, црвен бројчаник и златен механизам, на него се препознава логото на „Ферари“, како и карактеристичниот шлем со потпис на Михаел Шумахер. „Овој единствен часовник, создаден од познатиот производител на часовници од Женева, може да достигне цена од над милион швајцарски франци на аукција“, додаде Гилемин.

Другите часовници на Шумахер што ќе се продаваат во Женева на 13 мај го вклучуваат „одемар пиге ројал оук хронограф“ (Audemars Piguet Royal Oak Chronograph) во бело злато со бел бројчаник, со амблем на тимот на „Ферари“, како и шест ѕвезди што ги означуваат шесте шампионски титули во Ф1 што Шумахер ги освои во периодот од 1994 до 2003 година. Овој часовник е исто така подарок од Тод и има проценета вредност од 150.000 до 250.000 франци, според „Кристис“.

Во продажбата ќе биде вклучен и личниот „ролекс дејтона“ (Rolex Daytona) на Шумахер, моделот познат како „Пол Њуман“. Хронографот со црн бројчаник, референца 6262 со егзотични помошни бројчаници, се проценува меѓу 200.000 и 400.000 франци.

Шумахер се повлече од тркањето во 2012 година и претрпе тешка повреда на мозокот додека скијаше во Франција следната година. „Семејството Шумахер пристапило до ’Кристис’ пред повеќе од една година за да ја процени вредноста на некои часовници од колекцијата на поранешниот возач“, рече Гилемин.

За време на неговата кариера, Шумахер „бил многу чувствителен на светот на часовниците“ и поседувал голема колекција, додаде Гилемин.

Возачот беше рекламен партнер за брендот „Омега“ (Omega) на „Своч груп“ (Swatch Group AG) кога ја освои својата трета титула во Ф1 и прва со „Ферари“ во 2000 година. Потоа „Омега“ објави верзија на својот хронограф „спидмастер рејсинг“ (Speedmaster Racing) со потпис на Шумахер на задната страна на куќиштето.