Опкружен со повеќе од еден век автомобилска историја во Музејот на Мерцедес-бенц во Штутгарт, тениската легенда Роџер Федерер возеше целосно црна лимузина од класата С на сцената, осветлен од камери и придружен од инспиративна музика, додавајќи допир на ѕвездено достоинство на најновиот обид на германскиот производител да ја одбрани својата луксузна круна.
Покрај појавувањето на Федерер, премиерата вклучуваше кратко појавување и од извршниот директор на „Енвидија“ (Nvidia Corp) Џенсен Хуанг. Извршниот директор на моментално највредната компанија во светот донесе допир од Силициусмката долина преку видео врска проектирана над целиот оркестар. Ваквиот спектакл е невообичаен за скромно освежување на моделот и покажува колку е важен овој момент за „Мерцедес“ (Mercedes-Benz Group AG).
Техничарите и дизајнерите на „Мерцедес“ ги објаснуваат карактеристиките на новата С-класа за време на презентација на производот, пред официјалната премиера во Штутгарт на 29 јануари/Фото: Alex Kraus/Bloomberg
Влогот е висок бидејќи С-класата е во срцето на луксузната стратегија на извршниот директор Ола Калениус. Таа стратегија, дизајнирана да го зголеми профитот, да помогне во финансирањето на транзицијата кон електрични возила и да го заштити „Мерцедес“ од високи фиксни трошоци, изгледа сè понесигурна.
Прочитај повеќе
Причини поради кои Германија не може да ја намали зависноста од Кина
Германските гиганти тивко тонат сè подлабоко во зависност од Кина, додека Берлин предупредува на сериозни ризици. Зад кулисите паниката се зголемува...
16.11.2025
„Порше“ и „Мерцедес“ научија скапа лекција - луксузните електрични возила не се продаваат
Слабата побарувачка за луксузни електрични возила ги принудува „Порше“ и „Мерцедес“ да го одложат производството на нови модели и да се вратат повторно на хибриди и бензинци.
25.09.2025
„Мерцедес“ ќе инвестира во кинеската „Чјанли“ за заеднички развој на автономни возила
Инвестицијата во „Чјанли“ го поврзува „Мерцедес“ уште поблиску со „Гили“, додека европските брендови се борат да опстанат на брзорастечкиот кинески пазар.
24.09.2025
Новиот „Мерцедес-Мајбах“ СЛ 680 не е за плашливите
Со грандиозен дизајн, моќен В-8 мотор и раскошна внатрешност, „Мерцедес-Мајбах“ СЛ 680 Монограм е симбол на луксуз кој ретко остава рамнодушни.
07.09.2025
Од нејзиното воведување во 2022 година - по пандемијата, кога цените на автомобилите нагло пораснаа, а обемот на продажба падна - побарувачката дополнително ослабе, додека конкуренцијата се зајакна. Во компанијата, синдикатите стануваат сè понервозни во врска со намалувањето на производството, што го отежнува потенцијалното намалување на трошоците. Комбинацијата на фактори остава многу малку простор за нови грешки.
„Ова е последна шанса“, вели Инго Шпаих, директор за корпоративно управување во „Дека Инвестмент“ со седиште во Франкфурт, еден од најголемите германски акционери на „Мерцедес“. Иако извршниот директор моментално ја има поддршката од одборот, „тој мора да докаже дека стратегијата функционира на вистински начин“.
56-годишниот Калениус рече дека останува на курсот, но предупреди дека 2026 година ќе биде година на забрзување бидејќи компанијата планира да лансира низа нови модели. И покрај загриженоста, тој истакна дека луксузните возила сега сочинуваат 15 проценти од продажниот микс, во споредба со претходно 11 проценти.
Калениус позира со посетителка пред лансирањето/Фото: Alex Kraus/Bloomberg
„Како водечки светски производител во врвниот сегмент, ова е нашата домашна територија“, рече тој како одговор на прашањето на „Блумберг“. „Тука лежи нашиот најголем потенцијал за заработка.“
С-класата, чија цена започнува од околу 121.000 евра, е клучна за какво било закрепнување. Моделот претставува столб на понудата на „Мерцедес“, поставувајќи стандарди во технологијата и престижот. Сепак, продажбата се намали во САД и Азија.
