Откако ја продадоа својата куќа во Атланта во 2023 година за 7,2 милиони долари, поп-ѕвездата Елтон Џон и неговиот сопруг Дејвид Фурниш ја продаваат нејзината содржина на аукција. Осум одделни продажни настани во „Кристи“ во Њујорк ќе содржат околу 900 лотови во вредност од над 10 милиони долари. Предвидени се вечерна аукција на 21 февруари и дневни аукции од 22 до 23 февруари, плус шест онлајн аукции. Лотовите ќе вклучуваат сè, од парот сребрени чизми на платформа на пејачот од 1970-тите (процена: од 5.000 до 10.000 долари) до неговиот кабриолет „бентли“ со две врати од 1990 година (од 25.000 до 35.000 долари).
„Станува збор за желба да се претстават работите што ги сакал во својот живот“, вели Дариус Хајмс, меѓународен директор на фотографија во „Кристи“. „Но ова, исто така, е поврзано и со продажбата на неговата куќа“.
Најатрактивните предмети
Значителен дел од аукцијата е составен од атрактивни лични предмети од колекцијата на пејачот, вклучувајќи ги и часовникот „ролекс дејтона“ од 18-каратно злато, со дијаманти и портокалов сафир со лице, и ремче со леопардов принт, проценет од 40.000 до 60.000 долари; неговиот клавир „јамаха“, кој беше во дневната соба, се проценува од 30.000 до 50.000 долари; и разни парчиња што се симбол за екстравагантниот стил на пејачот, вклучувајќи и пар очила за сонце од 1975 година, проценети од 2.000 до 3.000 долари, и синиот волнен костум од „Captain Fantastic“ обложен со циркони, од 6.000 до 10.000 долари.
Исто така има и значителен број облека и украсни предмети од брендот „Версаче“, толку многу што околу 70 лота ќе бидат предмет на специјална онлајн аукција на темата „Версаче“. Тука е и богатиот црвено-црн златен сервис за ручање „Медуза Ред“ на Версаче, кој се проценува помеѓу 4.000 и 6.000 долари, и она што Хајмс го нарекува „кошули на Версаче практично за цела година“. (Еден лот, кој се состои од шест свилени кошули на „Версаче“ од 1993 година, се проценува од 4.000 до 6.000 долари.) Цените, како што забележува Хајмс, не го вклучуваат „факторот Елтон Џон“. „Постои доста етаблирана филозофија околу продажбата на лични предмети на познати личности“, вели тој. „Станува збор за поставување релативно конзервативна процена, а потоа дозволуваме обожавателите и купувачите да ни кажат каков треба да биде пазарот“.
Фотографии
Сепак, за многумина вистински колекционери, врв на продажбата ќе бидат околу 360 фотографии од богатата колекција на Елтон Џон и Дејвид Фурниш. (Во мај музејот „В енд А“ во Лондон одржува специјална изложба со избор од нивната колекција.) Џон „поседува повеќе од 7.000 принта“, вели Хајмс, што претстојната продажба ја прави „мал дел од она што го поседува“. Сепак, ова е само вторпат пејачот да продава дел од својата колекција, според Хајмс, што е ретка можност за колекционерите на фотографии и за обожавателите.
Хајмс вели дека колекцијата на Елтон Џон може да се подели на четири главни области: она што Хајмс го нарекува „фигуративна мода, која е иконична, еден вид гламурозни фотографии“ од уметници како Ирвинг Пен, Ричард Аведон и Вилијам Клајн; потоа „многу смели, директни, повеќе сексуални актови“ од Хелмут Њутн и Брус Вебер. „Овие дела не се толку модни колку што се еротски и го слават голото човечко тело“.
Третиот дел е „доста хуманистички и евоцира општествени документарни теми од 20 век“. Делата вклучуваат фотографии од Луис Хајн, Роберт Френк и Доротеја Ланг. Последниот дел се состои од современи уметнички фотографии од повоениот период пронајдени во највисокорангираните галерии низ светот од: Андреас Гурски, Синди Шерман, Хироши Сугимото и Волфганг Тилманс.
Не е изненадувачки што многу од најскапите фотографии се од четвртата категорија. Фотографијата на Гурски од 2004 година, „Dior Homme“, се проценува од 300.000 до 500.000 долари; две фотографии од Сугимото од 1999 година, „Елизабет I“ и „Ричард I“, се проценети секоја од 50.000 до 70.000 долари. Еден од иконичните филмски кадри што ги овековечи Шерман, од 1979 година, „Untitled (Film Still #39)“, се проценува од 300.000 до 500.000 долари.
Но има и некои многу посакувани модни принтови. „Тука е и неверојатната снимка од едиторијал што Ричард Аведон го снимаше за ’Харперс базар’ во Париз во 1955 година“, вели Хајмс. „Ова парче е уникатно само по себе, бидејќи станува збор за принт што потоа е поставен на картонска основа, а ги има сите ознаки и дел од хартијата со насловот што беше објавен во ’Харперс’. Таа фотографија, ’Dovima With Elephants’, се проценува од 100.000 до 150.000 долари“.
Ѕирнете во светот на Елтон
Со оглед на тоа што аукцијата на Елтон Џон доаѓа веднаш по исклучително успешната серија на аукции на лични предмети на Фреди Меркјури во „Сотби“ во Лондон, споредбите меѓу двата настана се неизбежни. Но Хајмс предупредува дека, и покрај површните сличности - сувенирите и уметничките дела на двете поп-ѕвезди сигурно имаат некоја заедничка точка - овие две продажби се многу различни. „Најголемата разлика е во тоа што во случајот на Меркјури станува збор за продажба на работите на неверојатен уметник што почина“, вели Хајмс. „На некој начин, тоа беше последна шанса за глорификација на извонредна личност. Аукциите со Елтон, напротив, имаат цел „да му помогнат во проектот со продажбата на куќата и чистењето на нејзината содржина“, вели Хајмс.
Сепак, речиси е неминовно милионите обожаватели на Елтон Џон низ светот да најдат многу нешта што ќе им се допаднат. „Најдобар агол на гледање на оваа аукција е дека таа е моментален приказ на она со што Елтон живеел и го сакал во последните 30 години“, вели Хајмс. „Ова е како отворање врата и добивање шанса да ѕирнеме во неговиот свет“.
.webp){kind=icon}