Слабоста во Кина, најголемиот пазар на брендот, е особено загрижувачка бидејќи локалните производители ги освојуваат пребирливите купувачи со удобност и префинетост - карактеристики што некогаш беа заштитен знак на „Мерцедес“.
Раните луксузни електрични модели, како што се седанот ЕКС (EQS) и електричната верзија на Г-класата, не го постигнаа очекуваниот моментум. Овие неуспеси дополнително го зголемуваат притисокот врз С-класата да го носи товарот на стратегијата.
Тензијата може да се види и во деловните резултати. Од 2022 година, маржите на профит во автомобилското производство се намалија од речиси 15 проценти на околу четири проценти. Оперативната добивка за 2025 година, според проценките на аналитичарите собрани од „Блумберг“, би можела да се преполови - значително повеќе од падот од девет проценти на глобалните испораки.
Новата С-класа, чија цена започнува од околу 121.000 евра, носи V8 мотор со внатрешно согорување и софистицирани гласовни команди базирани на вештачка интелигенција/Фото: Alex Kraus/Bloomberg
Намалувањето на понудата на попристапни модели и зголемувањето на цените ги оставија фабриките недоволно искористени. Слабата побарувачка за С-класата го наведе менаџментот да го намали производството во фабриката во Синделфинген на една смена од октомври 2024 година, во споредба со претходниот максимум од три.
Проблемите во Кина ја изненадија компанијата. Уште во 2023 година, раководителите на „Мерцедес“ тврдеа дека С-класата е подобро заштитена од трендот на електрификација отколку поскромните сегменти.
Во меѓувреме, побарувачката за увезени луксузни седани ослабе поради кризата на пазарот на недвижности и трговските тензии со САД, кои ги погодија и БМВ, „Ауди“ и „Порше“.
Технолошките промени имаа поголемо влијание од очекуваното. Електричните мотори ја бришат предноста на усовршувањето на моторот со внатрешно согорување, кој „Мерцедес“го произведува со децении, додека кинеските производители беа поуспешни во интегрирањето на технолошките решенија наменети за возење со шофер.
Освежениот модел има понапреден систем за забава во автомобилот/Фото: Alex Kraus/Bloomberg
Пример за ова е „маекстро“ (Maextro S800), развиен во соработка со „Хуавеј технолоџис“ (Huawei Technologies Co) и државната компанија „ЈАЦ Груп“(JAC Group). Овој ултралуксузен модел, достапен исклучиво како целосно електричен или плаг-ин хибрид, ја прескокнува ерата на класичните мотори и ја покажува силата на индустрискиот екосистем на Кина.
Alex Kraus/Bloomberg
Почетна цена од околу 708.000 јуани - речиси за една третина пониска од водечкиот модел на „Мерцедес“ - носи троен екран, 40-инчен проектор, луксузни кожни седишта и врати што се отвораат автоматски. Од јуни минатата година, веќе ги надмина С-класата, „порше панамера“и БМВ Серија 7 во продажбата.
За купувачи како Сем од кинескиот град Сјамен, кои во ноември се одлучија за „маекстро“ наместо „мајбах“, технолошките карактеристики и електричниот погон беа поважни од престижот на германските брендови.
„Постои огромен јаз помеѓу автомобилите со внатрешно согорување и електричните возила“, рече Сем. „Освен брендот, класичните автомобили не можат да се натпреваруваат со електричните возила“.
Иако „Мерцедес“ покажува некои знаци на закрепнување, С-класата останува клучен тест. Компанијата ги истакна подобрувањата во софтверот и удобноста на задните седишта, вклучувајќи гласовни команди базирани на вештачка интелигенција од „Опен еј-ај“, „Мајкрософт“ и „Гугл“.
Сместена меѓу историските седани во музејот, освежената С-класа е симболично претставена како наследник на славното минато. Вистинскиот тест, сепак, допрва треба да дојде - далеку од Штутгарт, на кинескиот пазар.
„Она што го нарекуваме освежување тука е всушност револуција“, рече Келениус.
- Линда Лу помогна во пишувањето на текстот
.webp){kind=icon}
